Bind 2 - Løgtingið

Hølisumstøður Løgtingsins
43
og snikkaravirkið hjá Karl Hansen í Klaksvík stóð fyri at gera
innbúgvið. Húsið varð aftur klætt við timbri og fekk flagtak,
so at tað uttan fekk nakað av upprunaútsjóndini aftur. Innan
varð húsið broytt soleiðis, at á fyrstu hædd var tingsalurin við
áhoyraraplássum, tvær forstovur, toilett, tekniskt rúm og rúm
til tíðindafólk. Á loftinum var stór sitistova, í norðara enda
tvey minni fundarrúm, harav annað varð nýtt til skrivstovu, ið
hevði teldu, telefax, kopimaskinu og annað. Umframt hetta
var eisini pláss til ein lítlan køk á loftinum. Tá Apotekið flutti
í nýggju hølini við R.C. Effersøesgøtu, varð „gamla Apotek“
keypt til floksrúm, og seinni fór Løgtingsskrivstovan eisini at
húsast har. Keypsprísurin var 4,6 mió. kr.
Partar av tingmanningini vóru harmir um, at ætlanirnar um
at byggja nýtt tinghús úti í Tinganesi vórðu sleptar. Umbyggingin
var tó so mikið væleydnað, at løgtingsmenn sum
heild vóru nøgdir við úrslitið. Hóast hetta sum so nógvar
ferðir áður einans skuldi vera ein fyribilsloysn, vóru ikki nógvar
røddir, sum av álvara tosaðu um at fáa bygt eitt nýtt løgtingshús.
Ætlanirnar frá 1997
Nýggjastu ætlanirnar um broyting av hølisumstøðunum hjá
Løgtinginum fóru av bakkastokki í 1997. Tær eru enn ikki
lidnar, og tí skal ikki verða gjørt stórvegis burtur úr teimum
her. Í samband við, at tað í 2002 fóru at verða 150 ár síðani
Løgtingið varð endurstovnað, umhugsaði Løgtingsins formansskapur,
hvussu hetta serstaka ár skuldi hátíðarhaldast.
Ein tignarligur møguleiki var at byggja nýtt løgtingshús.
Nógvar hugsanir vóru frammi um, hvar nýggja húsið skuldi
staðsetast, bæði í fjølmiðlunum og millum tingmenn. Niðurstøðan
hjá formansskapinum var, at besta loysnin var, at húsið
varð verandi har tað var, og at telefonverkshúsið gjørdust ein
partur av løgtingshúsinum. Á vári 1998 varð ein arkitektakapping
fyrireikað í samstarvi við Arkitektafelag Føroya.
Vinnari av kappingini gjørdist Heidi Poulsen, arkitektur, men
ætlaða nýbyggingarætlanin varð tó av ongum.
Orsøkin til, at ætlanin varð slept, var, at tað á heysti í 1999
gjørdist formansskapinum greitt, at meiriluti ikki var í Løgtinginum
fyri ætlanini. Summir tingmenn vóru ímóti, tí ætlanin
var dýr, hon varð mett at kosta 80 til 100 mió. kr. Aðrir vóru