TE MAU OHIPA E TE MAU HAAMAITAIRAA O TE AUTAHU'ARAA

106
TE METUA TANE
EI PATEREAREHA
Haapiiraa 11
Te tumu no teie haapiiraa no te haapuai ïa i to tatou iteraa i te ti‘araa o
te metua ei patereareha i roto i te utuafare.
Omuaraa
■ Faaite i te hoho‘a 11-a, « Te titau nei te Fatu i te mau metua ia faatere
i to ratou mau utuafare. »
Ua parau te peresideni Spencer W. Kimball : « Ua faanahoaho te Fatu i
(Ta’na Mau Tamarii) i te haamataraa i te hoê metua no te hamani, no te
haapa‘o, e no te here e no te faatere, e te hoê metua vahine no te hamani
e no te fanau e no te faaamu e no te atuatu e no te haapii [e i te mau
tamarii] te haere mai no te here, no te faatura, e no te mauruuru te tahi i
te tahi. E faanahonahoraa rahi roa te utuafare no te oraraa i to’na hamaniraahia
e te faanahonahoraahia na to tatou Metua Here i te Ao ra » (i roto
i te Amuiraa eperera 1973, 151; e aore ra Ensign, tiurai 1973, 15).
■ E aha ta te peresideni Kimball i parau ei hopoi‘a na te metua ?
« Te ti‘araa metua e mea mo‘a e te mure ore. I roto i te mau ti‘araa ato‘a
no te tura e te hanahana e te haamoriraa o te parauhia no te Atuaraa,
ua ani oia ia tatou ia paraparau ia’na ei Metua » (Father, Consider Your
Ways (pamphlet, 1973), 2).
■ A himene « Ta‘u Metua », e aore ra a tai‘o i te mau parau (no te
Himene no. 292)
I roto i te tau no te misioni a te Faaora i ni‘a i te fenua nei, ua parau
pinepine Oia i To’na Metua e na roto i te huru mo‘a. Te faaite ra te mau
papa‘iraa mo‘a e ua ite Oia i To’na Metua, no te mea ua aparau Oia
Ia’na ra e ua rave i To’na ra hinaaro (a hi‘o i te Mareko 14:36). E mea
ti‘a ia tatou ia apee, e ia haapii i ta tatou mau tamarii ia apee, i te
hi‘oraa o te Faaora no te faatura e te faahanahana no To’na ra Metua.
■ Nahea tatou ia faaite i te faatura i to tatou Metua Here i te Ao ra ?
I to tatou metua i te tino nei ?