BÂKÎ DÎVÂNI - e-Kitap

4 Göñül çeng-i mahabbetde yine şabr itse mümkindür
Reg-i cân lîk zahm-i nâhun-ı hicrâne katlanmaz
5 Yiter hatt u ruh-ı sâkî bu bezme zînet ey Bâkî
Kadeh nûş it ki dil vakt-i gül ü reyhâne katlanmaz
-197-
Fe ’ ilâtün mefâ ’ ilün fe ’ ilün
1 Her nefes dûd-ı âha mensûbuz
Ya ’ nî dûd-ı siyâha mensûbuz
2 Tûtiyâ-yı basar letâfetde
Yine bir hâk-i râha mensûbuz
3 Kevkeb-i bahtumuz sa ’ îd olmaz
Çünki baht-ı siyâha mensûbuz
4 Gayra baş egmesek ‘ aceb midür
İşigi secdegâha mensûbuz
5 Yakamaz bedr-i âfitâb-ı sitem
Bir yüce bârgâha mensûbuz
6 Cünd-i gam şâhısın ne gam Bâkî
Bunca hayl ü sipâha mensûbuz
-198-
Mefâ ’ îlün fe ’ ilâtün mefâ ’ îlün fe ’ ilün
1 Bisât-ı ‘ ayşa kadem basdı nâz ile nev-rûz
Şükûfe perde-sarây-ı ‘ ademden itdi bürûz
2 Ne hûb-dem ne kıyâmet-zamân olur bu kim
Nücûm indi yire yir yüzine çıkdı künûz
3 Hemîşe hurrem ü handân elinde sâgar-ı zer
Felekde olmaya gün gibi rind-i ‘ âlem-sûz
4 Togarsa matla ’ -ı subh-ı safâdan ol meh-rû
Zehî sitâre-i ferhunde tâli ’ -i fîrüz
5 Henüz gonca murâkıb derûn-ı perdede gül
Ümîd bu ki ide ‘ an-karîb keşf-i rümûz
6 Cemâl-i yâre nazar kıl derûnuñ it rûşen
Ki nûr-bahşdur ol tal ‘ at-i cihân-efrûz
163