BÂKÎ DÎVÂNI - e-Kitap

-353-
Mefâ ’ îlün mefâ ’ îlün mefâ ’ îlün mefâ ’ îlün
1 Saçuñ zencîrine bend it dil-i âvâre eglensün
Mukayyed kıl biraz ol zülf-i müşgîn-târe eglensün
2 Dil ü cân nâleler kılsun reg ü pey virsün âvâze
Tek olsun yâr mâ ’ il nagme-i evtâre eglensün
3 Dehânuñ teng-i sükker iki şekker-pâredür la ’ lüñ
Sun ey cân ‘ âşık-ı zâra hele bir pâre eglensün
4 Ruhuñ seyr itdür ey rûy-ı zemînüñ mâh-ı tâbânı
Biraz baksun felekden seb ’ a-i seyyâre eglensün
5 Leb-i şîrîni vasfında ‘ aceb rengîn gazel düşdi
Okun bu şi ’ ri tûtî-i şeker-güftâre eglensün
6 Şarâb-ı dil-güşâ egler dil-i mehcûrı ey Bâkî
İlet ol derdmendi hâne-i hammâre eglensün
-354-
Fe ’ ilâtün fe ’ ilâtün fe ’ ilâtün fe ’ ilün
1 Tende bir kühne kabâ elde biraz nân olsun
‘ Âşık-ı bî-ser ü pâ başına sultân olsun
2 Yüri ey bâd elüñ kendüñe çek zülfinden
Nice bir hâtır-ı ‘ uşşâk perîşân olsun
3 Ruhlaruñ şevkine matla ’ diyelüm kâfiyeler
Mâh-ı tâbân ile hûrşîd-i dırahşân olsun
4 Kâmetüñ yâdına bir âh ideyin kim dûdı
Gülşen-i ‘ aşkuña bir serv-i hırâmân olsun
5 Bâkıyâ söyle biraz lebleri esrârından
Ehl-i dil nazm-ı dil-avîzüñe hayrân olsun
-355-
Fâ ’ ilâtün fâ ’ ilâtün fâ ’ ilâtün fâ ’ ilün
1 Gün yüzin hem gösterür hem dir göze nem gelmesün
Çeşme-i çeşme nice eşk-i dem-â-dem gelmesün
2 Sâz-ı âhum baña bes bülbül gerekmez hem-nefes
Nây-i nâlem var iken bir dahı hem-dem gelmesün
3 Tâlib-i dîdâr iseñ mir ’ ât-ı kalbüñ sâf tut
Hâtırâ endîşe-i cennet cehennem gelmesün
231