Chioviri di Venniri Santu - alphonse doria

10
-Ma lei signora così ci fa morire! con l‟aria che c‟è qui, l‟appetito
si sveglia!- Patri Spirdu cu dda vuci a fimminedda intervinì quasi
a giustificari dda reazioni d‟u vintrigliuni d‟u collega.
-S‟aviti bisognu na mani d‟aiutu fati cuntu di mia- Dissi la
munachedda, cu na vuciuzza duci e virginali ca l‟omini
s‟arrisinteru e taliannula s‟addunaru ca era na bedda picciotta sutta
dda tonica tantu ca si cci arrizzà u piddizzuni. Maricchia, a soru di
Carmela, fimmina sperta, s‟addunà d‟u tri e subitu si la purtà cu
idda a cucinari.
-Don Carlu, chi funzioni bella! E chi predica! Ni fici spuntari i
lacrimi a tutti. Ddi paroli comu scutivanu puru li mura di la
chiesa!-
-Grazie signora Agnesa, è troppo buona, non merito tanto!E‟ il
Signore che m‟ispira e mi da la forza.-
-Tutti dda eramu!- Carmela rimarca.
-E patri Spirdu chi pacezia, chi saggizza! ascutari a tutti „nchiusu
ni ddu confessionali…- A signura „Ngnisa scattià ddi paroli nni la
facci a tutti accumpagnannuli cu li manu. Tantu ca patri Spirdu si
calò l‟occhi „nterra.
-U viditi? Comu si calò l‟occhi „nterra? „Un v‟hata a fruntari! Chi
umiltà, chista è tutta santità!- Dda signura „Ngnisa a ddu patri
Spirdu u fici puru arrussicari.
-Bene Giovanni facciamo due passi, ci permette se ci sgranchiamo
un po‟?- Don Carlo accussì livà sutta ddu suppliziu ricangiannu u
favuri a u collega. Si susinu e talianu u furnu, granni a cupula fattu
cu majstria cu i giammariti, travagli tramantati di patri „nfigliu. Si
spostaru e trovaru l‟omini chi si stavanu fumannu tecchia di
cintratu.
-Bella questa campagna! Organizzata bene! Mi complimento!-
Don Carlo si fici avanti e trasì subito „ncumprisazioni, mentri patri
Spirdu cu li manuzzi nna li mani ci stava pi narrè „nsilenziu ma
l‟occhi so eranu vivi e stavanu attenti a ogni cosa.
-Fazzu di lu me megliu, i travagli „un finiscinu ma‟ e ci nn‟è cosi a
fari…- U zzu Mariu ci dissi cuntentu di ddi complimenti.