Heft 1

Ut’n Quickborn
Ik segg nochmol danke an de Sporkassenstiften, wat se uns nu al to’n tweeten
Mol so groothartig ünner de Arms grippt.
Uns’ Moot Karl-Heinz Madauß ut Parchen in Meckelnborg hett den ‚Johannes-
Gillhoff-Pries‘ 2008 tosproken kregen un schall em an’n 21. Juni, nomiddags
Klock twee, in Glaisin öbergeben kriegen.De Laudation dörf ik holen un frei
mi.
Nu to uns un de Dank för enkelte Arbeiden an enkelte Minschen:
Eerstmol dank ik de Moten vun de Jury, de den Quickborn-Pries utkieken
deit, un sünnerlich den Vörsitter, Dr. Wulf Lammers, de al soveel Godes för
unsen Vereen don hett.
No Volker Holm 2006 un nu mit Prof. Dr. Jürgen Meier hebbt se een allerbeste
Wohl dropen. Anner Johr ward wi de Jury nee wählen.
Ik dank de Lesers Corl Groth un Bolko Bullerdiek, de in’t Hartwig-Hesse-Huus
in Rissen nu al’n poor Johr de Reeg to Harvst un Freuhjohr öbernohmen hebbt,
un all hebbt se dor veel Freid bi.
Ik bedank mi bi de Heftmokers ober sünnerlich bi all de, de Artikel un Bidrääg
bistüert. De Beuker besnackt un för uns in’t Theoter goht, de de Rundschau,
den olen Fummelkroom, tohoopstellt un den Versand vun de Heften un
Beuker öbernehmt.
De Opbackers un Wegpackers, de Wegfeuhrers un Rohsteurers.
Dat klingt so, as weurn wi vele Minschen, man, in’t Gegendeel: wi hebbt soveel
Multi-Talenten, wat dat meerstendeels jümmer de sülbigen sünd. De
sülbigen poor ‚Peoples‘ – as Rudl Kinau dat nöömt.
Nee, dat is hooch to löben, wat de Vörstand, de Biroot un de Redaktion vör de
Hand bringen dot. Un ok, winn wi uns mol in de Hoor kriegt un ok anbölken
dot, winn wi uns mit anner Lüüd anleggt un strieden dot – dat heurt dor mit to
un mutt wesen.
Sunsten liggt wi blots in de Sünn un nix passeert! Un dat schall nich wesen.
Danken much ik ok Heinz Ahrens, unsen ‚Quickborn-Huusmeister‘ in uns’ nee
‚Quickborn-Huus‘. Dat freit uns heel dull, wat dat so glatt löppt un Heinz dor
sogor noch Spoß bi hett, wenn em de Kartons un Kastens in’t Huus un in de
Garoosch packt ward, wat he nardens mehr topedden kann!
Ok Ellen much ik danken, de noch jümmer de e-mail-Adress vun unsen Vereen
verwalten deit un ok noch dat Internet un uns’ ‚Homepage‘ in’n Blick hett. Dat
schall dit Johr ’n beten anners warrn, wegen Herr Hansen dat ümstellen ward.
Dat harrn wi je al letzt Johr op uns’ Johrsversammeln seggt.
103
Quickborn108-1.Korr.
103
25.03.2008, 9:06 Uhr