PDF formatuan

18
1. unitatea: Gertaera harrigarriak. Komikia
Gogoratu Josek zer erantzun dion Katalinaren zati-galderari:
– Galdera: Zenbat denbora behar izaten duzu “Naiara”-ren komikia egiteko?
– Erantzuna: Hiru egun inguru.
Edo “astebete” ere erantzun zezakeen, baina inolaz ere ez “atzo”, “zaldiz”,
“zurekin” edo antzekorik, horiek ez baitiote egindako galderari
erantzuten.
2. Bai-ez erako galderak: Eskolan, marraztea gogokoa zenuen?
Galdera mota hauen bidez, daukagun informazioa baieztatu edo ezeztatu
nahi dugu. Galde-perpaus hauek ez dute galdetzailerik eta BAI
edo EZ eskatzen dute, ez besterik. Adibidez:
– Galdera: Bizi daiteke komiki-marrazkilari lanetik?
– Erantzuna: Bai, asko argitaratzen dutenak eta mundu osoan ezagunak
direnak horretatik bizi dira.
Galdera hauei toki batzuetan AL partikula gehituko zaie esanahia aldatu
gabe, eta zalantza adierazteko edo indartzeko OTE partikula erabil daiteke.
Adibidez: etorriko ote da? (agian bai edo agian ez). Azter itzazu bi
galdera hauen arteko aldea: etorri da aita? / etorri ote da aita? Nola
egingo desberdintasuna gaztelaniaz edo frantsesez?
3. Aukera-galderak
Zati-galderak bezalakoak dira, baina erantzuna hautatu behar da. Adibidez:
Nork esan du: errusiarrak ala amerikarrak?
Ikusten denez, galdera mota hauetan ALA juntagailua tartekatu dugu
emandako aukeren artean.
Hala ere, galderak egiten direnean batzuetan beste zerbait adierazten dugu:
agindua, eskaera, erregua… Adibidez, amak, begitartea ilundua, esaten badizu
“itzaliko duzu telebista hori, mesedez?”, egoera horretan ez du jakin nahi
ea itzaliko duzun edo ez: agindu bat ematen ari da. Baina, alderantziz, zuk
amari galdera bera egingo bazenio, erregua egingo zenioke.
Gurasoek esaten badizute “noiz amaituko ote da telesail nekagarri hori?”, baliteke
kexa bat adieraztea. Kexa horrekin ados ez bazaude, horrela erantzungo
diozu: “beno, ez da hain txarra, nire ustez”.
– Zuk ezagutzen duzu horrelako galderarik? Eta hori ez da agindua, galdera
bat baizik.