BÂKÎ DÎVÂNI - e-Kitap

-530-
1 Mu ’ attâr kıldı âfâkı nesîm-i bâd-ı nev-rûzî
Fürûzân oldı hûrşîdüñ çerâg-ı ‘ âlem-efrûzı
2 Dil-i mecnûna şimdi yig gelür leyli nehârından
Olaldan âsitân-bûsuñ şeb-i târîkde rûzî
3 Hakim-i feylesof oldı velî pîr-i hıred olmaz
Mu ’ allim-hâne-i ‘ aşkuñ dahı tıfl-ı nev-âmûzı
4 Bize esrârını açmaz meye ta ’ n itmeden geçmez
Gel ey sâkî geçür bundan bu ‘ akl-ı dâniş-endûzı
5 Gözümün katresinden şîşeler toldı derûnumda
Mahabbet tâkini tâ kim diküpdür tîr-i dil-dûzı
6 Şu ‘ âşık kim visâlüñ mîvesinden ârzû eyler
Nihâl-i kâmet-i nîzen gerek zihninde merkûzi
7 Sabâ hâk-i rehin bûs itdi mugber oldun ey ‘ âşık
Gubâr-ı hatt-ı müşgîni belürsin göresin tozı
8 Derûna şu ’ le saldı tîg-i âteş-tâbı gûyâ kim
Hudâvend-i cihânuñ berk-i şemşîr-i cihân-sûzı
9 Diler Bâkî Hudâdan ol hudâvend-i cihân-dâna
Bekâ-yı baht-ı bih-rûzı devâm-ı feth-i fîrûzı
10 Nizâm-ı devletüñ dâ ’ im hıyâm-ı rif ’ atüñ kâ ’ im
Cihâna sâye saldukça bu ‘ âlî çetr-i zer-dûzî
-531-
1 Hattum hisâbın bil didüñ gavgâlara salduñ beni
Zülfüm hayâlin kıl didüñ sevdâlara salduñ beni
2 Geh âb-veş giryân idüp geh bâd-veş püyân idüp
Mecnûn-ı ser-gerdân idüp sahrâlara salduñ beni
3 Vaslum dilersin çün didüñ lutf idüben olsun didüñ
Yarın didün bir gün didüñ ferdâlara salduñ beni
4 Yûsuf gibi ‘ izzetde sen Ya ’ kûb-veş mihnetde ben
Dil sâkin-i Beytü’l-hazen tenhâlara salduñ beni
5 Bâkî-sıfat virdüñ elem itdün gözüm yaşını yem
Kılduñ garîk-i bahr-i gam deryâlara salduñ beni
306