De Gemengebuet - Manternach

Virwuert
2
Léif Matbierger
Nodeems de Gemengerot jo d’lescht Joer beschloss hat fir op Grond vum ëmmer méi groussen
administrativen Arbechtsopwand en zousätzlechen Redakter anzestellen, konnte mir fir den
éischte Mäerz den Bernard Moes op dëse Posten astellen. Mir hunn och direkt vun der Verstäerkung
profitéiert, a sinn am Gaang eisen Internetsite à jour ze setzen, esou dass de Bierger an
Zukunft méi Méiglechkeeten huet sech direkt iwwer dëse Wee ze informéieren awer och en Deel
vun administrativen Ufroen schnell kënne beäntwert a verschafft ginn. Mir wärten Iech dësen
neie Site an den nächste Wochen nach méi genau virstellen.
Och fir d’Verstäerkung vun der Arbechterequipe ass anzwësche gesuergt, a mam Steve Lahr aus
Mënjecker wärd Dir ab dem Juni dann och en neit Gesiicht bei eise Gemengenaarbechter kënne
gesinn.
D’Fréijoer steet virun der Dier an domadden an eiser Gemeng och erëm d’Arbechten an de
Grénganlagen an den Dierfer. Elo kënnt ee jo mengen dat wier eng dankbar Aufgab fir eis Gemengenaarbechter,
mee spéitstens wann hinnen den Hondsdreck beim Méien regelrecht
ëm d’Ouere flitt ass et mat där Freed geschwënn eriwwer. Op der Gemeng heefen sech an de
leschte Méint d’Reklamatiounen aus der Bevölkerung, dass d’Trottoiren an d’ëffentlech Weeër
vun onverantwortlechen oder sollt ee besser soen ongezillten Hondsbesëtzer als ëffentlech
Toilette fir hier véierbeeneg Frënn erausgesicht ginn. Eng Plo déi och net virun de Grénganlagen
virum Schoulkomplex halt mécht, do wou Dag fir Dag d’Kanner spillen. Dass et och anéscht geet,
beweisen all déi Hondsbesëtzer, déi sech wierklech Zäit fir hier Déieren huelen, mat hinnen e
groussen Tour spazéiere ginn an hier Hënn esou gezillt hunn, dass si do maachen wou et kee
stéiert oder awer déi sech ang Plastikstut an d’Täsch stiéchen, fir den Dreck dann opzehiewen an
en ordentlech ze entsuergen.
D’Bauaarbechten un eisem neie Gemengenatelier hunn no laangem Waarden op all Genehmegungen
endlech ugefaangen. De Chantier gëtt an zwou Etappen realiséiert. Vir d’éischt gëtt
an der Schoulstrooss den ënneschten Deel vun der grousser Haal opgeriicht an d’Bréck iwwer
d’Baach gebaut , esou dass mer kënne mam jëtzegen Atelier eroofplënneren éiert dann uewen an
der Duerfstrooss den neie Komplex gebaut gëtt. Erënnere mer nach emol drun (cf. Bued 2/2008)
dass dëse Projet engersäits de Service vun de Gemengenarbechter esou no wéi méiglech bei de
Bierger wëll loossen, anerersäits awer duerch d’Verleeung vum Verkéier mat den Trakteren an de
schwéiere Maschinnen an d’Schoulstrooss et méiglech gëtt, den Deel ronderem den aktuellen
Atelier a ronderëm d’Haus mat der aaler Raiffeisekeess nei ze amenagéieren. Desweideren entstinn
hei fir d’Arbechter vun der Gemeng a vum CIGR propper Sanitärreim an och eng Wunneng
fir eng Privatpersoun. Net schlecht gestaunt hate mer, wéi op dem ënneschten Deel op emol
huet missen de Raumdingscht vun der Arméi geruff ginn, well do an enger Senk e Munitiounsdépôt
fond ginn ass. Hoffe mer dass mer am Verlaf vun de weideren Arbéchten vun esou Iwwerraschungen
verschount bleiwen.
De 6. Juni ass eng nei Oplag vun eisem Noperschaftsfest zu Berbuerg ugesot. Dëst Fest soll d’Integratioun
an d’Zesummeliewen ënnert de Matbierger förderen. Dat kann natierlech nëmmen
da klappen, wann och all déi Leit déi an der leschter Zäit an eis Gemeng geplënnert sinn, sech
och weisen an aktiv um Duerfliewen bedeelegen. Et ass net ëmmer einfach, séier Kontakt ze fannen
a sénger neier Gemeng. Duerfir hu mir dëst Joer och d’Veräiner gefrot fir sech mat un der
Gestaltung vun dësem Fest ze bedeelegen an sech mat den auslänneschen Natiounen zesummen
ze doën fir dat si sech kënne virstellen. Wann dir Iech wëllt un dësem Fest aktiv bedeelegen,
dann zéckt net Iech bei der Integratiounskommissioun vun der Gemeng ze mellen. Weider
Detailer fand dir an der Annonce am Reider vun dësem Gemengebued.
Mir wënschen Iech wéi ëmmer eng gutt Lecture vum Gemengebued.
De Schäffen- a Gemengerot vun der Gemeng Manternach