TE MAU OHIPA E TE MAU HAAMAITAIRAA O TE AUTAHU'ARAA

Haapiiraa 18
A Haapii i te Mau Tamarii i te Mau Parau Tumu o te Evanelia
Ua parau te peresideni N. Eldon Tanner : « E ti‘a atoa i te mau metua ia
haapii na mua roa i ta ratou mau tamarii i roto i te oraraa i te mana‘o
hanahana e te tupuraa e, e mau tamarii varua ratou na te Atua, e [oia
ho‘i] te ma’itiraa ia pee i te mau haapiiraa a Iesu Mesia, o te rave‘a
ana‘e ïa no te popou i te manuïaraa e te oaoaraa i ô nei e te oraraa
mure ore no amuri atu. E ti‘a roa ia haapiihia ratou e, te vai mau nei
Satane e, e faaohipa oia i te mau piha ohipa atoa e vai i mua ia’na no te
faahema ia ratou ia rave i te hape, no te [tamata] ia arata’i ia ratou ia
atea ê, ia faariro ia ratou ei feia-faatitihia na’na, e ia tape‘a ia ratou i [te]
oaoa teitei e te faateiteiraa ta ratou e nehenehe e popou » (Seek Ye First
The Kingdom of God A Imi Na Mua i te Basileia o te Atua], 87).
Mai te mea e hinaaro tatou ia haapii i ta tatou mau tamarii i te mau
parau mau o te evanelia, e ti‘a roa atoa ïa ia haamau i te mau hi‘oraa
tano no ta tatou mau tamarii no te pee mai. Mai te mea, e ore tatou e
tape‘a i to tatou mau hiaai e mau hinaaro, eita e nehenehe ia tatou ia
titau i ta tatou mau tamarii ia tape‘a i to ratou iho.
A Horo‘a i te Hopoi‘a i te Mau Tamarii
Ua parau o Elder L. Tom Perry : « E ti‘a roa ia ... papû tatou e, e mea
afaro roa ta tatou haapiiraa e ua tuu tatou i te hoê faaroo e te ti‘aturi i
te Fatu i roto i te oraraa o [ta tatou mau tamarii]. E ti‘a roa ia papû
tatou e, ua haapii maitaihia ratou, e a haamata ai ratou i te paari i te
pae varua, e titauhia ïa ia tatou ia horo‘a no ratou te mau rave‘a fana‘o
no te faaite i te puai o te tupu nei i roto ia ratou. E titauhia ia tatou ia
horo‘a ia ratou to tatou faaroo e te ti‘aturiraa e i muri iho ia horo‘a
te hopoi‘a ia ratou ra » (i roto Conference Report, Sao Paulo Area
Conference 1975, 12).
E rave rahi rave‘a no te haapii i te hopoi‘a i te mau tamarii. Ua horo‘a o
Elder F. Enzio Busche hoê hi‘oraa :
« Te tamata nei tatou i te arata’i i ta tatou mau tamarii i te faatura ia’na
iho... e i te pae rahi ra, ia vaiiho ia ratou ia haava ia ratou iho. Ua ite mai
tatou i te ohipa i tupu oia ho‘i, aita te hoê taata e maitai atu i te hoê
orometua haapii ia ite ana‘e te hoê taata e a faaite mai ai i te mau hape... i
ta te hoê taata e tauturu i te hoê tamarii ia ite oia no’na iho e, te rave nei
oia i te hape. Ia nehenehe ana‘e te tamarii ia maramarama i ta’na mau
hape ona iho, te taahiraa matamua ia taui, ua rave a‘ena-hia ïa.
« Te haamana‘o nei au i te hoê taime, nahea to maua aniraa i ta maua
tamaiti, i muri a‘e i te hoê ofatiraa ture, ia haamau oia i ta’na iho
faautu‘araa. Ua faaoti oia, eiaha oia ia faati‘ahia ia hi‘o i te afata teata
no te hoê ava‘e. E au ra ia maua e, ua eta‘eta roa raua, area râ, eaha to
maua oaoa i te faarooraa mai roto mai i to’na mama ruau oia ho‘i,
186