ingozh №03

№10 (25871)
16 2021-тӥ ар 18-тӥ южтолэзь
Кылбур сузьет
Ӧй но вуриськы, ӧй но керттӥськы…
Удмурт нылкышно — удмурт нылкышно сярысь
Шундыё нылаш
Галина КРАЕВА.
Вавож ёросысь Ӟозлуд гурт
Та пужыез маин быдтод?
Сапта чебер бамме.
Куаляк пилё синучконме,
Уг учкы ни асме!
* * *
Зоя ЛЕКОМЦЕВА.
Кез ёросысь Пажманпочинка гурт
Уй. Пеймыт. Ӝожомем егит ныл
Весь вите яратон туганзэ.
Нош соиз куаразэ, дыр, уг кыл —
Ныл ялан ӵушылэ синвузэ.
Улмопу
Людмила РУДИНА.
Шаркан ёросысь Пороз гурт
Улмопу но тани пересьмем.
Одӥгез улваез но куасьмем,
Сулэз но быдэс куалдылэм —
Арлыдо адями кадь луэм.
* * *
Наталия КЛИМОВА.
Сюмси черкогурт
Воректӥз… Пиштӥз… Кысӥз…
Улонэ, вылды, ортчиз.
Тылобурдо кадь, инмын
Лобаны мон кылдэмын.
Анай шуэ: «Йӧлпыд юрттоз,
Ӝытбыт зыра соин».
Нукыртыса ожмаськисько,
Ма, мар каром таин?
Тыр толэзь, уяса пеймытын,
Буйгатэ нылашлэсь сюлэмзэ.
Тодысал ке, кытын туганэз,
Тугасал, дыр, али йырсизэ.
Мон ачим но солы укшасько,
Висёнъёс но бордам лякисько.
Ымныры, киосы гожмамын,
Йырсие пужмерен басьтэмын.
Музъем вылын туж секыт,
Омырын поръян лякыт.
Бурдъёсме тӥялтӥзы,
Вань улонме быдтӥзы.
Ортчо аръёс. Чырс сюкасен
Зыраллясько бамме.
Бадӟым будӥ — весь бӧрдӥсько
Пужыосын сэрен.
Кизили, лыз инмысь васькыса,
Йӧтскысал нылашлэн гадь бордаз.
Бамысьтыз синвузэ ӵушыса,
Чупасал льӧль-ӵыжыт ымдураз.
Но сётэ на туннэ емышсэ
Бакчаям сяськаясь писпуэ.
Аслам но тырмоз на кужмы
Ӟечсэ калыклы лэсьтыны.
Лыз ин улын ветлӥсько,
Уйвӧтам нош лобасько.
Кырсь омырен шокаса,
Каллен, лэся, бырисько.
Ульча кузя мон васькисько,
Азям шедиз Семи.
Монэ лӧпкытыса, шуэ:
«Натӥ, кыӵе мӧзми!»
Пеймыт уй, жаляса нылашез,
Туганзэ шедьтыны оскытӥз.
Маялтӥз шыпытак йырсизэ,
Сипыртӥз но… ышиз.
* * *
Мария ПОЗДЕЕВА.
Дэбес черкогурт
Туж чырткем мон адями:
Эктыны ке потӥсько,
Музъемез зуркатӥсько.
Воректӥз… Пиштӥз… Кысӥз...
Улонэ, лэся, ортчиз.
Но, бурдо сямен, инмын
Лобаны мон кылдэмын!
* * *
Шуныт кылъёс вера мыным,
Яратонэз — синмаз.
Та шундыё пужыосме
Шӧдтэк шорысь чупаз.
Витьтон арес мыным луиз,
Кутӥ синучконэз.
Жаль потыса бамам учки:
Ӧвӧл ни пужыез.
Оло шунды кутэм сое,
Оло ортчем аръёс.
Сяська кадь вал чебер соос…
Котмо кӧсыт бамъёс.
Мария ПЕТРОВА.
Менделеевск город
— Ӧй но вуриськы,
Ӧй но керттӥськы,
Ӧй но чильпаськы —
Кылбурай.
Ӧй но мерттӥськы,
Ӧй но уриськы,
Ӧй но пӧраськы —
Кыл малпай.
— Мар, ужлы паймид-а?
* * *
Надежда ИВАНОВА.
Можга ёросысь Гозег гурт
Дыр ортчиз, тон, меми, пересьмид,
Возьысал на тонэ ас бордам.
Кемалась мон ачим но анай,
Трос полэс ни шудо песянай.
Тон ӧвӧл ни, меми, мон вӧзын,
Инмысен учкиськод ми шоры.
Вужерен ми сьӧры ветлӥськод —
Тодӥсько, милемыз утиськод.
Сюлэмлэн сэрегыз нош пӧзе,
Со ассэ янгыше уськытэ.
Мугордэ позыръясь висёндэ
Йӧнатын мон ӧй быгат, шуэ.
Визьнодась кылъёстэ веракуд,
Мон асме туж визьмо кожалляй.
Син шоры мӧзмыса учкыкуд,
Шумпотон мон ӧй сёты, валай.
Возьдаськи мон, меми, вераны,
Сюлэмдэ шунтыны кылыным.
Дыр ӧй шедьты вӧзад пукыны,
Кытчы ке но кулэ кошкыны.
Нокызьы вождэ эн вай, меми —
Ми тонэ умоен малпалом.
Котьку, ӵук иземысь султыку,
Инмарлы тон понна йыбырттом.
Быгатӥсько кырӟаны.
Кырӟасько ке кырӟасько —
Сикысь гондырез уллясько!
Мон дэрем аслым вури,
Сöзулзэ кырыж вандӥ.
Ух, сöзулзэ кырыж вандӥ!
Эмезян тэле мынӥ,
Кудӟытозь эмезь сии.
Ух, кудӟытозь эмезь октӥ!
Картэлы мон шыд пöзьтӥ —
Пунылы ваньзэ кисьтӥ.
Бакчаям кешыр кизи…
Интыяз турын будӥз.
Курег гидэ мон потӥ —
Курегпуз, пӧй, эскеро.
Кудыын петок пуке,
«Курегпуз пузай», — шуэ.
Эктӥсько но кырӟасько,
Гурт калыкез паймытско.
Ух, гурт калыкез паймытско!
* * *
Людмила ГИРБАСОВА.
Алнаш ёросысь Азамат гурт
Воляын ворттылӥсь тыр валъёс кадь,
Мон ачим но али эрикын!
Ужаны мыноно но ӧвӧл ни,
Бергасько, пӧрасько гур азьын.
Сюлэмы шып гинэ кылзӥське но
Гожтылэм чуръёсам бырйиське.
Улонлэсь шудбурзэ омыртэ но,
Азьланьлы нош кужым люкаське.
Ой, майбыр ик луиз улонэ ук!
Интернет четлыказ ни кыске...
Куддыръя кузпалы ӝожтӥське ик:
Вунэтын, пе, кутскид ни монэ.
Выль шудон шедьтэм тэшкылиез кадь,
Интернет улонме буйгатэ.
Я, огшап нош пыро вотэсэ ай —
Выль ивор туж потэ тодэме!
Туспуктӥз Максим ЕГОРОВ