ingozh №03

№10 (25871)
18 2021-тӥ ар 18-тӥ южтолэзь
Повестьысь люкетъёс
Кӧтерын
Мария ВЕКШИНА
писатель, «Удмурт дунне» газетысь
корреспондент
Котькытчы
вуттӥськись баӵко
Черкмы гуртамы ӝутэмын
калык сюлмаськемен. Вашкала
дыръёсы гурт шорын ик
вырйылын туж чебер, ӝикыт
гинэ пу юрт сылӥз, но совето
вакытэ со колхоз кенос
луиз, собере ӝуаз. Пеньӟем
бамалэ сиреньёс мерттӥзы,
шораз Быдӟым ож вакытэ
бырем солдатъёслы синпелет
пуктӥзы. Нош оскисьёс черке
ог 20 иськеме палэнэ мукет
гуртэ ветлылӥзы.
Ог 10 ар талэсь азьло Сандыр
Марпа оскисьёсты люказ
но шуиз: ойдолэ черк пуктомы,
гуртъёсын кемалась асьсэ
коже черкъёс ӝуто ни. Ярам,
колхозмы узыр, со вылэ ик та
ныпъет усиз ни. 2 ар куспын
туж чебер черк ӝутскиз. Ёросамы
таӵе чебер черкъёсты,
райцентрысь сяна, адӟылэме
ӧвӧл. Зэм, зэм. Калык но бичаськиз,
ачиз лэсьтӥськыны
потаз, али котыраз сяська
мерттылэ, службае лыктэмъёсты
сиёнэн утялтэ. Мар меда
сыӵе зол огазея на калыкез,
черк котырын берган сяна?
Олокытысь-марысь баӵкоез
шедьтӥзы. Со ар пала
службае ветлылӥз, кенакъёс
сое туж яратӥзы. Уго котькуд
юанзылы ӝот-ӝот валэктон
сётъялляз, служба бере кема
вераськыса, визь-кенеш сётъяса
улӥз. Ачим но сое дырындырын
адӟылӥ. Службаосы
ӵукна рейсовой автобусэн
вуэ вал, мон со вакытэ пудо
поттыны учыралляй: скалмес
электропастуке нуисько,
баӵко черке лаш-лаш тубе.
О-о! Клубысь дискотека
дыръя баӵкоез адӟыса, интыям
тыпак дугдӥ. Паймыса
ымме но ворсаме, паллянэ но,
буре но кожеме уг луы ни.
— Адӟид-а, адӟид-а? —
китӥм кутыса, шуиз Одок
эше.
— Ага, — йырыным гинэ
шонтӥ.
— Кызьы озьы?
— Луылэ, лэся, — шуисько,
аслам паймеме весь ымнырам
ай.
Охо-хо, баӵко гуртысьтымы
Лизоклы синмаськем ук.
Огшоры адями сямен, штан,
футболка дӥсям но клубе
потэм. Одӥг субботае вуиз,
мукет субботае потӥз, куи нетӥ
субботае лыктӥз. Лизок солэсь
пегаз, пегаз но сётскиз.
Сюан лэсьтӥзы. Собере
Лизок пинал вайиз. Нош
баӵко со дырысен черкамы
ӧз ветлы ни: тазьы дауртэмзэ
тодыса, черкысь куштӥллям.
Эх, корка но пуктыса, машина
но басьтыса ӧз вутты.
Та учыр бере кабинетам
малпаськыса пукисько: осконын
трос саклык висъяське
прощение куронлы но адямиосты
прощать каронлы. Кӧня
пол меда мон улонын уродзэ
лэсьтӥ? Нош кӧня пол меда
мон ачим прощение курылӥ
но простить карылӥ? Маке
уродзэ кари ке, кӧня асме сиё,
аслэсьтым инмарме пыкыло,
но куро меда прощение? Чылкытатскоз
меда солэсь мынам
лулы?
Удмурт кылын «прощение»
кыл но малы ке ӧвӧл,
озьыен, удмуртлы со кулэ ӧй
вал. Со шуэ гинэ: вождэ эн
вайы. Мон янгышай, зэм, табере
мар карод, но тон только
вождэ эн вайы, ява. Удмурт
инмаръёсызлэсь, воршудэзлэсь
курылэ гинэ: сёт ӟеч
куазь, ӟеч емыш, трос нылпи,
шуд, тазалык… Но со понна
тау каре!
— Тодӥськод на-а
нырысетӥ баӵкомес? — огпол
шуэ Одоке.
— Кызьы сое вунэтод!
— Сое черке берен кутӥллям,
бускель гуртын ужа.
Кошке татысь!
Одокелэн нылыз ворд
скемез дырысен керӟегъяськемысь
но висемысь
ӧз дугдылы на. Одок но соин
йырин дото керӟег луиз ни.
Малпаз нылзэ пелляськись
доры нуллыны. Арлыдо кышномурт,
вож нуныез гур сьӧры
нуыса, мар ке дарманьтӥз но,
ныл бӧрдонзэ вунэтӥз. Но висемысь
ӧз дугды. Табере, пе,
черке пыртоно.
— Орина, луод-а киросной?
— вазиськиз со мыным.
— Луо но, только нылдэ пиелы
кышно уг басьты!
— Ха-ха, яратыны кылдӥз
ке но-а?
— Шудтэм яратон умойлы
ӧвӧл.
Озьы ми Йӧвылэсултон
нуналэ черке мыныны кенешим.
Ӵукна 9 часлы, пе, лыктоно,
бере кылёно ӧвӧл. Черк
пушкын трос ик калыкез ӧй
вал. Ми вуыку, служба быремын
вал ни, но калык баӵко
дорысь кошкыны уг дырты,
мар но со юалляське, вераськемез
потэ.
— Ӵемгес черке ветлэ, соку
ваньмыз умой луоз, — шуиз
баӵко но калыкез улляны кутскиз:
— Мынам туннэ туж трос
уже вань на. Тани пиналъёс
возьмало.
Оскисьёс потон пала каллен-каллен
вамыштыны кутскизы,
тросэз сиськон висъетэ
кожизы, сьӧразы кин кыӵе
пӧрамъёс вайиллям, черкын
ужасьёс шыд пӧзьтӥллям.
— Мар лыктӥды? — азяз
султэммы бере юаз милесьтым
баӵко.
— Нылме черке пыртэме
потэ вал, — шуэ Одок.
— Ачид бон черке
ветлӥськод-а? Огпол но службаысь
адӟеме ӧвӧл, — лек вазиз
баӵко.
Одок мар вазьыны ӧз вала.
Баӵко азьланьтӥз:
— Нылпилэн лулыз чылкыт
ай, мар юнме черке пыртод?
Будӥз ке, ачиз тодоз, пыроно
яке ӧвӧл. Али коть уксёдэ
шыръялод. Малпаськы!
Одок лэзем синъёссэ ӝу тӥз
но баӵко шоры учкиз. Баӵко
нош со дыре мыным вазиз:
— Нош тӥ киросной анай?
— Ы-ы, — шуисько.
— «Символ Веры»
вӧсяськонэз коть тодӥськоды-а?
— Тодӥсько.
— Лыдӟе, — шуэ.
— Тодӥсько, но наизусть уг,
— шуисько.
— Нош кироснойлэн кыӵе
ужпумез?
— Нылпиез Инмар доры
вуттыны, соин эшъяськытыны,
— шуисько.
— Нош ачид эшъяськиськод-а?
— нош юа. —
Тонэ но огпол но службаысь
адӟеме ӧвӧл, нош клубысь —
вань!
Ой, мынам пушкы
пӧзьыны кутскиз ни. Уг чида
ни, кожасько вал, тани ваньзэ,
мар малпасько, верало. Одокез
гажаме гинэ кутӥз.
— Кошке татысь! — шуак
кеськиз баӵко но, алтарь пала
берытскыса, кирос понӥз.
Ми мар карыны ӧм валалэ.
— Мар сылӥськоды? Нырысь
асьтэос черке ветлыны
кутске, причастие басьтэ,
«Символ Веры» дышетэ. Собере
адӟом.
Улляз милемыз баӵко.
Керпотыса но выльысь
лыктӥмы, 2 арня ортчыса.
Одок пыр-поч дасяськиз.
Нырысетӥ арнязэ службае
ветлӥз, причастие басьтӥз,
мукетаз ачиз но «Символ
Веры» вӧсяськонэз дышетӥз,
монэ но чаклаз. Остэ, Инмаре,
арня дышетыны выри!
Кыл сьӧлтаське вал ни. Табере
черке ветлылытэк ӧвӧл.
Озьы службае мыныны
малпай. Служба быриз ке,
баӵкоен синмысь синме верасько.
Служба ӝог ортчиз. Котьку
сямен, калыклэн ӝог кошкемез
уг поты, баӵкоен вераськыны
мерске.
— Ми черке ветлӥськом
ке но, нокин милемыз Инмар
азьын кыл кутонлэсь уг
мозмыты, — юанъёслы валэктэ
баӵко. — Туж чылкытэсь
луимы ке но, всё равно
куломы. Нош кытчы сюромы:
рае яке адэ? Со котькудды
бордысь потэ. Соин ик
пересьмемдэс возьмано ӧвӧл,
черке арнялы быдэ ке но ветлоно.
Макем вазьгес чылкытатскыны
кутскиды, сокем
умойгес. Малы ке нуналлы
быдэ сиськыны, мисьтаськыны
вуттӥськоды ук. Сиён
пӧраны быгатӥськоды, нош
Инмарлы вӧсяськыны малы
уд быгатӥське?
— Пӧраськыны милемыз
анаймы дышетӥз, нош черке
ветлыны — ӧз, — меӵкытӥ
мон.
Баӵко шорам учкиз но вазиз:
— Черке сюлэм вайыны
кулэ. Малы ми черке
лыктӥськомы? Юрттэт кулэ
луыку. Улонамы урод учыр луэ
ке, кытысь ке утиськон утчаны
кутскиськомы. Инмарлэсь
весь куриськомы, куриськомы.
Нош уд малпаське-а,
солы, юрттэт курем интые,
йыбырттыны, маке сётыны
кулэ шуыса?
Баӵколэн со вакытэ телефонэз
жингыртыны кутскиз.
— Ачим телефонэн вырисьёсты
тышкаськисько, нош
аслам жингыртэ, — мынектӥз
баӵко но телефонзэ кутӥз, вераськемез
бере ваньзылы вазиськиз
на: — Всё, кошкытэк
ӧвӧл, сузэр-апайёс. Бускель
гуртын возьмало. Отысь черке
тӥ мында но уз лыктэ, дыр.
Верай ке, мамында Кӧтерын
люкаськылӥзы шуыса, вожъяськозы
ни.
Баӵко дӥсяськиз, бадӟым
«Лэнд Крузер» машинаяз пуксиз
но кошкиз.
Вакчияк вераса, баӵко
Одок лэсь нылзэ черке пыртӥз
ик. Со понна оло шоккетыса,
оло зэмзэ виски куриз на.
10 сюрс манет тыр
яратон
Понедельнике котьку сямен
ужаны потӥ, учкисько но
— укно пилемын.
— Нош ик сюроз!
Кивалтӥсьмы вуиз ни,
дыр. Клубе пырытэк ик, пиялаосты
октыны кутски, со
куспын оломалы гинэ йырме
берыктыны шедьтӥ: сиреньёс
пӧлын Сяська Олён пуке.
— Тон малы татын пукиськод?
— юасько Олёнлэсь.
— Бертыны возьдаськисько.
Сяська Олён — веськрес
мугоро, суд йырсиё, пеймыт
синмо чебер нылаш. Сяська
кадь ворпо дӥсяське, соин
ик сое Сяська Олён гинэ шуо.
Нылмурт али гинэ Иже дышетскыны
пыриз, калтыртыны
потаны кутскиз. Вакчияк
вераса, али улонэз шӧмъя.
Но туннэ уйин сое золгес ик
веръям: синулаз лыз-вож синяк.
Ымныр туссэ адӟыса, сюлмы
гинэ ӧз, мугоры ик шымырскиз.
— Нылъёсын-а, мар-а жугиськид?
— юасько.
— Ӧй.
Олёнэз кунултӥ, ӝутскыны
юрттӥ, клубе пыртӥ, чай юон
висъетын шуныт ву понӥ.
— Ю но вера, капчигес
луоз! — шуисько.
Олён бӧрдыны кутскиз.
Буйгаз но, дырын-дырын
викышъяса, мадиз. Мон, тусме
сак карыса, кылзӥ. Таӵеез
туала улонын луэ на шат?
Олён яратэм одӥг пияшез,
соиз но, лэся. Но одӥг «ноэз»
вань: со пияш кышнояськемын,
нылпиез али вордскиз.
Озьы ке но Олён со пияшен
ар пала ӵошен калтырто ни.
— Малы уд кошкиськы
кышноед дорысь, весь юасько,
— шуэ Олён. — Нош со
мыным шуэ: кызьы? Мон
сое но яратӥсько ук, пе. Нош
мон весь сое возьмалом-а,
мар-а, уйёссэ бӧрдыса пукылом?
Мыным но карт утчано
ук. Анае тӥни 16 аресказ бызиз,
нош мыным 19 ни!
— Уй-уй! — шуисько.
— Ну, кутски мон калтыртыны,
мукетъёсыныз
туганъяськыны, аслым карт
утчаны. Толон со та сярысь
тодӥз но вань пиосме коказ.
Монэ но.
— Э-э-э…
Зэмзэ вераса, мон нылэз
буйгатыны кылъёс ӧй шедьты.
Аслам ноку но таӵе учыре
шедьылэме ӧй вал. Мар та
вие кароно? Тӥляд но йырады
шуак лыктысал шат?
Кытчы пырод: Олён
бертӥз ик дораз, кӧня ке ватскыса
улӥз, но нэнэез адӟиз
шимес луэм ымнырзэ. Айы
курка кадь пештырскиз:
полицие заявление сётоно,
кыӵе солэн правоез вал!
Озьы, дыр, малпаз Олён но
— яратоно муртэз вылэ кагаз
гожтӥз. Судозь медаз вуы
шуыса, туган шуонэз нылмурт
доры вуиз, уксё дэмлаз.
Олён яратонзэ 10 сюрс манет
тыр вузаз.