TE MAU OHIPA E TE MAU HAAMAITAIRAA O TE AUTAHU'ARAA

Haapiiraa 4
Te Horo‘araa i te Autahu‘araa a Melehizedeka
■ Faaite i te hoho‘a 4-c, « No te faateiteiraa, e mea titauhia i te taata ia
faarii i te Autahu‘araa a Melehizedeka. »
E mea ti‘a ia horo‘ahia te Autahu‘araa a Melehizedeka i te mau melo
taea‘e taata paari tiamâ o te Ekalesia e ia faatoro‘ahia ratou i te hoê
ti‘araa i roto i taua autahu‘araa ra. Na teie autahu‘araa e faati‘a i te hoê
taata ia faarii i te mana e te faati‘araa mana a te Atua. Na roto i teie
mana, e faati‘ahia oia ia rave i te mau oro‘a no te faaoraraa no te tahi
atu mau taata, no te taata ora e te taata pohe.
Noa’tu e aita te mau vahine e faarii i te autahu‘araa, e hamaitaihia
ratou no te reira na roto e rave rahi mau faanahoraa. Na roto i te mau
taea‘e tiamâ mau i te autahu‘araa, e faarii te mau vahine i te mau oro‘a
o te evanelia, o te titauhia no te faateiteiraa. Te mau haamaitairaa o te
tae i roto i te hoê utuafare ia faaohipa ana‘e te hoê taata i to’na autahu‘araa
e faarii ïa te hoa faaipoipo i te reira mai ta’na ato‘a ra e faarii.
Penei a‘e te mea faufaa roa ta te hoê vahine e nehenehe e rave i roto i
te mau haamaitairaa o te autahu‘araa maoti râ na roto i te faariiraa oia
i to’na oro‘a hiero e i te faaipoiporaa i roto i te hiero.
Te oro‘a Hiero
■ Faaite i te hoho‘a 4-d, « E tae mai te faateiteiraa na roto i te mau oro‘a
hiero. »
E oro‘a mo‘a te oro‘a hiero i roto ana‘e i te hiero e ravehia ai te reira. Ua
parau te peresideni Brigham Young, « To outou oro‘a, o te faariiraa ïa i
te mau oro‘a i roto i te Fare o te Fatu, e mea titauhia te reira no outou,
i muri a‘e i to outou faarevaraa mai teie nei atu oraraa, na te reira e
faahaere ia outou i mua i te aro o te Metua, te haereraa na mua atu i te
mau melahi o te ti‘a ra ei mau tia‘i, e te neheneheraa ia tatou i te horo‘a
i te mau parau taviri, te mau tapa‘o e te mau tokene, no te Autahu‘araa
Mo‘a, e ia roaa to outou faateiteiraa mure ore tei hau atu i te fenua nei e
i hade » (iroto i te Journal of Discourses, 2:31).
E rave rahi te mau mea te haapiihia ia tatou i roto i te oro‘a hiero, e mau
mea ïa tei titauhia ia tatou ia ite e ia rave no te ho‘iraa i pihaiiho i to
tatou Metua i te Ao ra. I roto i te oro‘a hiero e fafau atoa tatou i te Fatu e,
e haapa‘o tatou i te mau ture no te tusia e no te viivii ore e ia horo‘a atoa
i ta tatou mau tao‘a atoa no te tauturu i Ta’na ohipa. No te mo‘a ho‘i teie
nei mau fafauraa, no reira, e horo‘ahia te oro‘a hiero ia tatou nei mai te
mea e, ua itehia to tatou itoito i te haapa‘oraa i te mau faaueraa a te
Metua i te Ao ra. No te faahaamana‘o ia tatou i teie nei mau fafauraa,
ua horo‘ahia mai ia tatou te ahu mo‘a o te hiero o ta tatou e oomo.
■ Mea nahea te faariiraa i teie oro‘a e tauturu ai ia tatou ia ho‘i i to
tatou Metua Here i te Ao ra ?
34