ingozh №03

№10 (25871)
2021-тӥ ар 18-тӥ южтолэзь 17
Кылбурет дунне
Сяськаялоз нылкышно дауре!
Эгра ёросысь Чутыр черкогуртысь Светлана Поторочиналэн чуръёсыз
Пӧсьтэм чидан
Пересьёс шуо: «Чида!»
Улон, пе, озьы дышетэ.
Чидан — со андан?
Ӧвӧл! Корт но пӧсьтэ.
Трос-а басьтод чидаса,
Лулдэ четлыкын возьыса?
Коть зарни мед луоз кортнэтэз —
Уд думы вӧлскись мылкыдэз!
Шоканы куриськоз омыре,
Потоз со кыре.
Нош ӧз шедьты ке ӧс —
Куасьмоз но быроз!
Сӥзьыла
Урамын сӥзьыла…
Пересьмон, лэся, ӧсам йыга…
Омырын лобась вотэсъёс сямен,
Азвесь сӥньысэн чеберма йырсиме.
Гырем му вылэ кылись гожъёсын
Кисыри пуксе бамъёсам.
Сӥзьыла…
Вож гужемлэн егит дырыз ортче.
Берга, сӥсъя, поръя, усе…
Сылме, пурӟе, бӧрдэ, пуксе —
Озьы но яра кинлы ке.
Зоре, шапыкъя, быльыра, ӟизыра…
Кутскыса ведра дурын кисьтэ.
Шундыед пальыша, кырмыштэ,
Уг шунты, чуп гинэ каре.
Сайяське, ватӥське, палэнске,
Бызись ныл кадь, вогъяське.
Зарниен ворекъя но мальдэ.
Кин тодэ: серекъя я бӧрдэ…
Портэ, сутэ, йыръе
Пуш ласянь малпан.
Инкуазьлэн пырыез —
Лулы — озьы ик со вань!
Урамын сӥзьыла…
Пересьмон, лэся, ӧсам йыга…
Сюлмы кӧбера: ӧжыт ӝега! —
Мед тэлеӟоз кизем турынэ,
Пушъёз вордскем яратонэ.
Зороз, пельскоз,
Урмыса сульпаськоз,
Кезьытскоз но толмоз.
Оло, соку мылкыды воштӥськоз,
Йӧӟектэм лулы шунтӥськоз.
Вӧлскоз, пурӟоз, шараяськоз
Ӝокаса улэм чебере.
Сяськаялоз нылкышно дауре!
Кузьым
Уг, уг кузьма, дыр, сяська —
Укыр ӝог куасьме.
Инмысь кизили но усе —
Уг ву вераса малпанме.
Бен мае кузьмалом мон иське?
Акылес зорлэсь инбам пилиське.
…Оло нош — сюлэмме?
Дыр ортчемъя со юнгес яратэ.
Ӟеч сям
Аслым ачим ӟеч сям пыӵатӥсько:
Кӧльыен ке лэзё мон шоры —
Нянен пумитасько.
Ӧч карыса уродэзлы,
Та дуннеын мон улӥсько.
Кыл кутон нунал
Ваньмы понна вуоз.
Оло, соку, небӟем мактал,
Ӟеч сямме тодазы ваёзы,
Нянь колдызэс шори люкозы.
Монэн ке ӧз —нылпиеным,
Я мед озьы луоз.
Ӟеч сям та улонын
Вормисе потоз.
* * *
Вылыз кильтро, пушкыз колтро.
Чагыресь я пурысесь синъёс —
Синвуэн ке гылтымтэ соос,
Уз лу отын тылгизьыез —
Бордаз уз кыскы чеберез.
Весь мыняса улӥсь муртлы
Синмаськонэз ӧвӧл:
Уз быгат жаляны,
Уз усьты сюлэмзэ вӧл-вӧл.
«Тусыд мед луоз огшоры,
Сюлмад медло шунды пыры, —
Ӵемысь анае вералля, —
Адямиез, пе, учко сямызъя».
Ныл юон
Ури-бери ортче та гужем,
Сяськаясь ныл дыр выллем.
Син куспын туссэ воштэ —
Тодма на кышномуртэ!
Пирдан сандыксэ усьтыса,
Зарниям дэремзэ поттэм.
Ортчем даурзэ малпаса,
Мӧзмыт гурзэ мытэм.
Лыктэ, дыртэ, куноос,
Сюлмысь вераськом асьмеос.
Ӝӧк выл тыр сиён-юон —
Инкуазьлэн но туннэ ныл юон.
Бер потэм чипы
Бер потэм чипы
Луэ, пе, туж шудо.
«Зумытэз — бер куръясьлы», —
Калыкын шуо.
Пегась шундылэсь шунытсэ
Кырымпыдэсаз со октэ.
Пичи шудэзлы оскыса,
Бадӟым улонэ вамыштэ.
Шумпотэ улос
Чебер сӥзьыл куазьлы.
Улом ай асьмеос,
Ӧч карыса ваньмызлы.
Оломар но луэ инкуазьын —
Мын но вала сое тон.
Арлыдо муртъёс куспын
Юнгес луэ яратон.
Туспуктӥз Максим ЕГОРОВ