39 от 6 октября 2022 (25951)

№39 (25951)
20 2022-тӥ ар 6-тӥ коньывуон
ГУР АЗЬЫН
Нянь пыжон
Котькуд нунал — 240 колды
Дэбес ёросысь Зар-Медлоысь нянь пыжись
Наталия Трефилова.
Дэбес ёросысь Зар-
Медлоын улӥсьёс магазинэ
ваем нянез трос уг
басьяло, асьсэ гуртазы
пыжемзэ вылӥгес дунъяло.
Гуртоослы ческыт
нянь пыжо Наталия
Трефилова но Ольга
Баженова.
Калинин нимо хозяйстволэн
пекарняяз нянь пыжисьёс
Уйвай-Медло гуртын уло, нуналлы
быдэ Зар-Медлое — 4
иськеме — ужаны ветло: гужемзэ
— великен, нӧд куазен
яке толалтэ — пыдын. Та удысын
1995-тӥ арысен тырше
Наталия Трефилова, школаын
дышетскыкуз ик, дораз нянь
пыжылэм ни. Ужаны кутскон
аръёссэ тодаз вае ке, чидамезлы
пайме.
— Нуналлы быдэ 340-
360 колды пыжылӥмы, ӵем
дыръя со но ӧз окмылы, угось
со вакытэ тросэз гуртоос
быдэс котомка тыр нянь басьязы,
асьсэлы но мед тырмоз,
пудозылы но мед кылёз
шуыса, — вера Наталия
Леонидовна. — Ужан сямен
вӧсь луыны шедьылӥськиз.
Тужгес но секыт вал нырысь
аръёсаз. Одӥг пол суй бордам
нянь пыжон форма лякиськиз,
пыдэсаз ма гожтэмын
вал, сое ик суй вылысьтым но
лыдӟыны луэ вал. Больницае
мынонэз ӧм но тодылэ. Пересьёс
дышетэмъя укноысь нюлам
вуэн сутскем интыосмес
зыраллямы но нош ик ужаллямы.
Та вакытэ гуртысь пекарняын
нуналаз 240 колды нянь
пыжо, пӧлаз вань караваез но.
Оглюкетсэ столовоязы сёто,
мукетсэ — вузало. Толалтэзэ
нянь басьтӥсьёслэн лыдзы
кулэсмемен, нылкышноос
ческыт пыжиськемъёс борды
басьтӥсько, шаньгиос, пирожкиос
но пиццаос дасяло.
Чорыген няньлы ӵемгес куто
сардиналэсь консерваез,
бордаз трос-трос сугон юдо
на, куд-ог дыръя картошка
но ватсало. Шаньги ӵемгес
пыжо сырен яке йӧлвылэн.
Гуртын кыӵе ке шулдыръяськон
яке ужрад ортче ке, нош
ик пекарняын ужасьёслы вазисько,
пыжиськем курыса.
Пызь сярысь ке верано,
вазен гурт хозяйство сое
колхозын ик изэм, вукозы
ужамысь дугдэм бере пызьзэс
изо, Эграе нуллыса. Вылӥ
сорт пызез вутто Пермь улосысь
Верещагино городысь,
сое ю тысен вошто. Нянь
пыжисьёслэсь ужан интызэс
умоятон сярысь гурт хозяйство
ялан сюлмаське. Вазенгес
укнооссэс вошъяллям,
вентиляцизэс тупатӥллям,
кондиционер пуктӥллям.
Пыжиськон гурзы дорын табере,
пе, омырез мунчоын
кадь пӧсь уг луы ни.
Толлы дасяськон
Улмоды ке трос...
Улмолэсь котьма лэсьтыны
луэ, кылсярысь,
Ярын улӥсь Ирина Иванова-Коурова
толлы
пастила дася.
Ирина Геннадьевна арлы
быдэ улмолэсь повидло, варення
яке пюре лэсьтэ, пастила
дасяны но дышиз ни.
Улмолэсь шорзэ сузя, юдэ но
пӧзьтыны пуктэ, пичильтык
ву поныса. Небӟыны кутскем
улмоез блендер пыр
поттэ. Озьы юдыса дасям 1
ведра тыр улмолэсь шорлыдын
5 литр пала пюре потэ. Улмолэсь пастила.
Пыжиськон корт вылэ яке
сушилкалэн поддоназ пергамент бумага вӧлдэ, сое наш-наш
вӧен зыра но вылаз пюрезэ кисьтэ. Корт вылэ 5-7 миллиметр
зӧкта вӧлдэ но куасьтыны пуктэ. Сушилкаын 7-8 час куасьтэ
50-70 градус шунытын.
Пюрее сакырзэ шӧмызъя ватса, ӵем дыръя сакыр интые
чечы понэ. Куасьмем пастилаез вандылэ но толлы 3 литръем
банкаосы тыре, вылаз сакыр пудра пызьнаса. Куд-ог дыръя
пюре пушкы ватса изэм грецкой мульы. Таӵе ик пастила
лэсьтылэ грушалэсь, каунлэсь, но берлояз тросгес сакыр
ватса.
Та вакытэ бакчаын кисьмало ни слива, тёрн, сьӧдпалэзь
но мукет емышъёс. Ирина Геннадьевна таосызлэсь компот
лэсьтыны яратэ. 3 литръем банкалэн куиньмос люкетаз
емыш понэ: ӝынызэ — тёрн, сьӧдпалэзь. Нырысь соосты
быректэм вуэн кисьтэ, ог 5-10 минут воземез бере банкаысь
вуэз кастрюле кисьтэ но, 300 грамм (1 но ӝыны стакан)
сакыр поныса, выльысь быректытэ. Сиропез банкае кисьтэ,
ӵоктэтэн пытса но шуныт дӥсь улэ пуктэ. Туж дыртыкуз,
банкаысь емышъёс вылэ пӧсь сироп кисьтэ но ворса.
Интернет ӵектэмъя
Сливалэсь
варення
Кулэ: 1 килограмм слива, 2
килограмм сакыр.
Варення лэсьтӥське туж
капчи, пӧзьтытэк гинэ. Сливаез
миськоно но мульызэ
поттано. Сое поттылыны
туж капчи огшоры качыен.
Сливаез блендерен шукконо
яке сӥль коран пыр поттоно.
Та суретэ, сакыр кисьтыса,
ӟеч-ӟеч сурано но 10 минут
сылэтоно, сакырез мед сылмоз.
Бӧрысь нош ик сурано
но стерилизовать карыса
дасям банкаосы тыроно. Варенняен
банкаосты кезьыт
интыын возёно.
Грушалэсь
повидло
Кулэ: 1 килограмм сузям
(кӧмзэ но тысьсэ утялтоно)
груша, ӝыны килограмм сакыр,
ӝыны лимон (груша туж
коньыт ке, 1 лимон кулэ луоз),
1 чечы пуньы корица, чечы пуньы
йылын ванилин.
Миськыса дасям грушаез
сӥль коран пыр поттоно яке
блендерен небӟытоно. Груша
небытгес ке, кӧменыз
ик яралоз. Сакыр ватсаса,
пюреез пӧзьтыны пуктоно.
Пичи тыл вылын, ялан сураса,
35-50 минут пӧзьтоно.
25 минут пӧзьтэм бере ватсано
лимон сок, корица но
ванилин. Стерилизовать
карем посудае тырыса, гулбече
пуктоно. Эн кышкалэ,
сурет пӧсь дыръяз кизергес
луиз ке, сӥямез бере со напчоз.
Емышлэсь
наливка
Кулэ: сакыр, ву, емыш но
водка — ваньзэ быдэн 4 стаканэн.
3 литръем банкае шуныт
ву но сакыр пононо, сурано.
Бӧрысь отчы ватсано миськем
емыш но водка, со ӵапак
банка тыр луэ. Посудаез, капрон
пытсэтэн ӵоктаса, пеймыт
интые пуктоно. 2 арня
ортчыса, вина юыны дась.
Каунлэсь
мармелад
Кулэ: 550 грамм каун
(тыква), 8 грамм агар-агар, 4
пуньы ву, 50 миллиграмм лимон
сок, 4 пуньы сакыр, 2-2,5
стакан ву.
Агар-агарез 4 пуньы вуэн
сурано но небӟемзэ витёно.
Кастрюляе пононо юдэм
каунэз, ватсано ву (каун быдэс
вуэ мед выёз) но пичи тыл
вылын ог 10 минут пӧзьтоно.
Бӧрысь сое сӥсъяно но блендерен
небӟытоно. Сакыр но
лимон сок ватсаса, выльысь
пичи тыл вылэ пӧзьтыны
пуктоно. Суретэз ялан сурано,
нош быректӥз ке, плита вылысь
басьтыса, агар-агарен
сурано но силиконовой формаосы
тыроно, ог 3 часлы кезьыт
интые пуктоно. Ческытгес
карон понна та мармелад
вылэ шунтэм шоколад кисьтыны
луоз.
Мариновать карем
слива
Кулэ: 1 килограмм слива,
1 стакан ву, 1 стакан сакыр,
ӝыны чечы пуньы сылал,
ӝыны чечы пуньы изэм корица,
3-4 кӧжы пӧсьтурын, 3-4
гвоздика, 3 пуньы 9 процентъем
уксус, 4 пуньы коньяк.
Кастрюляысь вуэз, сакыр
но сылал ватсаса, газ вылэ
пуктоно, быректӥз ке уксус
но специосты будэтоно на.
Напчытозяз пичи тыл вылын
пӧзьтоно. Бӧрысь отчы
ватсано коньяк.
Сливаез мариновать карон
понна чебер емышъёсты
басьтоно. Соосты миськоно,
кӧсатоно но кастрюляе тыроно,
бӧрысь соос вылэ пӧсь
маринад кисьтоно но 3 час
сылэтоно. Маринадзэ кисьтоно,
выльысь быректытоно.
Нош сливаез стерилизовать
карыса дасям банкаосы тыроно
но вылаз пӧсь маринад
кисьтоно. Та банкаосты пеймыт
но кезьыт интыын возёно.
Бамез дасяз Валентина ЕМЕЛЬЯНОВА
«Берекетэ» юанъёсын, дэмланъёсын вазиськоно
73-33-42 телефон номеръя.
Материалъёстэс ыстэлэ, «Берекетэ» шуыса,
электрон почтае udmdunne@yandex.ru.