Bolboreta - Barbantia

A COR DOS SOÑOS - BERGEN 9
Bergen
María Xesús Blanco López
Cando miña nai decidiu que iamos visitar ao
meu pai a Bergen, sentín unha sensación
fortísima. Coma se as burbullas dun caramelo
líquido estalasen no centro do meu estómago.
Tiña moitas ganas de ver ao meu pai. A Paco,
que é como o coñece todo o mundo. Xa ía para
dous meses que o Instituto de Recursos Naturais o
mandara tan lonxe. E outras tantas de subir a un
avión. Subir, subir…, xa subira cunha excursión do
cole cando empezara a Primaria. Como molara!
Todos metidos na cabina de mando. E Fabián e eu
a sentarnos na cadeira do piloto, a tocar a panca
de engalaxe, os botóns do acendido… E o Chuflas a
mirar de esguello as auxiliares de voo. E a fardar.
Porque presumir, alardear e fardar e o que máis lle
gusta do mundo ao meu peor inimigo. Logo o aeroporto
de Labacolla coñecíao coma se fose a miña
casa. Que se temos que levar á tía Loli que se vai
para Londres; que se imos recoller ao primo do avó
Xosé que vén do Brasil…
Pero o de voar era outra cousa. Era a primeira
vez. E todo grazas ao Instituto de Recursos Naturais
da Universidade de Santiago. E a esa investigación
coa Universidade de Bergen para repoboar os ríos e
os mares. Porque os nosos ríos xa non teñen salmóns,
nin troitas… E no noso océano cada día hai
menos peixes. Di meu pai que moitos enferman e
morren a causa dos incendios. E da contaminación.
E que Paco é veterinario de peixes.
-Corre, Alberte, que imos chegar tarde!
Tarde di ela. Non pensedes que é a miña culpa.
E que Sara, a miña nai, é unha tardeira. Ademais,
hoxe erguinme ás cinco da mañá, ou sexa, quince
minutos antes de que tocara o espertador. E ela
dorme que te dorme. Como vivimos en Santiago, e
a só dez minutos do aeroporto, pois a enredar con
cousas sen importancia. Sempre pensa que lle dá
tempo a todo e chegamos xustos a todas partes.
Cando chegamos, claro. E iso que papá lle regalou
un reloxo cuns números ben grandes, moi romanos
e moi serios, para que lle puxeran un pouco de respecto.
Pero parece que isto non lle afecta.