TE MAU OHIPA E TE MAU HAAMAITAIRAA O TE AUTAHU'ARAA

Haapiiraa 4
Te Mau Haamaitairaa no te Arata‘iraa e no te Tamahanahana
Mai te mea e aita e roaa te haamaitairaa metua tane, e nehenehe e
horo‘a i te hoê haamaitairaa no te arata‘iraa e no te tamahanahana na
te hoê epesikopo, peresideni amaa, taea‘e hahaere utuafare, e aore ra te
tahi atu melo e mau nei i te Autahu‘araa a Melehizedeka. Hoê â teie
mau haamaitairaa i te mau haamaitairaa metua tane. E tauturu ïa i te
taata ia faaineine no te mau taime taa ê e aore ra i te arai i te mau fifi o
te titauhia te tauturu taa ê no ô mai i to tatou Metua Here i te Ao ra.
■ A ani i te tahi nau melo o te piha haapiiraa ia faaite poto noa mai i ta
ratou faaohiparaa i te horo‘araa te mau haamaitairaa metua tane e te
tahi atu mau haamaitairaa no te arata‘iraa e no te tamahanahana.
Te Mau Haamo‘araa i te Mau Menema
Na te hoê melo e mau nei i te Autahu‘araa a Melehizedeka e rave i te
mau haamo‘araa menema. I roto i te pure haamo‘araa te vai nei te mau
parau no te tamahanahana i te utuafare no te taata pohe, ia ani i te
parururaa taa ê no te menema, tae noa’tu i te tahi atu mau haamaitairaa
ia au i ta te Varua e arata‘i mai.
Opaniraa
Ua horo‘a mai te Metua Here i te Ao ra i te mau oro‘a o te autahu‘araa
no te haamaitai ia tatou. E apeehia teie mau oro‘a i te mana varua puai
o te tauturu ia tatou ia faariro ia tatou mai te Metua Here i te Ao ra e ia
faaineine no te ho‘i Ia’na ra.
No te faariihia i te Atua, e mea titauhia teie mau oro‘a ia ravehia na
roto i te mana o te autahu‘araa i faati‘ahia. Ua parau te peresideni
Lorenzo Snow: « Hoê ana‘e iho raveraa e na reira te faateiteiraa e te
hanahana e paruruhia ai. Titauhia tatou ia bapetizohia no te faaoreraa i
te mau hara e te tuuraa rima i ni‘a ia tatou no te faarii i te Varua Maitai.
Teie mau oro‘a e te tahi atu mau oro‘a, e mea titau-roa-hia ïa no te
faateiteiraa e no te hanahana » (Millennial Star, 27 tiunu 1895, 405).
E mea ti‘a ia haamana‘o noa tatou e te mau haamaitairaa i fafauhia
ua tu‘atihia ïa i te tahi noa’tu oro‘a o te ravehia na roto i te oraraa
parauti‘a.
Te titauraa
A rave i te mau faanahonahoraa papû no te faarii i te taato‘araa o
te mau oro‘a o te titauhia no te faateiteiraa. A ora tiamâ no te faatere i
te mau oro‘a o te autahu‘araa no vetahi ê. Faanahonaho no te faariro i
te mau oro‘a ato‘a ei mea mo‘a no te mau melo o to outou utuafare.
41