BÂKÎ DÎVÂNI - e-Kitap

1 Âlâyiş-i dünyâdan el çekmege niyyet var
Yakında ‘ adem dirler bir şehre ‘ azîmet var
2 Uçdı bu fezâlardan mürg-i dil-i nâlânum
Ârâm idemez oldum efkâr-ı seyâhat var
3 Nûş eylese bir ‘ âşık tâ haşre dek ayılmaz
Bezm-i feleküñ bilmem câmında ne hâlet var
4 Bu hâlet ile ey dil sag olmada ‘ âlemde
Derd ü gam-ı dil-ber ile ölmekde letâfet var
5 Gitdükçe harâb eyler mülk-i dil-i vîrânı
Dehrüñ bu cefâsından bir şâha şikâyet var
6 Ser terkine kâ’ildür dünyâya göñül virmez
Terk ehlinüñ ey Bâkî başında sa ’ âdet var
-172-
Fe ’ ilâtün fe ’ ilâtün fe ’ ilâtün fe ’ ilün
1 Göñlümi bende çeken kâkül-i pür-tâb nedür
Cânuma hurde geçen gevher-i nâ-yâb nedür
2 Başuma ‘ ayn-i belâdur şeb-i hecrüñde gözüm
Ne görür rûz-ı visâlüñ ne bilür h v âb nedür
3 Seng-i cevrüñle ne dem dökse göñül şîşesini
Gözlerümden dökilür katre-i nâ-yâb nedür
4 Bahr-i ‘ aşk içre şinâver geçinenler ne bilür
Düşmese çâh-ı zenahdânuña gird-âb nedür
5 Nûr-ı Hakdur çü mezâhirdeki eşya Bâkî
Görinen arada bu sûret-i esbâb nedür
-173-
Mefâ ’ îlün mefâ ’ îlün mefâ ’ îlün mefâ ’ îlün
1 Gönül câm-ı lebüñle sâkıyâ âvâre düşmişdür
Görelden çeşm-i mestüñ hâne-i hammâre düşmişdür
2 Belâ ‘ âşıklara rûz-ı ezelde kısmet oldukda
Tabîbüm derd-i hicrânuñ dil-i bîmâre düşmişdür
152