TE MAU OHIPA E TE MAU HAAMAITAIRAA O TE AUTAHU'ARAA

Haapiiraa 23
Te Arata’iraa i te Mau Putuputuraa Maitai Roa
No te maitai-roa-raa, e ti‘a i te mau putuputuraa ia faaoti roa i te hoê
tumu i faataahia. E ti‘a i te mau taata faatere ia arata’i i te mau putuputuraa
ma te nahonaho e te hanahana, ia faaitoito i te faaohiparaa mai
roto mai ia ratou o te tae mai, e ia horo‘a i te hi‘opo‘araa e te peeraa na
roto i te ohipa.
Te Opuaraa [Faanahoraa] Ohipa
E maitai roa te hoê putuputuraa ia tupu ana‘e e ia faaotihia te tumu no
te reira. E titau te reira i te opuaraa ohipa na mua roa.
Hoê tautururaa faufaa i roto i te opuaraa ohipa o te hoê talena ïa. Hoê
talena o te hoê ïa tabula no te mau mea e ravehia i roto i te putuputuraa
e no ratou o te ti‘a ia ohipa atu. E faati‘a te mau talena i te mau putuputuraa
ia faaitehia ma te maramarama e ma te maitai roa. No te hamaniraa
i te hoê talena, e ti‘a roa ia feruri maitai eaha ta tatou e hinaaro nei
ia faaoti roa e i muri iho ia papa‘i i taua mau tumu parau ra i raro na
roto i te panahoraa no te faufaaraa ia nehenehe ia ferurihia na mua te
mau ohipa faufaa roa‘e.
■ Eaha ta tatou e nehenehe e faaô mai i roto i te hoê talena ? (A tabula i te
mau horo‘araa mana‘o i ni‘a i te tabula papa‘iraa. Hoê hi‘oraa no te hoê
talena no te pô pureraa utuafare te vai nei i te hope‘a o teie haapiiraa).
E nehenehe ia faatupu i te hoê putuputuraa poto noa hou te tahi atu
mau putuputuraa mai te pureraa oro‘a e te bapetizoraa. I roto i te reira,
e hi‘o-faahou-hia te talena e ratou o te ohipa nei e, e nehenehe ia
pûpûhia hoê pure no te ani i te arata’iraa o te Varua.
Te parau nei te Fatu ia tatou, « Ua horoa-noa-hia ïa i te mau peresibutero
no ta‘u nei ekalesia mai te matamua mai â, e e na reira-noa-hia ia
faatere i te mau putuputuraa mai te au i tei haapiihia e tei arata‘ihia e
te Varua Mo‘a ra » (PH&PF 46:2). Ia pure ana‘e tatou no te farii i te
Varua Maitai i roto i ta tatou mau putuputuraa e i muri iho a ohipa ai
mai te au i te reira, e parahi mai te Varua Maitai e e tauturu ia tatou ia
faaoti roa i te tumu no te putuputuraa. Ua papa‘i o Moroni no te mau
Ati Nephi, « E ua faaterehia ta ratou mau pureraa e te ekalesia mai te
au i te raveraa a te Varua, e na roto ho‘i i te mana o te Varua Maitai ra;
e ia arata‘ihia ho‘i ratou e te mana o te Varua Maitai ia parau, e ia a‘o,
e ia pure, e ia ani, e ia himene ho‘i, e ua na reirahia ïa » (Moroni 6:9).
E tae mai teie faaururaa rahi na mua i te putuputuraa a faaineine ai
tatou i te hoê talena na roto i te pure.
Te Nahonaho e te Hanahana
Ia arata’i ana‘e tatou i te mau putuputuraa, e ti‘a ia haamau i te hoê
hi‘oraa tano na roto i te mâraa, te faaneheneheraa, e te ahu tano maitai.
E ti‘a ia haapae i te parau titau-ore-hia e ia tape‘a ia vai hanahanaraa.
227