12 от 31 марта 2022 (25924)

udmdunne.ru
+7 951 195 37 65
ЛЫДӞИСЬКОН СИГ
№12 (25924)
2022-тӥ ар 31-тӥ южтолэзь 27
бигерез вииллям. Камит вала,
та кышкыт учырез писарьёс,
становойёс быдэс гурт вылэ
куштозы. Кема аръёс ӵоже
кыстӥськоз следствие, кема
аръёс ӵоже гурт калыклэсь
ваньбурзэ кыскалозы, нош бератаз
юнме адямиосты Сибире
келялозы. Гурт калыкез сыӵе
шимес адӟонлэсь мозмытон
понна, вань янгышез Камит ас
вылаз басьтэ. Камитэз кыдёке
Нерчинское келяло. Ӝоген со
отысь пегӟыса бертэ.
Кышноез вылаз выль карт
пыртэм — Эзелез, самой сое,
кин вииз Камитлэн кенсаз вузчи
бигерез, кинэн йырин Камитлэн
вань улонэз тугаськиз.
Та сценаез усто шудэ Саша Тугбаев.
Сюлэмыз солэн вожпотонэн,
йыркурен тырмемын.
Но Камит быгатэ малпанзэ
ватыны. Нырысь шӧдсконтэм
мынэ сцена, подтекст пыдло
ватэмын. Зэм, быгатэ Саша
подтекстэн рользэ азьланьтыны.
А ведь ужпум ваньмыз со
бордын, шуылоз вал Станиславский.
Табере Камит умой
вала, ма кароно: нюръяськоно.
Нюръяськоно узыръёслы пумит,
жандармъёслы но чиновникъёслы
пумит.
Мугорын Саша Тугбаев
шоро-куспо, нош Камитын со
ӝужыт, пельпумъёсыз паськытэсь,
куараез но кужмо, таза.
Тодмантэм воштӥське вал та
рольын но Саша Тугбаев.
Озьы, туннэ со шудэ калык
понна сюлмаськись, выль колхозной
улон понна кышкатэк
нюръяськись Бутаровез, нош
ӵуказе «Женитьбаын» шулдыр
мылкыдо Анучкинэз,
кудӥзлэн вань сюлмаськонэз
одӥг гинэ: кышно басьтыны.
Только кышноез одно ик мед
тодоз француз кылэз. Тани
солы Агафья Тихоновна кельшиз,
нош солы шуо: невеста
уг быгаты француз сямен вераськыны.
Анучкин берытске
но кошке. Артист юн серекъя
но шарая дворянъёслэсь тупыттэм
сямзэс.
* * *
Кӧня ке кыл вераме потэ,
кыӵе адями Саша Тугбаев. Со
коллективез яратэ. Петя Колесников,
Филипп Бобров, Коля
Растегаев, Миша Харин — люконтэм
эшъёс. Соос шулдыресь
адямиос, ужаны яратӥсь адямиос.
Соос пӧлын Саша Тугбаев
— герой, сцена вылын герой.
Нош улонын, эшъёсыз пӧлын
туж огшоры адями. Зэмзэ вераса,
со маскарчи. Бен, герой
но, маскарчи но. Самой кулэ
интыяз ик ляп гинэ вераса сётоз.
Ачиз уз но серекты, нош
котыраз сылӥсьёс, пукисьёс гурак
серектозы.
Туннэ кадь ик син азям
пуксе. Ӝытазе куать час ёросын
артистъёс спектакле
лыкто. Фойеын ӝомо-югдо,
учкисьёс ӧвӧл на. Зрительной
залын пеймыт. Быдэс театрын
али чалмыт. Сцена вылын декорация
пуктыса дасямын.
Помреж отын ини: ваньзэ
эскере, учке. Ваньмыз-а дась
спектакльлы? Артистической
комнатаосын каллен-каллен
шулдыргес луэ. Костюмершаос
дӥськутъёс нулло. Кинлы
мае дӥсяно, пукон вылэ тыро.
Ӝоген артистъёс ваньзы вуо.
Дӥсяськыны, грим тырыны
кутско. Озьы нуналысь нуналэ.
Утыр дасяськемъёсыз ини
шашкаен я шахматэн шудыны
кутско. Зэм, та шудонъёс ӵем
дыръя люкетыло артистъёслы:
шахмат доска дорын малпаськонназ,
кудӥз сцена вылэ дырыз
дыръя потыны но вунэтэ.
Куддыръя кылъёссэ сураса
лэзе. Кӧня серемес но юмок
ужъёс луыло со шашкиосын
но шахматэн сэрен. Дирекция
приказ сётэ: спектакльёс
дыръя шашкиосын но шахматэн
шудыны уг яра шуыса.
Кӧня ке дыр ортчыса, со приказ
вунэ, олокытысь-марысь
шашка но шахмат доскаос выльысь
шедё.
Озьы тӥни артистъёс ваньзы
интыязы ини, дыртытэк
гинэ дӥсясько, грим тыро.
Комнатаын чалмыт. Тӥни
ӵапак со вадьсын отчы шокпотыса
пыре артист Григорий
Потапович Овечкин. Пуксе аслаз
интыяз но шуак тодаз вае:
— Вот ӵӧжныр, гримме
вунэтӥськем.
Саша Тугбаев ӧжытак урдэслань
учке но каллен гинэ
юа:
— Нош йырдэ ӧд вунэты-а?
Комнатаын пуштэм кадь
гурак серектэм кылӥське. Нырысьсэ
ӧвӧл угось Потапычлэн
гримзэ дораз вунэтыса кельтэмез.
Та пумысен ик Саша Тугбаев
солы вераз ни вал:
— Тон лучше йырдэ вунэтыса
кельты, нош гримдэ ноку
эн вунэты. Йыр ми тыныд татын
соку ик шедьтом: ма понна
художникъёс но бутафоръёс?
Нош ик серекъяло.
Тодэ лыктэ на таӵе учыр.
Артист Степан Ш-в репетициын
ӵем дыръя куатаськылэ,
режиссёрлэсь замечаниоссэ
ултӥямен лыдъя. Со пумысен
но Саша Тугбаев вакчияк но
зол вераз:
— Таид кушаса сюдэмез
вите.
Зэмзэ но, коллективын
луыло на сыӵе артистъёс —
вылтӥяськисьёс но ушъяськисьёс.
Театрын шудыны быгатонзы
тырмыт ӧвӧл, нош
олома сямен сыӵеослы ик
бадӟымесь рольёс шедё. Ну,
тодмо ини, спектаклез дасян
дыръя соос режиссёрез воксё
пумаз вутто: куатаськыло, драматургез
курлало, партнёрзэс
тэргало. Я соослы мизансцена
уг яра, я костюм, я мукетыз.
Тӥни сыӵеосын режиссёрлы
нимаз ик трос ужано усе. Котькуд
мизансценаез постановщиклы
аслыз возьматоно луэ,
котькуд фразаез нырысь аслыз
верано луэ. Огкылын вераса,
тэтэ карись пиналэз ветлыны
дышетэм музэн, режиссёр артистэз
сцена вылтӥ китӥз валтыса
нуллэ, ма карыны ваньзэ
ик нырысь ачиз возьматэ.
Артист Степан Ш-в спектакль
дыръя сцена вылысь кулисаос
сьӧры потэ ке, ушъяськытэк
уг чида:
— Адӟиды-а, кыӵе зол
кисьматӥ!..
Саша Тугбаев со ушъяськисьлы
бамаз чабкем кадь
шуиз:
— Тон ай нырысь пыддэ
кутчаны дышетскы.
Артистъёс кема серекъязы
соку. Со дырысь «пыддэ кутчаны
дышетскы» но «куажымзэ
эн сиы» театрын поговоркалы
пӧрмиз. Степан но востэммиз,
шара ушъяськемзэ адӟыны но,
кылыны но ӧз луы ни.
Артистъёс ярато шашкаен
но шахматэн шудыны. Саша
Тугбаев ачиз шер шудылэ,
нош учкыны яратэ. Шахматэн
шудӥсьёс доры мынӥз ке,
одно ик шулдыр «концерт»
луоз. Сое шӧдыса, соку ик отчы
мукетъёсыз но артистъёс люкасько.
Кыӵе шулдыр серекъямъёс
кылӥсько соку отын!..
Саша Тугбаев ачиз гинэ уг серекъя.
Вячеслав Волков — усто артист.
Нош солэн одӥг паймымон
сямыз вань — олокытчы
но чуртнаське, тужгес ик военной
тематикая спектакльёсын.
Помрежлы юрттэм карыса,
пыӵалэн, патронъёсын,
порохен выре. «Кезьыт ошмес»
дыръя патронэз порохен
тырмытыса пышен ӵоктаны
выронназ, молотокен но шуккыны
вуэм. Пуштӥз ук — Вячеславлэн
кык чиньыез ӧвӧл
ни. Вир кошке. А ведь солы
быдэс роль шудоно на — Жиганэз.
Керттылӥзы кизэ Волковлэсь,
озьы ке но сцена вылын
но, кулисаос сьӧрын но
ваньмызлэн мылкыдыз урод.
— Тон, Вячи, — вера Тугбаев,
— театре лыктыкуд, бумагаен
бинялтыса, котлетъёс вай
яке сылалэн пӧзьтэм картофка.
Сюлмыд ке шуг луиз, соку
ик сиськыны пуксьы, сюлмыд
каньыл луоз.
Артистъёс серекъяло, Волков
ачиз но пальпотыны кутске.
Пилем улысь мозмем
бусы кадь, выльысь ваньмыз
югектэ.
Таӵе суред син азе вунонтэм
кылиз. Тани спектакль йылпумъяськиз.
Зрительной залын
алигес гинэ тросаз калык
вал, табере отын буш, ӝомыт,
мӧзмыт. Музыкантъёс но ӧвӧл
ни, кошкиллям. Занавес усьтэмын.
Сцена вылын ужасьёс декорациез
окто но кулиса сьӧры
борддор борды лач-лач тыро.
Мыдлань-азьлань ветло костюмершаос,
бутафор но реквизитор:
кулиса сьӧрысь сцена
вылэ, сцена вылысь кулисаос
сьӧры, собере артистъёслэн
комнатаосазы, отысь костюмерное
яке бутафориосты но
реквизитъёсты возён полуподвальной
помещение.
Артистъёс но дырто. Соосты
гуртазы семьязы вите,
нош куд-огзэ ӝомыт фойеын
гажанъёссы (тросэз артистъёс
бызьымтэ но кышнояськымтэ)
возьмаса диван вылын
пуко. Нош гримез чаляк гинэ
куштыны уг луы. Сое, вазелинэн
зыраса, небыт бумагаен
яке ватаен ӵушылоно. Кык
пол но, куинь пол но зыраськод.
Собере пудрить кароно.
Ымныр гримлэсь мозмем
бере быдэс мугор но капчигес
луэ кадь. Котьку котькинлэсь
азьвыл гримзэ куштыны вуэ
Василий Садовников. Со ини
пальтозэ но дӥсям.
— Ма, кызьы тон озьы туж
ӝог? — паймыса юало артистъёс.
— Солэн площадез пичи,
—ляп гинэ вераса сётэ Саша
Тугбаев.
Ваньмыз ик шулдыр серекъяны
кутско. Сюбег бамзэ
кутылыса, Садовников но серекъя.
«Площадез пичи» — та веран
но театрын поговорка
выллем луыса кошкиз. Кин
рользэ ваньмызлэсь азьвыл
дышетэ ке, серем улсын верало:
«Тынад угось площадед
пичи!»
Сыӵе вал со Саша Тугбаев
эшъёсыз пӧлын, гастрольёс
дыръя сюрес вылын, луд вылын,
возь вылын — кытчы
гинэ Удмурт театр спектаклен
яке концертэн лыктэ. Егит,
веськрес мугоро, сьӧд йырсиё,
сьӧд синкашо, сайкыт ымныро
Саша Тугбаев. Со юн яратэ
вал улонэз!
Удмурт театрлэн коллективез
котьку но трос шефской
концертъёс сётылӥз. Саша Тугбаев
трос выступать карылӥз
со концертъёсын. Ижевской
ТЭЦ-ез лэсьтон дыръя но
отын строительёс азьын Саша
эктӥз, сценкаосын шудылӥз,
хорын кырӟаз. Ваньзэ вераса
но уд быдты! Верховной но
интыысь Советъёсы быръён
кампаниос дыръя, озьы ик
пӧртэм праздникъёсы Саша
Тугбаев мылысь-кыдысь выступать
карылӥз шефской но
общественной концертъёсын.
1941-тӥ арын Государственной
удмурт театр Глазове
мынӥз. Городысь ужаса
улӥсьёс мылысь-кыдысь пумитазы
артистъёсты, соослэсь
спектакльёссэс мылысь-кыдысь
учкизы. Театр ӵемысь
гуртъёсы поталляз. Соослэн
лыктэмзы колхозникъёслы
котьку праздник луылӥз. Егит
артистъёс Саша Тугбаев, Петя
Колесников, Филипп Бобров,
Миша Харин, Ваня Поздеев,
соослэн самой яратоно артистъёссы
вал.
Шӧдтэк шорысь кутскиз
война. Урмем немецко-фашистской
войскоос асьме социалистической
Родинамы
вылэ шимес урдскизы. Соослы
пумит султӥз вань советской
калык. Война кутскем бере
ик тросэз удмурт артистъёс
фронтэ кошкизы. Вордскем
гуртаз бертылыса, фронтэ
кошкиз Саша Тугбаев но. Куинь
арес нылзэ Галяез сюлэм
вылаз ӟыгыртӥз, чупаз, мурмур
лулскиз но шуиз:
— Мон кошкисько, нылы,
тушмонэн жугиськыны. Юн
оскыса мынӥсько, тушмонэз
одно ик вормом. Оскисько,
нылы, тон шудо будод.
Юськиын младшой командиръёсты
дасян курсэз быдтыса,
Саша Тугбаев 28-тӥ августэ
фронтэ кошкиз. Ӟырдыт
жугиськонъёс мыно вал соку
фронтъёсын. Москвалы матын
жугиськон дыръя Саша
Тугбаев бырыны шедиз.
Удмурт калык яратоно артистэзлэсь
Саша Тугбаевлэсь
нимзэ туннэ но мур гажаса
сюлэмаз возе. Со зэмзэ но калыклэн,
оло, самой яратоно
артистэз вал.
Ӧз берытске ни фронтысь,
немецко-фашистской тушмонъёслы
пумит жугиськонын
улонзэс сётӥзы талантливой
удмурт артистъёс Филипп
Бобров, Миша Харин, Ваня
Поздеев но мукетъёсыз. Юн
сӧсырмыса бертӥз одӥгез усто
артист Петя Колесников. Кык
пыдъёсыз ик солэн ӧй вал ни,
театрын ужамез ӧз луы ни.
Кема ӵоже висьыса улэмез бере
1967-тӥ арын со кулӥз. Белофиннъёсын
жугиськон дыръя
геройлыко быриз усто егит удмурт
артист Коля Растегаев.
Дас ар но ужаса ӧз вуттэ
соос театрын, озьы ке но соослэн
нимзы вунонтэм кылемын.
Котькудӥз соос пӧлысь
удмурт спектакльёсын мылысь-кыдысь,
вань кужымзэ,
вань сюлэмзэ сётыса шудӥз.
Соос ваньзы ик туж ярато
вал асьсэлэсь Удмурт театрзэс,
вордскем шаерзэс, асьме
лудъёсты но сяськаясь возьёсты,
шуръёсты но гурезьёсты.
Соос ӟырдыт ярато вал асьме
удмурт калыкез, солэсь кылзэ,
солэсь кырӟанъёссэ, солэсь
выжыкылъёссэ.
Удмурт театрын соос вунонтэм
яркытэсь но кужмоесь,
муресь образъёс кылдытӥзы.
Соос вань егит кужымзэс, егит
даурзэс сётӥзы асьме калык
понна, солэн шудэз но эрикез
понна.
Ноку но уз вунэ устоесь артистъёслэн
но кышкасьтэм воинъёслэн
нимъёссы.
Пумыз.