Bind 2 - Løgtingið

1 Thorsteinsson, 1980 s. 300ff.
Hølisumstøður Løgtingsins
Hølisumstøður
Løgtingsins
Endamálið við hesi grein er at viðgera hølisumstøðurnar, sum
Løgtingið hevur virkað undir gjøgnum tíðirnar, og í hesum
sambandi serstakliga nakrar av teimum ætlanum, ið hava verið
frammi um at byggja nýtt løgtingshús. Byggiætlanirnar hava
verið nógvar. Ikki er møguligt at fara niður í smálutir við
teimum øllum, eyðvitað liggur tí okkurt eftir, sum kundi verið
tikið upp. Størstur dentur verður lagdur á tíðina eftir, at
Løgtingið varð endurstovnað í 1852. Hetta er tó bert minsti
parturin av søguni hjá Løgtinginum, og tí skal sjøtul setast á
við fyrst at nerta eitt sindur við, hvussu Løgtingið húsaðist
áðrenn avtøkuna í 1816.
Gamla Løgtingið
Ikki er nógv, ið vit vita um hølisumstøðurnar tey fyrstu nógvu
hundrað árini. Av fyrstan tíð varð Føroya ting hildið uttandura
á helluni úti í Tinganesi, og nær Løgtingið er flutt innandura,
er ógreitt. Fyrstu ferð, vit fáa nakað at vita um, at Løgtingið
heldur til í einum húsi, er í 1557, tá ið ting varð hildið i
Raadstouffen, sama verður nevnt í 1627, og í 1619 varð tingið
hildið í einum Gildisskála, sum helst er sama húsið úti í
Tinganesi. Í 1663 varð ting hildið í landsins tinghúsi, men
hetta hús hevur neyvan verið heilt nýtt, tí sama árið brúkti
fútin 67 gl. 4 sk. til umvælingar, ið hann kravdi aftur frá
Løgtinginum. 10 ár eftir var stórur eldsbruni úti í Tinganesi.
Tá brann løgtingshúsið í grund, og tingið var húsvilt í 23 ár. 1
Hesi árini helt Løgtingið til á Reynagarði, og í bókini
„Færøerne 1600–1709“ skrivar N. Andersen soleiðis um hølis-
9