Gaudianerspiegel

Lieber Hatz-Loher Michl!
i dang da rechd schee fia deine Zeilen und wünsch dir freile aa nu a guads neis Joh.
Ja, dass heia widda koan Fasching gem werd, is scho echt bleed. Wobei i ma gahr ned sicha
bin, ob des bei eich Ruaschdorffer übahaupt was worn waar. Weil in eirer Niddabayan-Halle habts
doch an neia Bohn eine braucht. Is der denn übahaupd scho ferdig? Weil ohne Bohn kann ma ja
schlecht danzn... Mit eire ganzn Bausteijn hob i sowieso scho an Übablik valorn. Do beim ehemaligen
Mathäser is ja a hoibe Ehwigkeit nix passierd. Erst iatz, in de letztn Wochn im oidn Joh, hod
ma moi a bissl an Vortschritt gseng. Da derfts fei aufbassn, dass des koa so Ewigkeits-Bausteij wird,
wie seinerzeit der Flughafen in Berlin. Vo 2006 bis 2020 hod des dauerd, bis der moi ferdig worn
is. Wenigstens is der Abriss von dem alten Wasner-Gebäude flott ganga. So schnell hod ma gar ned
schaun kinna, wia des weg war.
Wos de difersen Disskussionen vo unsam Stattrat ahgeht, do host natürlich ned unrecht, oba ihr
Ruaschdorffer, ihr mochtses uns Bogginga a ned grod leicht. Iatz hamma uns im Juni endlich
gfreit, dass widda a Stück vo da A94 ferdig worn is, und da damalige Bundesvakehrsminisda Andi
Scheuer do war. Weil de A94, de dauerd fasd nu länga, wia eier neie Midde beim Mathäser-Areal.
Auf jedn Foi: Wia da Scheuer Andi do gwen is, hod se unsa Burgamoasda dafia eigsetzt, dass
de künffdige Autobahnausfahrt beziehungsweise des Autobahnkreuz Bogging hoaßn soi. Weil de
vo da Gemeinde Neijhaus woin uns des nämlich streidig mocha. Wenns noch dene geht, soi des
in Zukunft „Autobahnkreuz Neuhaus/Schärding“ hoaßn. Angeblich, weil dreiviertel vo dem Kreuz
auf Neijhauser Gemeindegrund is und weil se da dortige Burgamoasda durch de Nennung in de
Vakehrsnachrichtn im Radio meehra Touristen erhofft. Dawei schlängelt se de A94 späda moi über
70 Quadrattkillometer Pockinger Stadtgebiet. Ja und dann kemmts in dem ganzen Streit mit Neijhaus
ihr Ruaschdorffer a nu daher, mischts eich ei und voids uns in Rükkn. Und eier CSU hoit am
Scheuer a numoi an Briaf unta d´Nosn, weils ihr moants, ihr miasts a nu berücksichdigd wern,
beim Nam vom Autobahnkreuz. Am End werds dann doch nu a so wern, dass koana vo unsre Orte
zum Zug kimmd, und der Knoten dann doch nu „Andi-Scheuer-Kreuz“ hoaßt. Und dann – des sog
i da vei glei – dann kimma uns olle des mit de meehra Touristn obschminkkn. Weil wer wui scho
wo Urlaub mocha, wo d´Autobahn wia da Ex-Skandal-Vakehrsminisda hoaßt?
48