TE MAU OHIPA E TE MAU HAAMAITAIRAA O TE AUTAHU'ARAA

TE TI‘AMÂRAA:
E HORO‘A NO Ô MAI
I TE ATUA
Haapiiraa 28
Te tumu o teie haapiiraa no te tauturu ïa ia tatou ia taa maitai a‘e i te
parau tumu no te ti‘amâraa e ia haapii tatou i te faufaa no te raveraa i
te mau ma’itiraa paari.
Te Omuaraa
Iakoba, te taea‘e o Nephi, tei faaite i roto i te Buka a Moromona,
« E tena na, ia oaoa to outou aau, e e haamana‘o e, e mea tiamâ outou
ia rave noa’tu i tei au i to outou hinaaro–ia rave i te e’a o te pohe mure
ore, e aore râ, i te e’a o te ora mure ore » (2 Nephi 10:23).
Eaha te horo‘a ia tatou i te mana no te raveraa i te mau faaotiraa ?
No te aha, ei hi‘oraa, i faaoti ai tatou ia bapetizohia ? E aore râ, no te
aha tatou e nehenehe ai ia faaoti eaha te mau ahu e oomo, eaha te fare
haapiiraa te haere atu, e aore râ eaha te ohipa no te tapapa atu ?
Te pahonoraa o teie ïa oia hoi, ua horo‘ahia ia tatou te hoê horo‘a no ô
mai i te Atua ra tei parauhia te ti‘amâraa. Teie horo‘a o te mana ïa no
te raveraa i te mau ma’itiraa. Te ma’itiraa faufaa roa‘e ta tatou e ti‘a
ia rave, te hoê ma’itiraa i faati‘ahia na roto i te Taraehara o te Faaora,
no ni‘a ïa i te ora mure. Mai te mea e ma’iti tatou ia pee i te Fatu, e
haamaitai Oia ia tatou e e haapii ia tatou nahea ia faaohipa i to tatou
ti‘amâraa ia riro mai te Atua te huru e ia noaa te faaoraraa mure ore.
Ua faataa o Lehi i te ti‘amâraa i ta’na tamaiti Iakoba: « No reira, e mea
tiamâ te mau taata... ia rave i te tiamâ e te ora mure ore, na roto i te
Arai rahi o te taata atoa, e ia imi i te tîtîraa e te pohe, mai te au i te
tîtîraa e te mana o te diabolo » (2 Nephi 2:27).
Te Ti‘amâraa: E Ture Mure Ore
Te ti‘amâraa e ture mure ore ïa. A parau ai no to tatou ti‘amâraa, ua
haapii te Peresideni Brigham Young,: « E ture teie o tei vai tamau noa
na mai te ao mure ore atoa mai â, e e tamau noa i te vai mai na roto atu
i te mau ao mure ore atoa e tae mai nei. E ti‘a roa i te taata maramarama
atoa ia farii i te mana no te ma’iti » (Discourses of Brigham Young,
mai te au ia John A. Widtsoe [1954], 62).
267