BÂKÎ DÎVÂNI - e-Kitap

3 Buldı zînet lü ’ lu-yı şehvâr-ı şeb-nemden yine
Tâc-ı la ’ l-i gonca vü taht-ı zümürrüd-fâm-ı gül
4 Savt-ı mürg u na ’ re-i mestâne tutdı ‘ âlemi
Hâsılı hengâmeden hâlî degül hengâm-ı gül
5 Zikr-i hüsn ü vasf-ı ruhsâruñla herkes âşinâ
Yâda gelmez ruhlaruñ devrinde ammâ nâm-ı gül
6 Bezme gelse bir dem eglenmez gider ol gonca-leb
Az olur gülşende gâyet müddet-i ârâm-ı gül
7 Sâgar-ı gül-gûn-ı ‘ işret vâye-i Kâvûs-ı hâr
Hançer-i hâr-ı melâmet behre-i Behrâm-ı gül
8 Bâkıyâ devrân sitemger çarh bî-rahm olmasa
Pister-i hâr üzre n ’ eyler nâzenîn endâm-ı gül
-287-
Mef ’ ûlü fâ ’ ilâtü mefâ ’ îlü fâ ’ ilün
1 Devr-i gül irdi gonca- ’ sıfat olma teng-dil
‘ Azm eyle tarf-ı gülşene gül gibi gül açıl
2 İtdi nisâr ‘ âleme kef-i nesîm sîm
Gülşende şâh-ı gül gibi sen de dökil saçıl
3 Deryâ-yı ahdar oldı çemen mevc urup yatur
Rûy-ı zemîni fasl-ı bahâr itdi yem yeşil
4 Bahs eyleme ‘ izâr-ı ‘ arak-rîz-i yâr ile
Yüzüñ suyıyla ey gül-i ter yüri var açıl
5 Sahn-ı çemende nefha-i bâd-ı bahâr ile
Bâkî gül-âb u gâliye misk oldı âb u gil
-288-
Mef ’ ûlü fâ ’ ilâtü mefâ ’ îlü fâ ’ ilün
1 Kaddüñ nihâli hem-ser-i serv-i sehî degül
Tûbâyı alma sâyeñe ol kûtehi degül
2 Kevn ü mekânı şevk-i ruhuñ şöyle tutdı kim
Hûrşîdi kimse zerreye saymaz mehi degül
3 Sultân-ı çâr-bâliş-i iklîm-i dehre dil
Kemter gedânı beñzedemez sen şehi degül
202