Bind 2 - Løgtingið

Inntøkugrundarlag
tingsins síðani endurstovnanina
í 1852
Endurstovnan Løgtingsins
Tað var táverandi einaveldiskongurin Fríðrikur 6., sum tók av
Føroya løgting í 1816. Sjálvt um Føroyar vóru norskt land,
høvdu tær í longri tíð verið stýrdar úr Keypmannahavn. Í
Danmark varð farið undir at nýskipa fyrisitingina av ríkinum
í 1661, tá einaveldið varð sett á stovn. Tey gomlu lenini vórðu
avtikin, og nýggjar fyrisitingarligar eindir, amt, sum vóru undir
leiðslu av kongsins embætismonnum, amtmonnum, vórðu sett
á stovn. Føroyar komu undir amtsskipanina í 1720, men tær
fingu ikki sjálvstøðugan amtmann fyrr enn í 1816. Menningin
av embætisskipanini undir einaveldinum tømdi so líðandi
fólksins umboðsstovnar, løgtingini, fyri innihald. Hetta hevði
við sær, at seinast í 1700-talinum varð farið undir at avtaka
løgtingini í danska ríkinum, og í 1816, sama ár sum Føroyar
fingu sjálvstøðugan amtmann, varð føroyska Løgtingið sum
tað seinasta í ríkinum niðurlagt.
Amtmaðurin kom sostatt at stýra í Føroyum, uttan at Løgtingið,
sum jú varð avtikið í 1816, kundi leggja seg út í nakað
av almennu viðurskiftunum í føroyska samfelagnum. Amtmaðurin
ráddi sostatt eftir galdandi lóg fyri øllum landsins
viðurskiftum og hevði um hendi alt samband við kongsins
stýri í Keypmannahavn. Tað sigur seg sjálvt, at hann tí eisini
umsat øll almenn peningalig viðurskifti í Føroyum. Tað snúði
seg bæði um inntøkur kongs frá Føroyum, herundir kongliga
einahandilin, og møguligan ríkisstuðul til Føroya. Hesin