ud#44 (25854)

udmdunne.ru
+7 951 195 37 65
ЛЫДӞИСЬКОН СИГ
№44 (25854)
2020-тӥ ар 12-тӥ шуркынмон 27
дӥсьтод Раков сярысь, Зангари
сярысь. Собранилэн председателез
мырдэм быгатӥз лӧптэм
мылкыдъёсты зӥбломытыны.
Петин йыгмыт адями ке но,
али со возькыны ӧз быгаты ни.
Мар малпа, кызьы вала Раков
сярысь, ваньзэ верамез потӥз,
соин ик мултэс пӧсекъяны кутскиз.
Романов учке со шоры но
пайме — мар луиз соин? Ноку
но сыӵе керӟег ӧй вал кадь ук
со. Петин вераку, со репликаос
сётъяз но озьы ӟырдыт
сямзэ ӧжыт ке но сӥятӥз. Романовлэн
репликаосысьтыз
Петин мургес кадь валаны
кутскиз Раковлэсь зэмос пуштроссэ,
мургес шӧдӥз солэсь
мукет идейной сюрес вылэ
султэмзэ, умойгес валаз кадь
быдэс тусбуйзэ. Петинлэн Романовез
гажан мылкыдыз но
уката юнмаз: Романов туж
умой валаны быгатэм Раковлэсь
быдэс пуштроссэ.
— Раков литература удысын
умойтэм сюрес вылэ султэм
шуиськод, — Романов
учке Петин шоры. — Со озьы,
шуом. Нош малы, Максим Николаевич,
солэн сямыз сярысь
вераськон поттӥд? Кытысь
тодӥд, со директор интые пуксьыны
малпа шуыса?
— Солэн аслаз ужасьёсыз
пӧлын сыӵе мылкыд
пыӵатыны тыршемысьтыз, —
шуиз Петин.
— Со юнме супыльтон, Романов
эш! — ӧз чидаРаков.
— Петин шонер вера. Зэм,
сыӵе лушкем вераськон вал
берло дыре, — кылӥськиз залысь
куара.
— Я, эн люкетэ, мон йылпумъясько
ни веранме, — шуиз
Петин. Собере, Романов но Раков
шоры учкылыса, вераз на:
— Зот Мироныч вань ужзэ
ӧръяны тырше аслыз гинэ
пайда поттон понна. Огъя
ужмы солы сокем кулэ ик
ӧвӧл. Аслыз гинэ умой мед
луоз. Со ласянь ик учконо солэсь
директор луыны мылкыд
каремзэ но. Соин ик ас сюрес
вылысьтыз могӟетъёсты шӧдэ
ке, сое палэнтон понна нокинэ
но, номыре но уз жаля.
Аслаз дан басьтэм нимыныз
со котькинэ сузмытыны дась.
Озьы ик мон учкисько, эшъёс,
солэсь Пётр Петрович но мон
вылэ урдскемзэ.
Песьтэров татчыозь шыпыт
пукиз, нош Петинлэн
озьы меӵак вераськемез бере
чидамез ӧз луы ни, шӧдске. Со
председательлэсь кыл куриз.
— Таӵе ответственной партийной
собраниын тӥ, Петин
эш, умой-умой малпаськытэк
вераськиськоды. Зот Мироныч
мынам уже пумысен, зэм но,
оло, кинэн ке вераськиз. Со мукет
ужпум. Нош директор кин
луоз, созэ ини обком вералоз.
Тӥ, Максим Николаевич, кызьы
шуоно ай, Зот Миронычез
юнме сокем урод кариськоды.
Пётр Петровичен тӥ асьтэос
адямилэсь сюлэмзэ валаны уд
быгатӥське.
Песьтэров бере нош ик вераськиз
Кедров. Вакчияк веранзэ
со тазьы йылпумъяз:
— Адями юись-а, лушкаськись-а
луэ, мар ке йыртэман
ужъёс-а лэсьтэ — со
ваньмызлы кадь ик валамон,
сое адӟыны быгато. Нош Раков
кадь адямиос син азьын
уг йыртэмало, соос ужазы
пӧртэм сузьет чильтэрало но
лыдӟисьлэсь йырвизьзэ суранэ
кыско. Мур малпатэк, историез
умой-умой тодытэк учконо
ке, ваньмыз шонер кадь.
Уж вылын мар луэ? Раковлэн
вань пазяськонэз, солэсь ужъёссэ
критиковать карисьёсты
нушыен пумитамез потэ
диссертациез пӧрмымтэен,
ӝужытгес пукон вылэ пуксьыны
малпамезлэн куашкамез
бордысь. Мон озьы малпасько.
Со умойтэм ке, монэ
тупатэ, Романов эш.
— Мон сямен, Пётр Петрович,
— шуиз Романов, — литературной
ужын идейность
сярысь сюлмаськонэз кулэтэм
каремен яке вунэтэмен, со
озьы луэ.
— Эн люкетэ докладчиклы!
— кылӥськизы залысь куараос.
Отӥяз аслэсьтыз йылпумъянъёссэ
юнматон понна Пётр
Петрович лыдӟиз данак документъёс
— революция аръёсы
потэм газетъёсысь но книгаосысь
выдержкаосты.
Кедров верамысь дугдэм
бере залын огыр-бугыр
луиз, нюлэскын тӧласькем
кадь ӵаш-ш куашетэ, номырзэ
уд вала. Троссэ тужгес но
паймытӥз Кедровлэн газетъёсысь
лыдӟемез, соос угось сое
нырысьсэ кыло. Петинлэн статьяяз
со материалъёс сярысь
верамын ке но, одӥг статьяын
трос ик уд гожты ук. Собраниын
пукисьёс тросэз Раков пала
учкыны кутскизы — мар, пе,
шуоз ни дано учёноймы.
— Кыл сётоно Зот Миронычлы,
Раковлы! — кылӥськизы
куараос.
— Раков эш, — шуиз председатель,
— тӥ куара поттылӥды
вал, вералэ, тӥлед кыл сётӥське.
Зот Миронович, трибуна
доры мыныкуз, зӧк стеклоё очкиез
пыр сюрессэ мырдэм адӟе
кадь, соин ик юн губырскемын.
Тани со трибуна доры вуиз,
очкизэ носовикеныз зыраз но,
нокин шоры учкытэк, жадем
тусын кутскиз:
— Докладчик мыным оломае
но инкриминировать карыны
турттэ, кыӵе ке чакмем
гердъёс сярысь иллюзорной
резюмеос лэсьтэ. Мон татын
судын ӧвӧл, Кедровлэн докладэз
но мукетъёсызлэн солы
юрттӥсьёслэн мыным но Иван
Захаровичлы пумит верамъёссы
инсинуация луо. Возьытсэс
ыштэм адямиос озьы верасько.
Нокыӵе герд мы, союзмы милям
Песьтэровен ӧвӧл. Иван
Захарович мыным родня но,
вармай но ӧвӧл. Ми соин огкылысь
ке, со огъя научной
интересмы бордысь потэ, ми
наукаын Петин кадь авантюристъёслы
пумит. Нош солы
Романов но юрттыны кутске
бере, мон нош ик ЦК-е гожтоно
луо.
Залын нош ик куаш вазьыны
кутскиз.
Институтын ужасьёс то до
вал ни Раковлэсь азьвыл чагиськонъёсаз
научной ужасьёсты
но, куд-ог мукетъёссэ но
юнме шорысь сантэмамзэ, клеветать
каремзэ. Соин ик вожпотон
куараос кылӥськизы.
Собраниын Кедровлэсь докладзэ
умоен лыдъязы, Раковлы
но Песьтэровлы лек кыл
веразы, асьсэлэсь политиказэс
но со бордысь потӥсь ужъёссэс
шонертыны косӥзы. Решениез
ӧз ке быдэстэ, та ужпумез
партсобраниын выльысь эскерозы.
Собраниын пукисьёс шо ры
учкыса, шӧдӥське вал, Кедровлэсь
верамзэ но Романовлэсь
репликазэ тросэз ӟечкыласа
пумитазы. Нош Песьтэровлэн
но Раковлэн сюлэмъёссы
уката зубектыны кутскизы.
Тужгес но Раковлэн. Со угось
партийной собранилэсь азьло
туж тыршиз вал вераськыны
нимаз-нимаз адямиосын. Оске
вал, Петинлы дурбасьтӥсьёс
ог кык-куинь адями гинэ луоз
шуыса. Конов берло дыре Зот
Мироновичен сӥялэсгес вераськыны
кутскиз. Озьы но
Раков оске вал солы. Нош али
шӧдӥз Коновлэсь со бордысь
палэнскемзэ. Угось собраниын
ортчем тэкшеронъёсты йылпумъяса,
со меӵак вераз:
— Романов эшлэсь, Кедровлэсь
но Петинлэсь верамъёссэс
лыдэ басьтытэк кельтыны уг
луы. Таӵе секыт ужрадысь потон
понна соос шонер сюрес
возьмато. Партийной организация
кулэ выводъёс лэсьтоз.
Собрание бере Коновлэн
тодаз лыктӥз Кедровен азьло
вераськемзы, Раковлэн данэзлы
кыл вератэк оскемез.
Нош табере? Та ужез Раковлэсь
чагиськонъёссэ партийной
органын но умой-умой
эскерем бере валамон луиз
ни. Куд-огез собрание дыръя
но Раковез партиысь куштыны
ӵекто вал. Мар кароно
азьланьын, тодмо луоз со бордысь,
кызьы Раков ассэ возёз.
Тани табере Конов но Раков
шоры мукетгес синмын учкыны
кутскиз. Солы Зот Мироновичлэн
выросъёсыз но
мукетгес адскыны ӧдъязы.
Конов сакгес кылзэ ни Раковлэсь
верамъёссэ но. Со малпа
— Раковлэн зэмос коммунист
шӧмыз вань-а? Солэн вань
ужез — ас улонзэ данъян но
умоятон понна гинэ уг луы-а?
Тӥни ук, пумитаз маке верало
ке, со, Раков, дась луэ ни сыӵе
адямиез шлачкытыса пыд
йылысьтыз погыртыны. Сыӵе
сямызлэсь ик директор но
кышка, дыр. Соин со Раковлы
юрттыны ялан тыршиз.
Адӟом ни, кыӵе сямзэс собрание
бере возьматозы Песьтэров
но Раков. Сыӵе малпанъёсын
гуртаз бертӥз Конов.
* * *
Гужем куазь шулдыр улэ.
Песьтэров, сӥзьыл пал отпуск
басьтыса, лымшор пала курортэ
ветлыны малпа вал. Со озьы
арлы быдэ ветлылӥз. Нош туэ
мар карыны уг вала. Курорт сярысь
малпанэз но тӧлӟиз.
Алигес гинэ соослэсь ужзэс
обкомын эскеризы. Иван Захаровичлы
но Зот Мироновичлы
ваньмыз ужпум витёнтэм шорысь
берытскиз. Соос малпало
вал обкомын соосты пыкылозы
ик егит научной ужасьёсын
тупаны быгатымтэзы понна,
куд-ог научной ужъёсын но
статьяосын умойтэм малпан
сётӥсь формулировкаос понна.
Соос угось оскытыны тыршизы,
историез кырыжатыса
возьматӥсь ужъёсазы куд-ог
формулировкаос гинэ мыдлань
малпан кылдытыны быгато
шуыса. Югдур соослэн
тыршемзыя ӧз луы.
Обкоме ӧтьылэмзы бере
кӧня ке нунал ӵоже соослэн куспазы
вераськемзы но уг поты
вал. Юнме шорысь егит визьем
юмал Петинэн сэрен гинэ со
уж озьы йылпумъяськиз шуыса,
туж юн обидизы кадь потэ
вал соослы.
Ог арня ёрос ортчыса, суббота
ӝытэ, Раков ӧз чида ни,
Песьтэровъёс доры мынӥз.
Куазь туж шуныт вал но, Зот
Миронович юн пӧсям, корка
пыремез бере, нырул кышетсэ
кисыысьтыз куалекъясь
киыныз кыскыса, ну зыра ук
зӧк стеклоё очкизэ но гольык
мычем йырзэ. Ачиз пуш-паш
шока, бызьыса лыктэм кожалод.
Иван Захарович уг витьы
вал Раковез. Озьы ке но йырыз
кур ӧз луы. Аслаз но мылкыдыз
берло нуналъёсы вуёмемын.
Соин ик Песьтэров ас
понназ шумпотӥз Зотлэн лыктэмезлы.
Котькыӵе мед луоз
Раковлэн янгышез, но соос
одӥг пуньыен сиыса улӥсьёс
кадесь ук. Огзытэк огзы улыны
ик уз быгатэ кадь.
Раков пырем бере Песьтэров
паймем тусын юаз:
— Мар таӵе? Кин ке уйиськиз
шат?
— Ой, туж пӧсяй. Сёт-ай
азьло мургес шокчыны...
— Шока, шока! Милям татын
омыр чылкыт...
— Иван Захарович, мон
сьӧры со пинал «учёноед»
вуэм дырысен ялан уйисько
— нуназе но, уйин но. Малызэ
тон ачид валаськод... Нош тон
сьӧры уг-а уйисько?
— Мон уйвӧтъёслы уг
оскиськы. Учёной ужъёсы но
тынад мында ӧвӧл. Соин ик
капчигес шокасько, дыр, —
шуиз Песьтэров, сӧриськем
мылкыдзэ ватыны тыршыса.
— Я бен, витёнтэм шорысь мар
муг усиз? Тон тазьы тур-пар уд
вуылӥськы вал мон доры.
Зэм, Раков азьвыл но уно
пол вуылӥз Песьтэров доры.
Нош таӵе керӟег тусын нырысьсэ
пыриз.
— Вераськеме потэ. Мар
тон малпаськод ни, мар луоз
асьмемын? — мур шокчиз
Зот Миронович. Собере Иван
Захарович шоры синъёссэ
мертчытӥз но валаз кадь:
Песьтэровлэн мылкыдыз
зӥбломем, небыт тусын учке.
Озьы бере, солэсь сюлэмзэ
усьтоно ни, вань мылкыдзэ со
меӵак вералоз.
— Мар бен, Мироныч, сокем
вераськемед потыны кутскиз?
Асьме куспын ваньмыз
верамын ини, — зӥбыт куараен
пумитаз вазиз Песьтэров.
— Я, зӥб-зӥб пук ай, маке
тон тодмантэм луид. Сокем
кышкад-а, мар-а? Аслыд уд
кельшиськы... Котмем курег
кадь.
— Озьы веранъяз Иван Захарович
ӝӧк вылэ сиён октыны
кутскиз. Раков азе вуизы
бутылка тӧдьыез, кык пичи
стакан, нянь, колбаса но холодильникысь
сылалтэм огреч.
— Нош кузпалыд кытын? —
юаз Зот Миронович.
— Маке туж керӟегъяськыса
пыраз нылмы, Аня. Анайзэ
сьӧраз нуиз... Асьмелы сотэк
умойгес луоз, кышное ваньзэ
ӧз ке но тоды, яралоз.
— Песьтэровлэн маке тодаз
лыктӥз кадь, юн малпаськиз
но, мур шокчыса, вераны кутскиз:
— Тон, Зот Мироныч, кызьы
шуоно ай, валаськод-а,
кыӵе югдуре асьмеос шедим?
Мон тыныд ялан оскыса
улӥ, тон кадь трос но мур
нокин но уг тоды кожасько
вал. Нырысь пал тросэз тынад
ымад гинэ учко вал, тыныд
дурбасьтылӥзы. Нош табере
мар луиз?.. Тынад но, мынам
но партийной билетмы вань.
Коммунистъёсмы ваньмыз
сямен тон бордысь палэнско,
лэся, сое шӧдӥськод-а? Асьмеос
кык кузя котмем курегъёс
кадь кылиськом.
— Берло дыре луэм ужъёсты
тодаз вайыса, Песьтэров
верамезъя ӟырданы кутскиз.
Ӝӧк сьӧрысь султӥз но, пӧсям
гольык кымессэ дышем сяменыз
носовикеныз ялан
ӵушалляса, мыд-мыдлань ветлыны
кутскиз.
________
Азьланьтонэз вуоно номерын.