TE MAU OHIPA E TE MAU HAAMAITAIRAA O TE AUTAHU'ARAA

Haapiiraa 11
Te vaira i roto i te mau papa‘iraa mo‘a e rave rahi mau aamu no ni‘a i
te mau metua o tei riro ei mau patereareha maitai. O Alama te Tamaiti
tei haaputuputu i ta’na mau tamaroa e ua horo‘a i te tamarii tata‘itahi i
ta’na a‘oraa e ta’na haamaitairaa (a hi‘o i te Alama 35:16). Ua haapii te
Arii Beniamina i ta’na mau tamaroa ia maramarama i te mau papa‘iraa
mo‘a (a hi‘o i te Mosia 1:2). Na mua a‘e o Adamu e o Lehi i te poheraa,
ua haamaitai raua i ta raua mau tamarii (a hi‘o i te PH&PF 107:53;
2 Nephi 3: 1–25; 4:1–11). Mea na roto i te mana o te autahu‘araa to teie
mau peropheta raveraa i ta ratou mau hopoi‘a patereareha no to ratou
mau utuafare. Na roto ato‘a tatou i te mana o te autahu‘araa e nehenehe
ai tatou e horo‘a i te mau haamaitairaa patereareha parauti‘a i to
tatou mau utuafare.
Arairaa i te Mau Titauraa o te Utuafare
Ei patereareha no to’na utuafare, e hopoi‘a na te hoê metua i te tauturu
i te mau melo o te utuafare no te arairaa i to ratou mau titauraa. A tahi,
te vai nei Te titauraa a te melo tata‘itahi mai te maa, te fare, e te ahu.
■ E aha atu â te tahi mau titauraa a to tatou mau utuafare ? (Papa‘i i te
mau mana‘o i muri nei i ni‘a i te tapura papa‘i).
Ia Hinaarohia e ia Herehia
E nehenehe ta tatou e faatupu i te mau titauraa a te mau melo no to
tatou utuafare no te here e te faariiraa ia ratou na roto i te parauraa atu
ia ratou e ua here tatou ia ratou. Ua horo‘a o Elder Loren C. Dunn i te
hoê hi‘oraa no te reira :
« Te haamana‘o nei au i te hoê hautiraa taata ora tei tavirihia ei hoho‘a
teata. E hoho‘a ïa no ni‘a i te mau metua e hoê ana‘e ta raua tamarii,
e tamaroa, tei ho‘i mai i te fare na roto mai i te aua faehau. E ere te
metua e te tamaiti i te mea afaro roa. E na taata ho‘i raua tei here te
tahi i te tahi aita râ raua e ite ra e nahea ia parau i te reira, e no reira ua
tupu mai te ma’inoinoraa i rotopu ia raua no te mea ua mana‘o te tahi
e aita te tahi e au ra ia’na...
« Te vahi puai mau o teie hauti maoti râ i te taime ïa te tamaiti i parau
atu ai i te hoê parau mai teie te huru :
« ’Papa, i au ore noa na vau ia oe mai to‘u na’ina’iraa no te mea aita oe
i parau noa a‘e mai ia‘u e ua here oe ia‘u, are‘a râ ua ite au i muri mai e
aita ato‘a vau i parau a‘e nei ia oe e ua here au ia oe. No reira, e Papa,
te parau atu nei au ia oe i teie nei: Ua here au ia oe.’
« No te hoê taime roa ua haharu te metua e te tamaiti ia raua e ua apa
te tahi i te tahi na roto i te here e te mauruuru no te rahiraa o te mau
matahiti i haerehia mai » (i roto i te Conference Report eperera 1969,
22–23; e aore ra te Imrovement Era, tiunu 1969, 52–53).
110