Mæna 2010

Þar sem við, verðandi grafískir hönnuðir, erum á leiðinni út á markaðinn að loknu
skólaári, þá langaði okkur að forvitnast um heiminn sem bíður okkar. Hvaða leið
sem hvert okkar kann að kjósa, þá vildum við skoða auglýsingabransann því staðreyndin
er sú að um það bil helmingur okkar stefnir að því að vinna á auglýsingastofu.
Því fannst okkur áhugavert að skoða hvaða kosti og galla það hefur í för
með sér. Við vildum kanna mismuninn á stóru og litlu stofunum ásamt því hvernig
það er að starfa sjálfstætt. Við töluðum við starfsmenn á ólíkum stofum. Starfsmennirnir
sem svörðuðu könnuninni koma ekki fram undir nafni, heldur kemur
eingöngu fram á hvaða stofu þeir starfa.
41.
Hvað finnst þér skemmtilegast og leiðinlegast að gera í vinnunni?
JÓNSSON & LE’MACKS — hönnuður
Skemmtilegast finnst mér þegar verkefnið gengur upp, heppnast vel,
eiginlega sama hvernig verkefni það er. Mér líður best þegar ég er
ánægður með verkið og kúnninn líka. Á móti finnst mér leiðinlegast
þegar smekklaus kúnni treystir mér ekki og er með puttana í öllu og
útkoman verður svo vond að ég neita að kannast við verkið. Þá langar
mig mest til að gráta eða skipta um starf.
FÖÐURLANDIÐ — hönnuður
Úff, það er svo margt skemmtilegt. Ætli það sé ekki skemmtilegast
þegar maður fær verkefni sem maður sér fram á að bjóði upp á
mikla tilraunastafsemi og frelsi, þegar manni er treyst fullkomlega
til að fara eigin leiðir í að koma skilaboðunum til skila. Það sem er
leiðinlegast að gera í vinnunni er að bíða eftir klósettinu.
SJÁLFSTÆTT STARFANDI — hönnuður
Skemmtilegast finnst mér í hugmynda- og skissuvinnu, í fínu lagi
ef maður setur sig í réttar stellingar og fær næði til að hreinteikna.
En leiðinlegast finnst mér þegar verkefnin fara að dragast á langinn
vegna stöðugra breytinga, óákveðni og skipulagsleysis kúnnanns.
Hversu mikið frelsi hefur þú sem hönnuður?
VATIKANIÐ — hönnuður
Frekar mikið, maður finnur bæði traust yfirmanna aukast sem og
kúnna eftir því sem starfsaldur eykst. Kannski einhver tenging þarna
á milli, veit það ekki. Hmmm, reynsla og allt það …en já eftir því sem
ég verð reyndari þá finn ég að ég hef mun meira frelsi sem hönnuður.
JÓNSSON & LE’MACKS — hönnuður
Úff…í þessum bransa…ég hef miklu meira frelsi í frílans verkefnum en
á stofu. Það fer þó eftir kúnnum. Þegar ég vinn á stofu get ég vísað frá
mér frílans verkefnum sem ég hef ekki áhuga á að vinna. Á stofu hefur
maður ekki frelsi til að segja kúnnanum að vera úti.
FÍTON — hönnuður
Að mörgu leyti er það undir kúnnanum komið. Sumir þurfa t.d. að
fylgja útlitslegum staðli. En ég tel samt að við höfum meira frelsi hér
á landi en í útlöndum þar sem markaðurinn er mun minni hér og ekki
eins „corporate“.
Hvað er eftirminnilegasta verkefnið og hvers vegna?
HVÍTA HÚSIÐ — hönnuður
Eftirminnilegasta verkefnið er auglýsingin með andlitunum í götunni,
fyrir Umferðastofu. Ég fékk mikið frelsi, auglýsingin vakti mikla
athygli og vann verðlaun erlendis, sem var mjög gaman.
VATIKANIÐ — hönnuður
Ég held að það sé Silvíu Nótt bókin … það voru gerðar 49 opnur af
brjáluðu photoshop runki og þetta var unnið á rétt rúmlega einni viku
… loka spretturinn var rúmlega tveggja sólarhringa vaka og algjör
geðveiki. Ég er mjög sáttur með afurðina.
SJÁLFSTÆTT STARFANDI — hönnuður
Sennilega þegar ég var að vinna að kynningu á fyrstu Skolpu hreinsistöðinni,
þá var unnið ýmislegt kynningarefni sem greindi frá vinnslu
og tilgangi stöðvarinnar. Þetta var mikil vinna á stuttum tíma, unnið
dag og nótt, eitthvað sem er meira gaman að hafa gert heldur en að
gera, en það er alltaf gaman að vinna með skemmtilegu fólki.
Hvar sækir þú innblástur?
FÍTON — hönnuður
Ég heillast af alþýðulist og gömlu handverki þó það skili sér kannski
ekki alltaf á augljósan hátt í hönnun minni.
FÍTON — hönnuður
Innblásturinn kemur bókstaflega allstaðar frá. Það er svo áhugavert
við þetta fag, að augu manns opnast og maður sér umheiminn allt
öðruvísi. Gamlar ljósmyndir, flagnaðir veggir, landakort, náttúra og
gulnaður pappír. Bara hvað sem er!
JÓNSSON & LE’MACKS — hönnuður
Aðallega á netið en líka á ferðalögum. Annars getur maður fengið
hugmyndir allan sólarhringinn, alls staðar!
FÖÐURLANDIÐ — hönnuður
Frá vinum mínum, bókum, tónlist og arkitektúr frá áttunda
áratugnum. Það sem hefur samt eflaust mest áhrif á það sem ég geri er
sjálfsagt það sem ég var að gera rétt áður en ég byrjaði að vinna, t.d.
bókin sem ég las, teiknimynd sem ég horfði á eða ristaða brauðið sem
ég fékk mér áður en ég settist niður.