PDF herunterladen - LCGB

Mir hunn an eisen Iwwerleeungen d’Gesamtheet vun de Leit virun Aen, an dofir
kënne mir der aktueller Reform net zoustëmmen.
Mir fuerderen dofir d’Regierung op, dofir ze suergen, datt endlech
en Pensiounssystem agefouert gëtt, deen all Assurée hei am Land déi
selwecht Rechter an Flichten awer och déi selwecht Méiglechkeeten
gëtt.
Dat heescht en eenheetlechen Plafong cotisable.
Dat heescht, datt alleguerten d’Assuréen hei am Land kennen an
de Genoss vun enger Pension complémentaire bei hirem Patron
kommen.
Mir fuerderen eis Regierung op dofir ze suergen, dass Salariéen, déi
an Betriber mat schwieregen Aarbechtskonditioune schaffen, ech
mengen hei ganz kloer als Beispill de Bau an d’Industrie, awer och
d‘Santé, en Urecht op eng Fréipensioun oder Preretraite hunn. Et
ass carrément de Geck matt dëse Salariéen gemaach, wann ee just dës Leit wëll
zwéngen méi laang am Aarbechtsprozess ze bleiwen.
Mir verlaangen donieft vun eiser Regierung eng attraktiv Reform vun
eiser Preretraite progressive déi et de Salariéen erlaben kann, sech éischter
matt engem progressiven temps partiel aus dem Aarbechtsliewen auszeklenken,
awer dofir insgesamt méi laang aktiv ze bleiwen.
Mir verlaange fir déi pensiouneiert Generatiounen, déi, wat de Privatsektor
ugeet laang a schwéier ënnert deene leschte Krise gelidden hunn, en
Bäibehalen vun dem Ajustement vun de Pensiounen esou laang wéi
mir d’Cotisatioune stabel kënnen halen.
Mir verlaangen fir déi jonk Generatioun d’Unerkennung vun den
Studiejoeren net nëmmen als assimiléiert Joren, mä carrément
als cotiséiert Versécherungsjoere, dëst vir ze verhënneren datt
d’Ufuerderungen un méi héich Studie soss automatesch zu enger net
akzeptabeler Erhéijung vum Rentenantrëttsalter féiert.
Mir fuerderen eis Regierung op d’Reform vum Reclassement
professionell esou ze iwwerschaffen, datt d’Invaliderenten gräifen
an déi Leit déi no enger Krankheet nach enger sënnvoller Tätegkeet
nogoe kënnen, dat dann och ënner dezente Konditioune kënne man.
Kolleginnen a Kollegen,
Alleng eis Iwwerleeungen zum Plafong cotisable géifen mëttelfristeg méi
Cotisatiounen an eise Pensiounssystem erabréngen an dofir dann och
mëttelfristeg dësen Pensiounssystem ofsécheren.
Eis Fuerderung zu enger besserer Preretraite progressive wou d’Salariéen
dann insgesamt méi laang am Aarbechtsprozess géife bleiwen, féiert zu enger
nohalteger Verbesserung vun der finanzieller Situatioun vun eiser Pensiounskees
an och sécherlech fir eng ganz Partie vu Leit zu engem, fräiwëllegen, spéideren
Antrëtt an d’Rente.
Dir gesitt also, datt eis Fuerderungen net aus der Loft gegraff sinn, datt dëst keng
Illusioune sinn, mä ganz konkret a gezielte Propositiounen a Revendicatiounen
déi eisen Rentesystem fir d’Salariéen net verschlechteren.
11
ACTUALITÉ / AKTUALITÄT