ud#44 (25854)

udmdunne.ru
+7 951 195 37 65
УДМУРТИЕЗ АЗИНТОН
№44 (25854)
2020-тӥ ар 12-тӥ шуркынмон 7
Шоркар
Кызьы чылкытато вуэз?
Ижын ву гумыос 65
процентлы уродмемын.
Лыдпус 70 процентозь
вуиз ке, 2016-тӥ арын
кадь кышкыт югдур
кылдыны быгатоз.
Алигес Иж город Думаысь
депутатъёс огкылэ вуизы: вуоно
арын июль толэзьысен
ЖКХ понна тыриськонъёсты
будэтоно. Озьы йылозы кезьыт
вулы, водоотведенилы
дунъёс, тужгес троссэ — 9,5
процентлы. Йылтэм тарифъёс
чотын люкаськись уксё кошкоз
шоркарлэсь ву нуон-сётон
системазэ — та понна кыл
кутӥсь «Ижводоканал» огазеяськонэз
— выльдыны.
Та компания ву вуттэ
Ижысь 600 сюрс пала адямиослы.
Солэн бурд улаз пырись
«Пруд Ижевск» станция интыяськемын
Иж тымет дурын
— Киров парклы но зоопарклы
матын. Кыдёкын ик ӧвӧл
улон юртъёс сыло, мынӥсьветлӥсьёс
татын уг бырыло.
Нош станциын вуэз чылкытато
на азьвыл сямен — хлорен.
Утиське со 800 литръем
цистернаосын: соосты станцие
вуттонэз чаклало кышкыт
учыръёслэсь утиськонъя службаос.
Цистерна марысь-мар
пуштӥз ке, хлор 250 метрлэсь
ятырлы вӧлскоз, та котырысь
вань лулозэ быдтоз. Нош кышкытлык
бадӟым: гумыос сисьмемын-сыномемын,
эшшо ке
хлор вужмем станциын утиське
— пуктэмын ай со 1964-тӥ
арын. Станция кулэяське выль
юртлы, угось матысь аръёсы
вуэз выль амалэн чылкытатыны
чаклало.
«Ижводоканаллэн» диспетчерскояз котьку сак уло.
— Контейнеръёсын хлор ву
кадь кизер, ми уже кутӥськомы
солэн йылаз кылдӥсь газэз.
Иж тыметысь басьтэм вуэз
соин чылкытатӥськомы но
юртъёсы келяськомы, — шуэ
«Пруд Ижевск» станциысь
вуэз чылкытатонъя цехлэн
кивалтӥсез Андрей Трефилов.
— Но унояз улосъёсын хлорлэсь
куштӥсько ни. Куто лякытгес
веществоез — хлорлэсь
гипохлорит суретсэ. Таиз калыклы
кышкытлык уг кылдыты.
Омыре потӥз ке но, станцилэсь
палэнэ уз вӧлмы.
«Ижводоканал» огазеяськонлэн
валтӥсь инженерез
Владислав Катаев ивортэмъя,
банкъёсысь пунэмаськыса,
соос туэ ик тупатъян ужъёс
борды кутскизы. Гумыос но
ву сётонэн герӟаськем сооружениос
ог 200 миллион манет
тыр выльдэмын.
— Вуоно арын йылтэм тарифъёс
чотын люкаськись
коньдонэн «Пруд Ижевск»
станцилы выль юрт пуктыны
кутскомы, отын вуэз
выль амалэн чылкытатом
— хлорлэн гипохлорит суретэныз.
Ваньзэ-ӧвӧлзэ та
выльдӥськонлы ог 3 ар кулэ
луоз. Со сяна, вуоно арын ик
вуэз химия суретъёстэк чылкытатонъя
проект кылдытон
борды басьтӥськомы. Вань та
ужъёслы кулэ луоз 500 миллион
манет пала, — шуиз
В. Катаев.
Выльдӥськон дыръя бадӟым
саклык висъяськоз вуэз
фильтръёс пыр сӥсъянлы —
огазеяськонлэн та тӥрлыкез
но туала куронъёсъя радъямын
луоз.
— Вуэз кырсьлэсь сузян
понна уже кутӥськом коагулянтъёсты.
Соос кырсь борды
Туспуктӥз Максим ЕГОРОВ
лякисько, огазеяськыса мамык
кылдыто но ву пыдсы
пуксё, собере сӥс борды чукаса
кылё, — веранзэ азьланьтэ
«Пруд Ижевск» станциысь
вуэз чылкытатонъя цехлэн
кивалтӥсез А. Трефилов. — Та
вакытэ «Пруд Ижевск» станциямы
ву сузянлы висъямын
2 зал: одӥгез 1964-тӥ арын
ӝутэмын ке, кыкетӥез — 10
арлы бергес. Кыкетӥяз ваньмыз
лэсьтӥське ке автоматъёс
пыр, нырысетӥяз уж радъямын
киын. Кӧня коагулянт
ватсано бассейнэ, ку вузэ лэзёно
яке тырмытоно, ку миськоно
созэ я тазэ тӥрлыкез —
ужасьёсмы сак чакласа возё.
Таяз но автоматъёс пуктылэмын
луизы ке, уж капчиялоз,
ву чылкытгес луоз.
________
Елена НИКИТИНА
1 пуконэ 7 кузя
7 мурт мылкыд кариз
Ижлэн йырыз
луон понна нюръяськыны.
Город администрацилэн
пресс-службаез ивортэмъя,
13-тӥ ноябрёзь
кандидатъёс асьсэлэсь
программаоссэс шараялозы.
20-тӥ ноябре соосты
кылзоз но дунъялоз
нимысьтыз быръем
комиссия.
Кандидатъёс пӧлын
«Буммаш» завод»
огазеяськонысь менеджер
Олег Овчинников,
ужбергатӥсь Рамиль
Ямалов, «Юный динамовец»
спортшколалэн
директорез Андрей
Васюков, Ижысь 28
номеро школалэн
кивалтӥсез Елена
Варламова, Ижлэн та
дырлы йырыз Олег
Бекмеметьев, Ижысь
чугун сюрес транспортъя
предприятиысь
мастер Станислав
Ковальский но Дэри
ёрос администрациысь
экономикая управленилэн
кивалтӥсез Евгений
Леонтьев.
Шоркарлэн йырыз
луыны малпасьёс
асьсэ программаосынызы
вераськозы город
Думаысь депутатъёс
азьын. Кандидатъёсты
дунъялозы комиссилэн
ёзчиосыз. Соос 12 кузя:
6-сэ юнматӥз Удмуртилэн
Тӧроез, 6-сэ — город
Дума.
_______
Сергей ЗАХАРОВ
Лулчеберет
Ӵыж-выль клуб
5-тӥ шуркынмонэ Сьӧл та ёросысь Кӧпка
черкогуртын усьтӥськиз культурая выль
юрт.
Юрт пуктэмын «Культура» нацпроект улсын.
Сое ӝутыны кошкиз ог 15 миллион манет,
тросэз коньдон вуиз федерал бюджетысь. Выль
клублэн актовой залаз 100 адямилы пукон инты
чакламын, концертъёс ортчытъяны туала тӥрлык
пуктэмын.
Кӧпкаысь клубын ужасьёс шумпотэмын, угось
кема дыр ӵоже ужано луизы 19-тӥ даурын пуктэм
вуж юртын. Табере ужрадъёссы, пиналъёслы,
егитъёслы но арлыдоослы чаклам кружокъёссы
югыт но шуныт интыын ортчылозы.
Кӧпкаосты ӟечкыланы вуизы культурая министр
Владимир Соловьёв но ёросысь кивалтӥсьёс.
Корка пырон ортчытыса, клубын ужасьёс дасязы
театрализованной постановка.
Туэ «Культура» нацпроект улсын пуктыны чакламын
вал 3 клуб. 2-ез ӝутскемын ини — Кӧпкаын но
Алнаш ёросысь Асангуртын, усьтӥськыны кулэ на
Яр ёросысь Дизьмино гуртын.
Артистъёс сьӧры
ветлоз камера
Удмуртиысь театральной улонлы сӥзем
видеоархив кылдытон пумысен огкыл
гожтӥзы элькунысьтымы Культурая министерство
но Театрын ужасьёслэн огазеяськонзы.
Видеолетопись кылдытон вылысь техника
басьтэмын луоз, талы Удмуртилэн бюджетысьтыз
200 сюрс манет висъямын. Видеое пуктыны чакламын
Удмуртиысь Театрын ужасьёслэн союззылэсь
ужрадъёссэ, кылсярысь, шара лыдӟисьёслэсь «Монолир»
конкурссэс, артистъёс куспын ортчись «Удача
сезона» вожвылъяськонэз, учкисьёсын пумиськонъёсты.
Со сяна, видеоархиве кылёз «Удмуртия театральная»
элькун фестиваль. Со улсын шаерысьтымы
профессиональной театръёс возьматъяло тужгес
усто спектакльёссэс. Кун театръёс сяна, съёмкаосы
пыриськозы самодеятельной коллективъёс, студентъёслэн
но школьникъёслэн студиоссы.
Азьланяз Удмуртиысь театръёс сярысь документальной
фильмъёс кылдытыны чакламын на.
Тӧр шорын —
пу юртъёс
Дэри ёросысь «Лудорвай» музей сярысь
кино возьматӥзы Россиын ортчем «Искусствоослэн
уйзы» акция улсын.
«Лудорвайысь» юртъёс сярысь «Лудорвай —
музей под открытым небом» фильм (режиссёрез
Наталья Ланских) лэсьтэмын «Деревянное кольцо
России» проект улсын. Сое радъя Карелиысь Пу
зодчествоез утёнъя В.С. Рахманов нимо центр.
Проект ортчытӥське Россиысь музей-заповедникъёслэсь
кусыпъёссэс юнматон но калыкез пу архитектураен
тодматон вылысь.
Табере «Лудорвайысь» пу юртъёсын тодматскыны
луэ, отчы вуылытэк но. Фильмын музейысь ужасьёс
верало, маин висъясько удмуртъёслэн но ӟучъёслэн
крестьян юртъеръёссы, кытысь кылдӥз музейлэн куалаез,
тодмато тужгес тунсыко юртъеръёсын. Киноез
учкыны луэ музейлэн «ВКонтакте» вотэс бамысьтыз.
________
Виктория КРАМОВА