Nadere toegang nr. 61 - Gemeente Schiedam

NADERE TOEGANG 61
buell bevonden nemen ende boeren sall die somme van twintich pondt vijff scelling groot Vlaems.
Actum bij scepenen Adriaen Iansz. ende Hubrecht Willemsz.
Nr. 33 folio 11 d.d. 31-01-1548.
Op ten 31° dach in Ianuario soe heeft Katherijna Iacops dochter alias Stugge weduwee wijlen Gerrijt
Allaertsz. saliger gedachten bewesen Willem Iacopsz. haer zoen, achtergebleven van wijlen Iacop
Willemsz. Tromper saliger gedachten, voir zijn patrimonium (boven die drie pondt groot Vlaems den
selven voirn. Willem Iacopsz. bij zijne voirscr. moeder bewesen inden iaere 25 lestleeden, van de
welcke bewijsinge Willem voirscr. bekent heeft well volldaen ende betaelt te wesen), die somme van
72 carolus gulden van 40 grooten Vlaems de gulden off paijemente dijer waerde. Te betaelen tot
achtien sinte Maertijns misse dagen naestcomende telcken termijne vijer carolus guldens, wair off
teerste iaer verschijnen sall tot sinte Maertijns misse dage anno vijftich naestcomende ende soe voort
gedurende van iaere tot iaere ter tijt ende ter wijlen toe die voirn. somme van penningen betaelt zall
zijn. Noch zoe bewijst Katherijna voirscr. Marijtgen Gerrijts dochter, haer dochter achtergebleven van
Gerrijt Allartsz. saliger voirn. (mit expresse consente van haeren man Ian Maertijnsz. als voicht van
Marijtgen Gerrijts dochter voirscr.), voer haer patrimonium die somme van 72 carolus guldens
paijemente als voeren, te betaelen up all sulcke termijnen als boeven. Ende dit heeft Katherijna voirn.
hemluijden verzeeckert ende geijpotiqeert up haer huijs ende eerve daer zij allthans inwoont, staende
in die Goijstraet upt Eijnde tusschen Cornelis Iansz. huijs ende eerve an die oostzijde ende Adriaen
Pietersz. alias Leechtasgens huijs ende eerve an die westzijde. Ende voorts up alle haer guedt,
gewonnen ende ongewonnen, roerende en de onroerende. Ende zijn hijer up vertegen ende oick die
eevenknijen van maelcanderen naet recht vanden stede ten date als boven bij scepenen Adriaen
Iansz. ende Sebastiaen Anthonisz.
Nr. 34 folio 11 d.d. 14-03-1548.
Op ten 14° dach in Martio soe zijn bij dese arbiters als dburgemeesters Anthonis Willemsz. ende
Iacop Danielsz. veraccordeert ende overeengedaegen des pertijen an beijden zijden als Liedewij Ians
dochter weduwee wijlen Pieter Duesz. alias Spronck saliger gedachten ter eenre, ende Cornelis
Pietersz. Spronck haer zoen ter andere zijde. Ter cause van alle alsulcke diffrenten ende gescillen als
tusschen beijden der voirscr. partijen upgeresen zijn ter cause van de achtergelaeten gueden van
zijne voirsz. vaeder Pieter Spronck voirn., als dat die voirscr. Cornelis Pietersz. daer inne consenteert
ende mede te vreeden is, dat Liedewij Ians dochter zijne voirscr. moeder sal moegen vercoopen die
huijsinge mit haeren eerve alldaer zij allthans in woenachtich is, ende dat tot prouffijte van beijde voirn.
partijen te gaen halff ende halff. Ende soe wat sculden nu ter tijt die men den voirn. buell sculdich is
bevonden worden, sullen bij den voirn Cornelis Pietersz. ingemaent ende berecht worden tot coste
van den voirsz. buell. Ende soe wes penningen gecomen sullen zijn als dan den gemeenen buell toe
behoerende ofte soe wat inbuell ofte huijsraet gecoft is off gecoft sall worden bij den voirn. Cornelis
Pietersz. ofte deur ijemandts van zijnen tweegen, dselve penningen daer off comende (zoe well vande
voirscr. sculden als vanden inbuell die hij coopen ofte duen coopen sall), sall Cornelis voirn. dselve
penningen ontfangen in off cortinge van de 75 pondt Hollants ontfangen bij Liedewij voirn. van de
achtergelaeten gueden van des voirscr. Cornelis Pietersz. grootemoeder tot Leijden gestorven, hem
bij maniere van testamentaire dispositie gemaeckt. Mits conditien dat als die voirscr. huijsinge vercoft
sall zijn, soe sall daer in den eersten off betaelt worden die burgemeester Pieter Cornelisz. die somme
van twaeleff pondt groot Vlaems ende renten van dien. Dwelcke Liedewij voirn. van hem
ondergenoemen heeft den penninck sesthien te renten. Noch sullen voeren off betaelt wordden
dandere lopende sculden dwelcke den voirn. vercofte huijsinge sall wesen, ofte gaen an beijden zijden
halff ende halff. Ende sullen als dan van de reste vande penningen noch als dan resterende van de
voirscr. huijsinge gemaeckt worden twee custingbrieven daer off die eene hebben sall Liedewij Ians
dochter voirn. ende dandere Cornelis Pietersz. voirscr. Actum ten huijse van heer Cornelis Willemsz.
ter presentie van Mees Duesz. van Leijden als oem ende Marijtgen Duenen dochter als moije van
svaeders zijde van Cornelis voirn. Ende in kennisse van desen soe hebben wij Liedewij Ians dochter
voirn. ende Cornelis Pietersz. voirsz. dit onderteijckent mit onse gewoenlicke naem ofte hanticken.
Ende tot meerder verzeeckerheijt voeren verhaelt soe hebben wij Anthonis Willemsz. ende Iacop
Danielsz. voirn. als arbiters in deser saicke dit mede onderteijckent ten date ende iaere als voeren.
Hijer upt voirscr. ontfangen bij Cornelis Pietersz. voirn. an zeeckere inbuell vut den gemeenen buell bij
hem gecoft, ter presentie zijne beijde moijen, bedragende ter somme van twintich carolus guldens van
40 grooten Vlaems de gulden.
Nr. 35 folio 12 d.d. 18-04-1548.
Op ten 18° Aprilis is bij den burgemeester Pieter Cornelisz. ende scepenen omnes, veraccordeert in
die saicke van de eerffgenaemen van wijlen Heijn Hugesz. als Sebastiaen Heinricksz. ende Ian Iansz.
stierman alias ionge Jan als man ende voecht van Katherijna Heijnricksdr., dat heer Adriaen Diricksz.
priester hebben sall zeeckere twee custing brieven, een off die eene spreeckende is up Ioest Iansz.