TE MAU OHIPA E TE MAU HAAMAITAIRAA O TE AUTAHU'ARAA

44
TE RAVERAA I
TE MAU ORO‘A O
TE AUTAHU‘ARAA
Haapiiraa 5
Te tumu no teie haapiiraa no te haapii ïa ia tatou e nahea ia rave i te
mau oro‘a o te autahu‘araa.
Omuaraa
Ua parau mai te Fatu ia tatou, « No reira, i teie nei a tuu atu i te mau
taata ato‘a ia haapii mai i ta’na iho ohipa, e ia rave ho‘i i te ohipa i roto
i te toro‘a tei faataahia no’na ra, ma te itoito atoa » (PH&PF 107:99).
E mea ti‘a ia ite te mau taata e mau nei i te autahu‘araa e nahea ia rave
i te mau oro‘a o te autahu‘araa e ia tiamâ no te faarii i te arata‘iraa a te
Varua Maitai no te raveraa i te reira.
Tei ni‘a i te huru o to tatou faaroo e te haapa‘oraa e nehenehe ai tatou
ia haamaitai i te mau oraraa o vetahi ê na roto i te mau oro‘a o te autahu‘araa.
Ua parau o Joseph Fielding Smith, « Ua papû ia‘u ... e ite hau
atu tatou i te mau faaiteraa a te Varua o te Atua, na roto anei i te faaoraraa
i te ma’i, mai te mea e ora fatata noa tatou i teie mau faanahoraa
mau (faaohiparaa i te faaroo i te Atua ra na roto i te raveraa i ta tatou
mau ohipa ei mau melo no te Ekalesia) » (Doctrines of Salvation, haaputuhia
e Bruce R. Mc Conkie, 3 buka, [1954–56], 2:311–12).
E nehenehe ato‘a to tatou puai ei mau melo e mau nei i te autahu‘araa
i te faahaerehia i mua na roto i te pure. Na mua a‘e tatou e rave ai i te
mau oro‘a o te autahu‘araa e mea ti‘a tatou ia imi i te Fatu na roto i te
pure. I te tahi mau taime e titauhia ia haapae i te maa no te tahi ïa mau
faanahoraa taa ê. (A hi‘o i Te Mau Ohipa e te Mau Haamaitairaa o te
Autahu‘araa, Tuhaa A, Haapiiraa 31, « Pure e te Haapaeraa Maa. ») Mai
te mea e haafatata atu tatou i te Fatu na roto i te varua o te pure e te
haapaeraa maa e ia ora i Ta’na mau haapiiraa mai to tatou puai ato‘a,
e arata‘i ïa te Varua ia tatou i roto i ta tatou ohipa a te autahu‘araa.
E aha te Mau oro‘a ta Tatou e nehenehe e Rave ?
■ E aha te mau oro‘a ta tatou e nehenehe e rave na roto i te mau ti‘araa
o te autahu‘araa o ta tatou e mau nei ? (Faaohipa i te haamaramaramaraa
i muri nei no te arata‘i i te aparauraa).