12 от 31 марта 2022 (25924)

№12 (25924)
18 2022-тӥ ар 31-тӥ южтолэзь
«Выжыкыл» студия
Кырӟан, ӟазег но тӧл
Со вал сӥзьыл. Школаысь
бертӥ, гуртысь ужме
лэсьтӥ, мӧзмыт луиз.
Кыӵе ке конкурсэ, проектэ
пыриськоно шуыса
малпай но «ВКонтактеысь»
иворъёсты учкыны
кутски. Соку тодӥ,
Удмурт театрын «Выжыкыл»
студия ужаны
кутскоз шуыса.
Малпаськыны кутски:
мон театрен нокызьы но ӧй
герӟаськылы, журналист луыны
малпасько. Но студиын
куараез пуктыны, сюлмаськонэз
вормыны, аслад кужымедлы
оскыны дышетозы,
пе. Нош малпаськи: та журналистлы
но кулэ луоз. Анаеным
ӧй но кенешы, куриськонме
лэзи.
Толшоре вуиз ивор, кастинг
ортчоз шуыса. Кыӵе ке номер —
кылбур яке проза — дасяно
луоз. Мон ӟуч верос дышетӥ.
Ӝытлы быдэ синучкон азьын
сое вералляй. Кастингозь
3 нунал кылиз. Кастинг сярысь
иворез нош учконо кариськи,
нуналзэ ӧй-а сура шуыса.
Пыри огинэ. Ваньмыз шонер,
но верос удмурт луыны кулэ
вылэм! Мон бӧрдон калэ вуи:
всё, дышетыса уг вутты ни!
Собере гань-гань кариськи,
Удмурт театрын ужась «Выжыкыл» студия.
выльысь верос утчаны кутски.
«Кенеш» журналысь тупасьсэ
шедьтӥ. 18 пол лыдӟи, собере
синучкон азьын вераны кутски.
Озьы ик дышетӥ.
Кастингозь одӥг нунал кылиз.
Мамае шуиз: ӵужапаед
доры ветлы, со ӟуч кылъя но
литературая дышетӥсь. Мынӥ.
Со валэктӥз, кызьы веросме
шонергес лыдӟоно. 2 час дышетски.
Бертыса уйшорозь веросме
дышетӥ на.
Ӵукнаяз туж вазь султӥ:
эшшо кӧня ке дышетоно на.
Тани вырӟимы Иже: мон куалекъясько,
мама буйгатэ,
ваньмыз пӧрмоз шуыса.
Пыри театре, ярам, кастинге
эше но вуэм. Малпай,
ваньмызлэсь азьло пыро, но
кышкай...
Черодэ вуиз. Пеймыт зал.
Куинь ӝӧк сылэ, отын жюри
пуке. Азязы султӥ, верай: «Марина
Гардасова, Пичи Пурга
ёрос, Гожня гурт». Студилэн
кивалтӥсез, Удмурт театрысь
актёр Константин Никитин
монэ «земляк» шуиз: со но
пургалась.
Веросам 2 пиосмуртъёс
артистлэсь бакчазэ утялтытэк
возё, нош артист соосты
алда, Президент Владимир
Путин картошказэ басьтыны
ӧдъя шуыса. Мадёнме кутскыкум
ик, жюри серекъяны
ӧдъяз. Нош мынам кышкаса
«Выжыкыл» студилэн «ВКонтакте» бамысьтыз
сереме воксё ӧз поты. Собере
косӥзы кырӟаны, ӟазегез
возьматыны, тӧл луыны... Я,
всё. Потыкум юазы на, Гожняысь
Иже занятиосы ветлыны
быгато-а шуыса. Мон
соку ик валай: монэ басьтозы!
Котькуд нунал возьмай
гожтэмзэс. Весь эшелэсь но
юалляй, солы ӧз-а жингыръялэ
на шуыса. Куке-соку ивор
потӥз, мон «Выжыкыл» студие
шеди шуыса. Шумпотӥ!
Нырысетӥ занятие мон
Ижкаре нырысьсэ автобусэн
мынӥ. Ярам коть, сузэреным.
Студие городысь пиналъёс
гинэ шедиллям, мон гинэ
гуртысь. Кӧня ке кышкай. Но,
2-3 пол ветлыса, мон соослы
дыши, эшъяськи.
Али ми дышетском, нош
собере выжыкыл пуктом.
Мыным кельше котькуд занятие.
Умой мылкыдын отысь
потӥсько. Кельше куараме
вошъяны, шудыны, кыӵе ке
пӧйшуръёсты возьматъяны.
Табере малпасько ни, оло,
улонме театрен герӟано?
________
Марина ГАРДАСОВА,
Пичи Пурга ёросысь
Гожня школаысь
8-тӥ классын дышетскись
«Студентъёслэн тулыссы»
Дасяськимы ӵукнаысен ӝытозь
15-тӥ южтолэзе Удмурт кун университетын егитъёслэн яратоно вакытсы
— «Студентъёслэн тулыссы» — кутскиз.
Та конкурсын студентъёс быгатонлыкъёссэс котыр ласянь возьмато:
кырӟало, экто, актёръёс сямен шудо, декорациос лэсьто. Туэ УдГУ-ын конкурс
арня ӵоже мынӥз. Котькуд институт аслэсьтыз постановказэ возьматӥз:
кин ке, сое дасякуз юрттэт курыса, зэмос режиссёръёслы вазиськылӥз, кин
ке усто номеръёс ас кожаз но дасяны быгатӥз.
Студентъёс сяна, та конкурсэз дышетӥсьёс но ярато, егитъёс шоры выль
сямен учко, валало, макем соос пӧртэмесь.
Туэ «Студентъёслэн тулысазы» мон нырысьсэ пыриськи. Азьло уг валаськы
вал, марлэсь постановка пӧрмыны кулэ, мар кароно… Но Удмурт кылосбуръя,
финно-угроведениея но журналистикая институтысь бадӟым курсъёсын
дышетскись эшъёсы ваньзэ пыр-поч веразы. Ваньмы ӵош уж борды
мыло-кыдо басьтӥськимы.
Фестивальлы дасяськыны капчи ик вылымтэ: репетициосы уже кадь
ветлӥмы. Институтысьтым егитъёсын декорациос дасяй, сцена вылын
шудылӥ. Озьы ми ӵукнаысен ӝытозь шутэтскон нуналъёстэк выримы, угось
ӟеч инты басьтэммы туж потэ вал!
«Студентъёслэн тулысазы» котькуд институт 40 минутъем постановка
пуктыны кулэ, ми но та куронъя шудыны малпамы но ужмес «43:34» (43
минут, 34 секунд) нимамы: возьматӥмы, куронъёслэсь тросгес лэсьтыны
быгатӥськомы шуыса.
Фестиваль пӧртэм институтысь студентъёсты огазеяз: ваньзы огогзэс
учкыны ветлӥзы, выступление бере «туж усто пӧрмытӥды!»
шуылӥзы.
Фестивальлэсь гран-приззэ утӥз Социальной коммуникациосъя институт,
1-тӥ инты басьтӥз Искусствоосъя но дизайнъя институт, 2-тӥ — Удмурт
кылосбуръя, финно-угроведениея но журналистикая институт, 3-тӥ — Экономикая
но управлениея институт.
________
Андрей АНТОНОВ
Сценаез егитъёслы усьтэ
«Студентъёслэн тулысазы» Удмурт
кылосбуръя, финно-угроведениея но
журналистикая институтлы постановкаез
дасяны юрттӥз оператор, монтажёр
луыса ужась Павел Аммосов.
— Студентъёсын спектакль пуктыкуд,
кыӵе шуг-секытъёсын пумиськылӥськод?
— Студентъёсын ужаны туж капчи, аслым
но соосын дырме ортчытыны кельше. Секыт
луэ, егитъёс мыным уг оско ке, озьы я тазьы
ӟечгес луоз шуыса. Куддыръя уг валало, макем
мур пуштросо спектакль дасяськомы. Куд-ог
актёръёс туж ӝог йыръёссэс вылӥе ӝуто, ми
ваньзэ быгатӥськомы шуыса.
Павел Аммосов.
— Ку валад, Удмурт кун университетысь егитъёслы «Бадӟым вузлэн
тылъёсыз» но «Студентъёслэн тулыссы» фестивальёслы дасяськыны юрттэмед
потэ шуыса?
— Ӧйтӧд… Сцена вылын шудонлэсь акыльтэме бере, дыр. Бен, мон нырысь
актёр вал. Учкылӥ, кызьы милемын режиссёръёс ужало. Валай, аслам но мае ке
кылдытэме потэ шуыса. «Студентъёслэн тулыссылы» нырысетӥ постановкае
туж капчиен пӧрмиз но, бурдъяськи. Ӵапак таин ик выро малпай. Со дырысен
сцена вылэ ӧй пота ни, уг яратӥськы, трос адямиос шорам учко ке.
— Кыӵе луыны кулэ идеальной режиссёр?
— Уг яратӥськы «идеальной» шуэмез. Мон сое «умой» кылын воштысал. Котькуд
артистлэн аслаз режиссёрез, ваньмызлы уд кельшы. Мон тыршисько постановкаосты
ӟеч пуштросэн тырмытыны, учырез котыр ласянь возьматыны. Умой
режиссёр ассэ учкисьлэн интыяз пуктыны быгатэ, соин ик сюлэмез бугыртэ.
________
Андрей АНТОНОВ
Павел Аммосовлэн архивысьтыз