Chioviri di Venniri Santu - alphonse doria

8
-Veru è! Unu o ci l‟avi la fidi e allura cridi, oppure si campa di li
cosi chi vidi e „un cridi a nenti.- Cu sapienza arrispunniva
Sarbaturi.
-Ora na cosa è cridiri a u Signuri e na cosa a i parrini! Vi cuntu
chistu fattettu…-
-Firmassisi zzu Mariu, ca pruvati stu viniceddu c‟accussi parlati
chiù spidugliatu.- Na ditta e un fattu racimula n‟atri quattru
bicchera di tanti furmati diversi, ci detti na lavata cu u stessu vinu,
li jnchì d‟u carratuni e dda scuma acchianà nni ddu russu rubbinu
scintillanti, misi „ncapu un carratuneddu dd‟a l‟addritta, taglià un
pezzu di sazizza sicca e tuccaru cu li bicchera, vippiru e mangiaru.
-Miiì a bonu è stu vinu!- Fofò si cumplimintà.
-A stu prezzu, speciali è!- Prosighì u zzu „Ngnazziddu.
-Zzu Mariu, ora po‟ cuntari a so!- Detti forza Sarbaturi.
A DISPENZA
Nn‟u Sabatu Santu d‟u millinovicentusissantasei „ncampagna a
Funtanagranni si facivanu i priparativi d‟a Santa Pasqua. U zzu
Mariu ajva truvatu n‟agniddazzu ca era na maraviglia, di prima
matina, prima ca l‟addevi s‟arrisbigliavanu, l‟ajva scannatu e
appinnutu pi fallu sculari. A cumpagnia c‟era. E cu puliziava
navanzi a robba, cu priparava tavulina e seggi, cu na cosa e
n‟autra, sempri cu lu rispettu d‟u Signiruzzu mortu, già si rispirava
aria di festa. L‟addevi jucavanu, i fimmini stavanu „npastannu u
pani e l‟omini facivamu quarche rattedda nni l‟ortu mentri
cuglivanu quarche lignu pi camiari u furnu e accussì „nfurnari.
Quannu nni ddu silenziu mattutinu di supra a la muntagnedda si
sintì rumuri di muturi di machina, era na cincucentu. Comu spuntà
si fici na strummittuniata fistusa. La stratella arrivava a quarche
centinaru di metri d‟a robba. Addevi, granni e cani s‟appressaru e
vittiru scinniri dui parrina: unu ca pariva un poju e l‟autru
minutiddu cu na testa tunna tunna e ddu gricchi granni, di chiddi
piddaveru, gricchi di parrinu. Sempri di dda cincucentu scinneru