bunge la tanzania

12 APRILI, 2012
Na. 31
Ruzuku ya Fidia ya Vyanzo vya Mapato
MHE. VITA R. KAWAWA aliuliza:-
Ruzuku ya fidia ya vyanzo vya mapato iliondolewa bila
maelezo. Je, Serikali haioni kuwa Halmasdhauri zitashindwa
kutekeleza malengo yaliyopangwa kutokana na vyanzo hivyo?
NAIBU WAZIRI WA FEDHA (MHE. GREGORY G. TEU) alijibu:-
Mheshimiwa Naibu Spika, kwa niaba ya Waziri wa Fedha,
napenda kujibu swali la Mheshimiwa Vita Rashid Kawawa,
Mbunge wa Jimbo la Namtumbo, kama ifuatavyo:-
Mheshimiwa Naibu Spika, ruzuku ya fidia ya vyanzo vya
mapato katika Halmashauri ilipunguzwa kwa jumla ya shilingi
49.1 bilioni kutoka shilingi 59.9 bilioni mwaka 2010/2011 hadi
shilingi 10.8 bilioni mwaka 2011/2012. Punguzo hilo lilitokana na
mpango wa Serikali kupitia mchakato wa Bajeti ya mwaka wa
2011/2012 wa kurejesha utaratibu wa kulipa ada ya leseni za
biashara kila mwaka katika ngazi za vijiji, kata, wilaya, miji,
manispaa na majiji.
Mapendekezo haya yalitarajiwa kuongeza mapato ya
Halmashauri kwa jumla ya shilingi 120.0 bilioni. Kiasi hiki ni
kikubwa ukilinganisha na ruzuku iliyokuwa inatolewa na Serikali
Kuu ya shilingi 59.9 bilioni.
Mheshimiwa Naibu Spika, hata hivyo, baada ya
kutathimini athari za kupunguzwa kiwango hicho cha ruzuku na
kwa kuwa Halmashauri zimeshindwa kufikia malengo yao,
Serikali italeta pendekezo kwenye Bajeti ya kurejesha tena
ruzuku ya fidia ya mapato ya Halmashauri katika mwaka wa
fedha 2012/2013.
24