Bind 2 - Løgtingið

Tey fyrstu mogu árini
stóð Tinghúsið einsamalt
norðan fyri býin.
Hølisumstøður Løgtingsins
15
Tann rættuliga stásiliga ætlanin, sum amtmaðurin hevði biðið
Just Winther um í 1852, varð sum nevnt kolldømd av Løgtinginum,
og eitt nógv minni hús varð bygt í staðin. Tekningin,
ið varð gjørd, var alt annað enn góð, og hóast Dahlerup
fleiri ferðir royndi at gera Løgtingið vart við teir vansar, ið
hetta húsið hevði, má sigast, at hetta varð gjørt uttan stórvegis
eydnu.
Sum dømi kann nevnast, at í brævi til Løgtingið dagfest 10.
august 1854 greiddi Dahlerup frá, at hann longu árið fyri
hevði gjørt tingið varugt við, at ætlanirnar vóru ófullfíggjaðar.
Millum annað førdi Dahlerup fram, at timburmaðurin, ið
stóð fyri byggiarbeiðinum, var ónøgdur við, at tað á tekningini
ikki var gjørt greitt, hvar ein trappa upp á løgtingsloftið skuldi
setast, og sjálvur helt Dahlerup mest átrokandi mangulin við
húsinum vera, at einki rúm var innrættað til sorinskrivaran at
halda rætt í. Løgtingið hevði í 1852 samtykt, at gamla tinghúsið
var í einum so vánaligum standi, at tað ikki kundi nýtast
og tí skuldi seljast. Sorinskrivarin, ið øll árini hevði hildið til
niðri í Gongini, var tí vorðin húsvillur og mátti halda til í
løgtingshúsinum. Dahlerup metti hesa støðu vera óhepna, tí
hóast sorinskrivarin kundi halda rætt nøkulunda ótarnaður
17 Føroya løgting. Roknskapur Amtsgrunsins 1843/44-1855/56.