12 d’Isarwinkler

Isarwinkler
Aussichten & Ansichten
Mei Frau hod heid koa Zeit für eich.
Sie is im Garten und greid ummanand.
De oidn und verdörrtn Blattl, Äst und
Blüten vom letzen Jahr auframma und de
wo dafroan san. Guad, des san jetzt ned
so vui. War ja eher tropisch unser Winter.
Aber mei Holde gfreid sich über ois,
was wieder aufgeht. Über jeden frischen
Trieb und über a jeds Bleamal des scho
bliad. I muaß mi dann immer mitgfrein
und hischaun. Echt anstrengend, find i.
Aber wenn ma so duad ois ob – glangts a.
I frei mi nämle ned immer über de Gartlerei,
weils sie auf d’Nacht owei recht
woiselt, dass ihr as Kreiz wehduad. Sie
brauchad dann aweng a Massasche. Puh!
Do machst wos mit!
Mein Zuständigkeitsbereich im Garten
is klar abgegrenzt: Grill auf Vordermann
bringa und Hausbank vorwaarma. Und
außerdem hamm mia an Brot- bzw.
Pizzaofen auf unserer Terrassen steh. A
feine Sach! So a bissl Bella Italia, Vino
rosso und Pizza quattro is scho was Feines.
Do werd aus so am Hansä, Sepp
oder Schorsch schnell amoi a Giovanni,
Giuseppe oder Georgio. So vui europäisch
und international san mia fei scho!
Mindestens kulinarisch.
Oans muaß i aber jetzt no loswerden, weil
mi des jedes Jahr um diese Zeit ganz narrisch
macht: de Sonnwend! Mitte Juni –
des geht doch ned, oder? Jedes Jahr griag
i do eine leichte Winterdepression, mitten
im Frühjahr. Wenn ma si grad an de
langen Tog gwohnt hod, werdn’s scho
wieder kürzer. So a Schmarrn, oder?
Trotzdem, vom Hausbangän und dem
Gesang von de Vogerl, ko i einfach ned
gnua griang. A wenns mei Frau is, de
immer wieder dazwischen zwitschert. So
is’ hoit!
In diesem Sinne a schene Zeit in der frischen
Luft und an schenan Gruaß von
meiner Angetrauten. Sie ko grod ned –
hod dreckade Händ.
Bis zum nächsten moi!
Euer Isarwinkler
6