Nadere toegang nr. 61 - Gemeente Schiedam

NADERE TOEGANG 61
Cornelisz. sall betaelen alle die toecoemende iaere die noch resten te betaelen an den huijse ende
eerve staende upt Eijnde int Groenendall daer hij anthans in woenachtich is sonder dat die voirn.
eerffgenaemen daer eenige moelestatie off hebben sullen. Ende sall Zeger voirn. daer en boven noch
gehouden wesen den voirsz. eerffgenaemen vut te reijcken die somme van drie pondt groot Vlaems.
Te betaelen een £ groot Vlaems gereedt ende tot Pinxsteren naestcomende noch een £ groot Vlaems
ende die reste bedraegende ter somme van een pondt groot Vlaems tot sinte Maertijns misse anno 48
naestcomende. Ende zijn hijer up ten date als voeren van maelcander vertegen nae den rechte deser
stede bij scepenen Meijnert Iansz. ende Adriaen Iansz. scuemaecker.
Nr. 26 folio 9 d.d. 15-12-1547.
Gerrijt Adriaensz. alias Gerrijt Eeckgen heeft bewesen zijn twee kinderen (als Matgen ende Batgen
Gerrijts dochteren), achtergebleven weeskinderen van Marijtgen Ewouts dochter saliger gedachten
zijnder huijsvrouwee, elck der voirscr. kinderen voir haer matrimonium 13 £ 5 schelling groten Vlaems.
Daer en boven sall Gerrijt voirn. noch den voirn. twee weeskinderen vut reijcken 10 schelling groten
Vlaems ende dat ter cause van eenen ring van gouden een latte, die hij vut den buel der voirn.
kinderen ontfangen heeft hemluijden toebehoerende. Te betaelen als die voirn. kinderen gecomen
sullen zijn tot haeren mondigen dagen up twee £ grooten Vlaems tsiaers. Des sall die voirn. Gerrijt
Adriaensz. vaeder der voirsz. kinderen gehouden wesen die voirn. weeskinderen te houden tot haeren
mondigen dage tue, cost, schuenen ende cleederen geven als dat behoirt onvermindert dat voirn.
hooftgelt. Mit voirwairden indien eenich van den voirn. twee weeskinderen storve binnen haeren
mondigen dagen, soe sall haere eerffportie voirsz. besterven op ten andere kinde noch int leven
zijnde. Ende ingevalle zij alle storven soe salt sterven upten rechten eerven nae scependom recht,
ende die voir gementioneerde somme van penningen als dan te betaelen den eerffgenaemen up twee
pondt grooten Vlaems tsiaers nae den lesten overleeden gedurende ter tijt toe die voir
gementioneerde somme van penningen betaelt sall zijn, mitsgaders oick dat die voirn. kinderen sullen
hebben die iuweelen haere moeder achter gebleven zijn als een roede karmesie riem mit 14 vergulde
roesen mit een vergulde beslach, twelck gecoft heeft Mees Ewoutsz. om 12½ carolus gulden. Te
betaelen tot sinte Maertijns misse dagen anno 48 naestcomende in die 12 nachten van Kersmisse
daeran volgende well betaelt. Noch een zwart vijftich mit vijff zilvere teijckens ende een zilveren ruijdt
heeft gecoft Mees voirn. om 45 schelling, te betaelen als voeren. Noch een kristallijnen vijftich mit vijff
zilvere teijckens heeft gecoft Cornelis Ewoutsz. alias Neel Koenen om 21 schelling groten Vlaems, te
betaelen als voeren. Noch een cleijn zilvere copgen mit eenen vrouwen onderriem, heeft gecoft Ian
Ewoutsz. om 9 schelling 2 penningen groten Vlaams van Mees Ewoutsz., Ian Ewoutsz. ende Cornelis
Ewoutsz. alias Neel Koenen als oomers des voirsz. weeskinderen. Ende zijn hijer up vertegen naeden
rechte van de stede upten 15° Decembris bij den burgemeester, scepenen Adriaen Iansz. ende
Sebastiaen Anthonisz.
Nr. 27 folio 8v. d.d. 03-09-1547.
Op ten 3° Septembris 47 soe heeft Pieter Meesz. alias Soll hem selven geconstitueert borge voir
Gerrijt Adriaensz. alias Eeckgen voir alle tgheene die voirn. weeskinderen mach competeren van
haere matrimonium voeren gemencioneert. Mitsgaders oick voer allen actien ende voir all tgunt dat die
weeskinderen van wijlen Rochus Ewoutsz. van Gerrijt voirn. mach comen ofte competeren. Actum bij
scepenen Adriaen Iansz. ende Hubrecht Willemsz.
Nr. 28 folio 8v. d.d. 16-12-1547.
Up ten 16° Decembris soe heeft Ghijsbrecht Barentsz. dbacker bewesen (Ian ende Neeltgen) zijn
kinderen, aftergebleven van wijlen Fijtgen Cornelisdr. saliger memorien, elck tweentwintich pondt
derthien schelling vijer penninck groot Vlaems. Te betalen als die voirn. kinderen thien pondt groot
ende up twee iaer daernae de reste. Ende sall die voirn. kinderen houwen tot hoiren mondigen dagen
toe, cost, schuenen ende cleederen geven, onvermindert die voersz. penningen. Ende wairt dat
Neeltge voirn. eer dat zij hijlict, van haer vaeder scheijde, soe sal Ghijsbrecht voirn. van dien tijt off
haer geven renten van de thien pondt groot ende als zij huwelickt, sal hij haer cleeden soe hij Iob zijn
dochter gecleet heeft. Ende heeft dit verzeeckert upte huijsen ende erven daer hij inwoent ende voort
up alle zijn guedt. Hijer is bij geweest Ian Jansz. dbacker ende Iacob Pietersz. als gesette voechden
van den voirsz. kinderen, mitten burgemeester Cornelis Iacopsz. ende scepenen Ian Heinricksz. taner,
Hubrecht Willemsz., Iacop Pietersz. ende Sebastiaen Anthonisz. ende zijn vertegen nae den rechten
van den stede.
Kanttekening: Huijden den 15° Aprilis ……… soe heeft Frans ………. ende Sebastiaen …………..,
bekent ………te zijn ter cause ………… besterffenisse ………….. Ghijsz. saliger ……… bestorven
zijnen ……….. volgende tinhout ……… weesboeck.
Nog een kanttekening: ……….. huijden den 11° …….. anno 1557 ……….. Sebastiaen Jacopsz.
bekendt betaelt te wesen van alsulcke erffenisse ende besterffenisse ……… in den text van desen
gementioneert staet.