Bind 2 - Løgtingið

Hølisumstøður Løgtingsins
41
Skuldi Løgtingið flytast út í Tinganes, sum býráðið mælti
til, var ætlanin, at tað skuldi byggjast í Fútabakka, norðan fyri
Munkastovuna og Leigubúðina, so økið ímillum (kirkjugarðurin)
kundi nýtast til t.d. útifundir og tílíkt. Nevndin
metti, at hendan staðseting nøktaði hølistørvin, sum teir
einstøku flokkarnir høvdu víst á. Nøkur av teimum ynsktu
hjálparrúmunum, eitt nú blaðmannarúm, máttu kortini takast
av skránni. Størsti vansin við at byggja løgtingshús í Tinganesi
var ferðslan. Tað hevði verið sera torført at greiða ferðsluviðurskiftini
og púra ógjørligt at útvega nóg stórt øki til
parkeringspláss. Harumframt var eisini ein trupulleiki, at
tinghúsið hevði ligið ógvuliga innibyrgt og uttan stórvegis
møguleikar fyri útbygging.
Fyrimunir vóru tó eisini við at byggja úti í Tinganesi,
serstakliga tað stóra umhvørvisvirðið, sum hetta hevði havt
fyri tingið. Eitt virði, ið ikki kundi fáast, um hin møguleikin,
at byggja tinghús á fríum øki í útjaðaranum av býnum t.d. á
býarøkinum C1, vestanfyri R.C. Effersøesgøtu, varð nýttur
ístaðin. Hendan loysn hevði tó eisini havt sínar fyrimunir. Ein
arkitektur hevði verið frítt stillaður bæði viðvíkjandi byggisniði
og stødd, og parkerings- og ferðsluviðurskifti annars kundu
verið loyst á ein nøktandi hátt. Prísmunurin á hesum báðum
møguleikunum hevði sambært Tinghúsnevndini væntandi ikki
verið stórur. Varð avgjørt at fylgja omanfyri nevndu fortekningum
til tinghús úti í Tinganesi, fór kostnaðurin væntandi at
liggja um 6 milliónir umframt 500.000 kr. til grundstykkið. 66
Kostnaðurin av at byggja ein samsvarandi bygning á einum
fríum øki varð mettur at vera nakað, men ikki nógv, lægri.
Við fráviki frá tíðarfreistini kom málið um nýtt tinghús til
1. viðgerð í Løgtinginum 15. mars og varð sent í Tinghúsnevndina
67 til nærri viðgerðar. Nevndin býtti seg í tveir
minnilutar, sum komu við hvør sínum uppskoti til samtyktar
3. apríl 1974. Annar minnilutin 68 mælti til, at nýtt tinghús
varð bygt á ásýniligum staði vestanfyri R.C. Effersøesgøtu.
Loysnina við bygging í Fútabakka hildu teir vera gjørliga,
men ikki ráðiliga. Tinganes var eitt søguligt stað, sum rættari
66 Gunnar Hoydal til Johan Djurhuus, 13. november 1972.
67 J.Fr. Øregaard var skiftur út við Hilmar Bech.
68 Trygvi Samuelsen, Finnbogi Isaksen og Hilmar Bech.