Bind 2 - Løgtingið

Hølisumstøður Løgtingsins
47
í verki, tykist hava verið, at hesar vóru ov smáar. Tær hildu seg
innanfyri teir fíggjarkarmar, sum Løgtingið og Landsnevndin
høvdu sett. Kortini varð Thomas Havning biðin um at gera
ætlanir um eitt hús, ið var so stórt, at størsti parturin av
landsumsitingini skuldi kunna húsast undir somu lon. Um
løgtingshús møguliga hevði verið bygt í fyrra helmingi av
1940-unum, um annar veraldarbardagi ikki var brostin á, er
torført at siga við vissu. Í 1852–1854 og 1904–1907 var
Løgtingið ósamt um byggiætlanirnar. Henda ósemjan var ikki
til staðar í 1930-unum. Møguleikin var tí heilt avgjørt til
staðar.
Tinganes var longu í 1939 nevnt sum rætta staðið at byggja
løgtingshús. Áðrenn annan veraldarbardaga var hetta ikki
gjørligt, tí ein privat handilsfyritøka átti økið. Eftir at aldargamli
tingstaðurin í 1947 aftur var komin á føroyskar hendur,
vóru nógv, ið hildu, at nú var tíðin komin, til at Løgtingið
skuldi flytast út aftur í Tinganes. Hetta var tó ein hugsan, sum
øll ikki kundu taka undir við. Løgtingsviðgerðin í 1970-unum
ber týðiligan vitnisburð um, at bæði fyrimunir og vansar vóru
við eini slíkari flyting. Skal hugsast um orðini hjá Jóannesi
Patursson frá 1905 um virðing fyri Løgtinginum, kann staðfestast,
at varð løgtingshúsið staðsett á einum søguligum staði
sum Tinganesi, hevði hetta avgjørt viðført tign, men samstundis
eisini ótíðarhóskandi loysnir fyri nútíðar føroyingin.
Trupult tykist hava verið at valt ímillum tign og lagaligheit, og
hetta man vera høvuðsorsøkin til, at málið kom í drag og
ongantíð gjørdist veruleiki.
Valið millum tign og lagaligheit tykist eisini hava stóran
leiklut í trupulleikunum, sum hava stungið seg upp í samband
við nýggjastu nýbyggingarætlanirnar. Hevði ætlanin frá 1949
um at byggja løgtingshús saman við telefonverksbygninginum
verið framd í verki, var neyvan gjørt stórvegis hóvasták burtur
úr, at gamla tinghúsið varð niðurtikið. Løgtingshúsið fekk tó
loyvi at standa í umleið 50 ár afturat. Sæð út frá einum
varðveitingarsjónarmiði er tinghúsið sostatt vorðið nakað væl
eldri. Sigast kann, at tinghúsið í hesum samanhangi hevur
vunnið sær størri rætt til at verða standandi. Tað, ið Løgtingsins
formansskapur tykist hava havt í huga við byggiætlanunum,
var ein lagalig loysn á afturvendandi hølistrupuleikunum, sum
Løgtingið hevur virkað undir. Sæð út frá hesum sjónarmiði