INKLUSIEWE ONDERWYS: 'N BESTUURSPERSPEKTIEF

Hoofstuk 1: Inleidende perspektiewe
1.2 Probleemstelling
Uit bostaande is duidelik dat die sukses van die implementering van ‘n nuwe beleid soos
die beleid op inklusiewe onderwys by ’n skool tot ’n groot mate van die skoolbestuur se
vermoë om die implementering te bestuur, afhang. Die dilemma waarmee die
skoolbestuurders egter te kampe het, is dat hulle tot op hede in ’n eksklusiewe
onderwysstelsel gefunksioneer het en weinig of geen kennis van inklusiewe onderwys
het nie en dus waarskynlik nie voldoende toegerus is om die beleid van inklusiewe
onderwys te implementeer nie.
Na aanleiding van die voorafgaande probleem, kom die volgende probleemvrae na vore:
1. Wat is inklusiewe onderwys en wat is die huidige internasionale en nasionale
beleid rakende inklusiewe onderwys?
2. Watter tekortkominge gaan skoolbestuurders moontlik tydens die implementering
van die beleid in Suid-Afrika ervaar, en hoe kan die leemtes aangespreek word?
3. Wat is die realiteite rakende die bestuur van inklusiewe onderwys binne die Suid-
Afrikaanse opset?
4. Watter implikasies hou die implementering van die beleid spesifiek vir Suid-
Afrikaanse skoolbestuurders in?
1.3 Doel van die navorsing
Die doel van die navorsing is om die bestuursrol van die skoolbestuurder in die
implementering van die beleid van inklusiewe onderwys te omskryf. Om hierdie doel te
bereik, gaan die volgende doelwitte nagestreef word:
1. Om die konsep van inklusiewe onderwys te omskryf en om die huidige
internasionale en nasionale beleid rakende inklusiewe onderwys uit te lig.
2. Om moontlike tekortkominge wat skoolbestuurders met die implementering van
die beleid van inklusiewe onderwys in Suid-Afrika kan ervaar, te identifiseer en
aan te dui hoe skoolbestuurders bemagtig kan word om die probleme op te los.
3. Om die realiteite rakende die bestuur van inklusiewe skole in die Suid-Afrikaanse
opset te omskryf.
4. Om die implikasies wat die implementering van die inklusiewe -onderwysbeleid
spesifiek vir Suid-Afrikaanse skoolbestuurders inhou, te omskryf.
5