12 от 31 марта 2022 (25924)

№12 (25924)
№12 (25924)
10 ТӦР ШОРЫН
ТӦР ШОРЫН
23
2022-тӥ ар 31-тӥ южтолэзь
2022-тӥ ар 31-тӥ южтолэзь
udmdunne.ru
+7 951 195 37 65
Куараеныз йӧнатэ
Катерина Самоделко.
Удмурт кырӟасьёс пӧлысь Катерина САМОДЕЛКО —
Кенjали — зол висъяське. Угось огдышем фонограммаос
улсын со уг кырӟа, кутэ вашкала крезьгур инструментъёсты:
кубыз, варган, шыркун (бубен)... Озьы бигер
музъем вылын вордӥськем но будэм нылаш капчиен
сюрес шедьтӥз удмурт учкисьлэн сюлэмаз.
— Катерина, анаедлы
кырӟась луыны кылдымтэ.
Со понна тыныд удалтэм
— кырӟаськод но, крезьгураськод
но.
— Зэм, мамаелэн чебер
куараез. Егит вакытаз Ижевске
артистлы дышетскыны
но пыремын вылэм. Но
мӧзмеменыз дышетсконзэ
куштэм но дор палъёсаз берытскем.
Мон будӥ огнам — папатэк,
сузэр-вынъёстэк. Мӧзмыт но,
секыт но вал. Соин ик пичи
дырысеным малпалляй: аслам
семьяе одно ик бадӟым
луоз. Шумпотӥсько, улонэ
озьы ик радъяськиз — туннэ
4 пиосы будо: бадӟымезлы 9,
кыктоосылы 5, покчиезлы 4
арес.
Нылпи вордыса, тыпак
воштӥськи. Нырысь-валысь
шузимем коньы кадь вал: отчы-татчы
ветлоно, созэ-тазэ
лэсьтоно... Аслым дыры
ӧз кыльылы. Трос книгаос
лыдӟыса, визьмо адямиосын
пумиськылыса гинэ, валай:
нырысь аслыд саклык висъяно,
собере — нылпиосыдлы.
Угось анай шудо ке, нылпиос
но шудоесь. Соин ик вис
сюре ке, тыршисько огнам
нюлэскын поръяны, йогае
ветлыны, эшъёсыным пумиськылыны...
Озьы дорам
мон гань-гань огзэ горшоке
пуктӥсько, мукетызлы сиён
сётӥсько, куинетӥезлэсь
дӥсьсэ воштӥсько, ньылетӥзэ
миськисько.
4-ез но пиосы творчество
котыре кыстӥсько: кырӟало,
экто, крезьгуро инструментъёсын
шудо. Ачим но сыӵе
ик вылӥськем. Анае быгатонлыкъёсме
дыраз шӧдэм. 6 арес
дыръям крезьгуръя школаысь
баянэн шудон классэ ветлыны
кутски. Урокъёс бере «Нур»
(«Пукыӵ») эстрадая коллективын
кырӟалляй. Школаез
йылпумъяса, туж уг поты вал
дор палъёсысьтым кошкеме.
Анае но шуылӥз: тыныд
Ижын секыт луоз. Асме кызьы
ке киям кутыны быгатӥ: Удмурт
кун университетысь калык
кырӟанъя факультетысь
ӧй пегӟы.
— Малы эстрада бордаз
ӧз биньы ини — калык
кырӟанъёсты бырйид?
— Ӵапак та бордысен университетын
валамтэос кылдыны
кутскизы. Йырам —
эстрада, нош дышетӥсьёс
песянайёс кадь кырӟаны куро.
Чик ӧй валалля, мар соос мынэсьтым
витё. Соин, дыр: университетэ
школа бӧрсьы вуи,
нош ӵош дышетскись эшъёсы
кин культурая колледж,
кин крезьгуръя училище пыр
потэмын вал ини. Соку огез
Катерина Самоделколэн архивысьтыз
дышетӥсе, Андрей Поздеев,
шуэ: мын, пе, училищее. Ӧй
кошкы. 3-тӥ курсэ вуэме бере
гинэ Андрей Николаевич нош
дорам лыктӥз но шуиз: тынад
татын интыед!
Та дышетӥсе али но сюлэмам.
Университетын мон
зэмос пацанка-гот вал: вакчи
йырсие сьӧд-сьӧд буямын,
гадям бадӟым кирос ошемын,
мугоры губыртӥськемын,
малпанъёсам — рок кырӟанъёс...
Андрей Николаевич та
пумысен монэ ноку но ӧз
пыкылы. Шуылӥз гинэ: воштӥськод
ай. Озьы ик луиз.
Пумен этно но фолк кырӟан
амалъёс матын потӥзы. Валай:
ас ӧрме шедьтӥ.
— Удмурт кун университетысь
психологияя факультетэ
но пырыны малпаськод
вал ук?
— Диплом ужам эскери,
кызьы фольклор но психология
ог-огенызы пӧлэстӥсько.
Дышетӥселы гожтэме сыӵе
кельшем, психологлы дышетскыны
ӵектӥз на. Гожты,
пе, эссе. Сое дасякум, валай:
улонме та удысэн герӟаме уг
поты. Приёмной комиссие
мынэм интые, Казане кошки.
Отысь филармоние интыяськи.
Но кырӟась луыса ӧй ужа,
пиар-менеджер вал. Филармониысь
ужрадъёс, отчы вуылэм
артистъёс сярысь гожъялляй.
Уг вунэты ни СССР-ысь
калык артистлэсь Иосиф Кобзонлэсь,
Америкаысь джазвокалисткалэсь
Мэнди Гейнслэсь
интервью басьтэмме.
Таӵе дано адямиосын пумиськылыса,
шоканы ик секыт
луылӥз — сыӵе зол кырӟаме
потылӥз! Амал шедьтӥ — Казаньысь
Эшъяськон юртэ сюрес
лёги. Кылдытӥ «Инльӧль»
ансамбльме но кырӟаны кутски.
Но татын но кема ӧй
чида, ӝыны ар ортчыса, Удмуртие
бертӥ.
— Казаньын ик кырӟан
гожъяны ӧдъяд. Мар яке
кин муг луиз солы?
— Туннэ 200 пала
кырӟанъёсы вань. Гожъяны
кутски ӟуч кылын, школаын
дышетскыкум. Удмуртэз,
зэм, нырысьсэ вордӥськиз
Казаньын. Удмуртъёслэсь туж
мӧзмисько вал. Озьы «Тури но
лобӟе» кырӟан малпай. Отын
италмас сяська сярысь чуръёсыз
вань. Сюлэмы шӧдэм,
лэся: Удмуртие вуыса, Дэри
ёросысь Италмас каргуртысь
нырысетӥ кузпалме пумитай.
Кырӟанъёсы йырам лыкто
пӧртэм сямен. Соку дунне питранъёс
ик дугдо кадь. Сӥзьыл.
Пукиськод ӟус вылын. Тӧл
пелляське. Выйиськод тодэ
ваёнъёсад. Валаса но уд вуттӥськы,
кызьы йырын гур
шудыны ӧдъя. Яке Удмурт
театр вӧзтӥ поръякуд, заводысь
куара шуккиське. Ульчаетӥ
мынӥсь-ветлӥсьлы
со нокыӵе ик ӧвӧл, вылды.
Нош мыным вуоно кырӟанэлы
со тон, темп сётэ.
Шулдыр-а, урод-а тыныд —
возьматӥськод кырӟан пыр.
Удмуртие вуыса, «Шулдыр
ӝыт» ансамбльын ужай. Сценалэсь
туж кышкасько вал. Уг
ваты: огпол, курытсэ юыса, учкись
азе потаме но вань. Малпай,
1 чарка курданме быдтоз.
Зол янгышаськем! Оломар
вал со — кырӟаны ик ӧй быгаты.
Сцена вылын ужано чылкыт
сюлэмын, сайкыт йырын.
Нош мынам сюлэм но, йыр но
жӧлмамын вал. Берло ини Удмуртиысь
дано артистка Галина
Платонова буйгатӥз: котькуд
артистлэн сценалэсь кышканэз
луыны кулэ, сотэк учкисен кусып
тупатыны уд быгаты.
«Шулдыр ӝытысь» кошкыса,
ужай Дэри ёросысь Первомайской
каргуртысь нылпи
садын, пиналъёсты кырӟаны
дышетылӥ. Татысен ик декретэ
кошки. Озьы туннэ нуналозь
уже одӥг — нылпиосы.
— Улонад бадӟым шугсекыт
пыр потоно луиз: сюрес
вылын шудтэм учыре
шедид вал...
— Али валасько ини, верамлэсь
азьло котькуд кылыд
сярысь рос-прос малпаськоно
Пичи дыръяз.
вылэм шуыса. Угось соос зэманы
быгато. Нылпиосы котырын
бергакум, туж жуммисько,
ялан нёръясько вал:
ну ку тӥ мыным валес вылын
гань-гань шутэтскыны сётоды
ини?! Инмар кылӥз, лэся,
та кылъёсме — авария бере
3 толэзь султыны ӧй быгаты...
Мотикен ворттылыны яратӥсько.
2-тӥ мае, Паска нуналэ,
кыкетӥ кузпалэным Дэри
ёросысь Кияик гурт котырысь
вашкала пужым доры ветлоно
кариськимы. Сьӧрамы
кутӥмы ческыт чай, пыжиськем.
Дорысь потыкумы, оброс
азе султыса, Инмарлэсь шудо
сюрес кури. Угось со вакытэ
вень йылын кадь улӥ. Кышкыт
уйвӧтъёс но, ишанъёс но
ӧй адӟылы, но шӧдылӥ мар ке
но умойтэмзэ. Кузпалы юа:
мар тонэн? Нош мон валэктыны
уг быгатӥськы. Бӧрдӥсько
но тӥни. Куректыса улӥ:
асме-а, ӵыжы-выжыосме-а,
нылпиосме-а меда вите кышкыт
адӟон? Сьӧд кышет но
басьтӥ вал ини. Ӵапак таӵе секыт
вакытам вордӥськиз «Жухлая
трава» ӟуч кырӟанэ: лымы
шуна, шунды азе мычисько куасьмем,
пурысьтам куаръёс...
Кияике кырӟаса мынӥмы.
Куазь шулдыр. Сюрес вылын
машина ӧжыт. Таӵе капчи
мылкыдын ик бертыны
потӥмы. Шабердинской тракт
кузя ширтыкумы, шӧдыны
кутски, рульме бур пала кыске
шуыса. Магнит но тӥни
— шонертэме нокызьы но уг
луы. Сюрес дуртӥ мынӥсько
ини. Нош отын ву пуке. Гопысь
тэтчыса ик потӥ. Собере
адӟи: кожон матэктэ. Шуак
тормозме зӥби. Мотике кечырскиз
но монэ 9 метрлы
палэнэ сэрпалтӥз. Зол вӧсь
луи, но йырсазьме ӧй ышты.
Ӝог юрттэт сётӥсьёсты витьыса
сюрес вылын кылльыкум
ини, пель сьӧрам чузъяськизы
кырӟанысьтым чуръёсы: ...я
жухлая трава, я сонная трава,
душа летит над елями, а я плыву
как вода, теку как река...
Кызъёслэсь йылъёссэс учкыса,
вӧсьлы чидатэк, малпасько:
кулӥсько ини... Но собере бус
пыр кадь тодам лыктӥзы нылпиосы.
Кызьы ай соос монтэк?
Та ик улон борды ӝабырскеме
луиз. Берло тодӥ, та сюрес вылын
трос адямиос быремын
шуыса. Соин ик, вылды, та интылы
гуртоос аспӧртэм ним
но сётӥллям — «Доброе утро!»
Шуо: мотоен ворттылӥсь
огпол ке но шуккиськыны
кулэ, сотэк, пе, со мотоциклист
ӧвӧл. Та учыр бере
руль сьӧры кема ӧй пуксьылы.
Али курданэ ӧвӧл ини.
Ворттылӥсько. Кожыкум гинэ
куддыр киосы дырекъяло. Но
сюрес вылын тӧлэн вожвылъяськыку,
кышкан йырын уг
луы ни.
Пиосыныз.
— Та учырен сэрен, вылды,
кырӟанъёсад, концертъёсад
векчи нюжаен
кыстӥське одӥг тема — улон
но кулон. 2012-тӥ арын
«Рождение. Смерть. Таинство
бытия» концертэд ортчиз,
2019-тӥ арын — «От
рождения до рождения»,
туэ — «От фолка до рока».
— Та тема ноку но уг вужмы.
Нунал куспын адями кӧня
пол кулэ но улӟе меда? Кин ке
Бӧрдыку но, кырӟаку но мугорысь ёзвиос огкадь золъясько.
Соиз но, таиз но мугоре тымиськем кӧтӝожез
огкадь потто. Куара луллы буйганы юрттэ.
вылад лек кылъёссэ кисьтӥз —
кулӥд, кин ке ушъяз — улӟид.
Озьы огвакытэ улӥськод но,
кулӥськод но кадь. Вордскиськомы
бӧрдыса. Кулӥськомы
но куддыр бӧрдыса. Нош
бӧрдон — со кырӟан. Бӧрдыку
но, кырӟаку но мугорысь ёзвиос
огкадь золъясько. Соиз
но, таиз но мугоре тымиськем
кӧтӝожез огкадь потто.
Соин ик нылпиосылы ноку
но «Тырмоз бӧрдыны!» уг шуиськы.
Куара луллы буйганы
юрттэ.
— Нош ку мугорез
шӧдыса кырӟанъя (интуитивное
пение) урокъёс нуыны
кутскид?
— Мынэсьтым пуш дуннеме
воштӥз йога. Кепыран
сямме вормыны но со ик
юрттӥз. Кызьы? Сцена вылын,
шуом, ой, канжаськыса усё
яке кылъёсме вунэто шуыса,
малпаськоно ӧвӧл. Саклык
висъяно мугорлы но куаралы.
Соку учкись азьын огдыре
кырӟаськод но, лобаськод но.
Зэм, талы 1 нунал куспын дышыны
уг луы. Ас бордад уеннуналэн
ужано: мугорез куасалляно,
шонер шокано...
Та ласянь тодон-валанъёсы
тырмыт люкаськем бере
йырам малпан чилектӥз: оло,
кырӟаны мылкыд
карисьёсты огазе
люкано? Озьы
Анатолий Галиханов
крезьгурасен
ӵош аспӧртэмлыко
урокъёс ортчытъяны кутскимы.
Огазеямы психологиез
но, йогаез но, эзотерикаез но,
крезьгуранэз но. Адямиос ӵем
дыръя дорам лыкто но шуо:
куарамы ӧвӧл, кырӟаны ум
быгатӥське. Мынам сереме
потыны кутске. Соку кызьы
монэн вераськиськоды, юасько.
Котькудмылэн куарамы
вань. Сое усьтыны гинэ быгатоно.
— «Нюркины песни»
ансамбльын но кырӟаны
вуттӥськод на.
— Озьы. 2014-тӥ арын Удмурт
кун университетысь
Ольга Перевозчикова, Юлия
Павлова эшъёсыным ансамбль
кылдытоно кариськимы.
Куиньнамы но кырӟаны
яратӥськомы, куиньнамы но
трос нылпиё анайёс, куиньнамы
но сяммыя туж пӧртэмесь.
Ваньмыз та милемыз зол огазеяз.
Ужаськомы тыпыр-тапыр:
нырысь телефон пыр
кенешиськомы, собере репетиция
ортчытӥськомы, ужрадын
шаплы кырӟаськомы
но, ог-огмес чупаса, семьяосамы
кошкиськомы. Пӧлазы
мыным туж капчи. Ог-огмес
валан понна кылъёс но кулэ
ӧвӧл. Синъёсмыя, выросъёсмыя
ог-огмес шӧдӥськомы.
— Кудӥз кырӟанэд сюлэмыдлы
тужгес матын?
— «Мотылёк». Отын возьматэмын
улонлэн пумтэмйылтэм
луэмез. Вужзэ котьку
воштэ вылез. Алигес вань
кырӟанъёсме сӥс пыр поттӥ.
Урод мылкыдын гожтэмъёссэ
сутӥ, ӟечъёссэ кельтӥ.
Тросэз артистъёс уг ярато ас
кырӟанъёссэс кылзыны. Мыным
— туж кельше. Куддыр
малпасько но: мон ик-а со?
Мылкыды секыт дыръя куарае
мугорме но, лулме но
йӧнатэ кадь потэ. Урокъёсам
ветлӥсьёс но сое шӧдо.
Шуо, тӥледын пумиськылыса,
улонмы чутрак воштӥськиз:
одӥгъёсыз акылес ужысьтызы
Шыркунэн шудэ.
кошкизы, мукетъёсыз выль
быгатонлыкъёссэс усьтӥзы...
Мон ведь адямиез бадӟым сцена
вылын профессионал музэн
кырӟаны уг дышетӥськы.
Возьматӥсько гинэ, кызьы
куара пыр пушкысь кӧтӝожез
поттыны луэ.
— Малы аслыд Кенjали
кушем ним бырйид?
— Мон кенӟали кадь
ваньзэ бызьыса лэсьтӥсько.
Кенӟали сямен «быжме» —
улонам пумиськылӥсь шугсекытъёсты
— йырысьтым
капчияк куштӥсько. Со мынам
кушем нимы гинэ ӧвӧл
— улонэлэн пусэз. Юнме шат
пельпумам кенӟали тату-суред
пуктӥ! Мукетыз но вань
на — крезьгур ключ. Сое, 10-
тӥ классэ ветлыкум, чиньыям
суредазы. Возьматэме потӥз,
быдэс улонме крезьгурлы
сӥзисько шуыса. Школаямы
соку, мон сяна, нокин но татуажен
ветлыны ӧз дӥсьтылы.
— Тон кыӵе но конкурсъёсы
ӧд пыриськылы ини:
«Элькуновидение», «Ший
памаш»... Азьланяз кыӵе
ужъёс борды басьтӥськыны
малпаськод?
— Сюлэмы пиналъёс котыре
кыстӥське. Нылпи садын
ужакум, адӟисько вал,
макем туала нылъёс но пиос
керӟегесь, интыязы пукыны
чидасьтэмесь. Соос ведь
юнме шорысь сыӵеесь уг луо.
Озьыен, покчиослы уг тырмо
яратон, вешан, нуныян. Анайатайёс
уж пӧлазы выемын.
Соин ик нылпиослы кырӟанэн
герӟаськем арт-терапияя
урокъёс радъясал.
Та сяна, воргоронлэн пуш
дуннеезлы сӥзьыса, куаратэм
кино пуктысал. Сценарие
дась. Артистъёс но быръемын
ини. Уксё гинэ утчано
на. Малы воргоронъёслы? Али
кышномурт но пиосмурт кусыпъёс
зол воштӥськемын.
Кышномурт юн кариськыны
турттэ, вӧзысьтыз воргоронзэ
гажамысь дугдэ. Та бордысен
семья тэшканы кутске.
Ачим но нырысетӥ кузпалэным
кусыпъёсмес утьыны
ӧй быгаты. Мынам нуналы
кутске но быре вал огпӧртэм:
пиослы сиён пӧрано, дӥсьсэс
миськоно, бервылзэс утялтоно...
Нош творчествоен
вырись адямилы романтика
кулэ. Со ӧй вал бере, кузпалэным
кусыпъёсмы салкымазы.
Люкиськеммы пумысен
уг куректӥськы. Али ми соин
матысь эшъёс. Мон, йырам
уродзэ возьытэк, котьку капчи
улыны тыршисько.
________
Ольга КОРЕПАНОВА