bilan 2003 - Union Grand-Duc Adolphe

D’FEELENER MUSEK
UM BLOSMUSIKFESTIVAL ZU WIEN
E bëssen iwwerrascht, mee mat grousser Freed hu mer
d’Noricht kritt, dat mir selektionéiert wieren fir den
Internationalen Blosmusekfestival vun der Stad Wien vum 29
bis den 30. Mee 2003. Et hunn sech prompt 53 vun eise Leit
bereed erklärt fir d’Chance ze notzen a matzefueren. Dëse
Rendez-vous ass an d’Pengschtvakanz gefall, sou dat fir eis
Schüler a Studente kee Problem war. D’Stad Wien huet
d’Onkäschte vum Hotel iwwerholl an d’Iessen fir déi 2 Deeg
vum Festival.
Schon eng Zäit virum Départ hate mer de komplette
Programm mat de Museksstécker zougeschéckt kritt, déi mir
och dunn fläisseg geprouft hunn.
Mëttwochs Owes, den 27. Mee um Punkt 5 Auer ass de Bus
mat den Instrumenter, Uniformen a Musikanten zu Feelen
virum Prouwesall gestart. Eng Partie vun eis sinn eréischt den
Dag drop fréi mam Fliger op Wien gefuer. Um Flughafen hate
mir dunn den 1. Kontakt mat eisem Guide an senger Madame,
dem Ludwig a Sissi Deltl, a mir hunn si direkt ganz
sympathesch fonnt. Mir sinn dunn zesummen an den
herrschaftlechen Parkhotel Schönbrunn gefuer. D’Direktioun
vum Hotel huet eis frëndlecherweis schon um 11 Auer moies
d’Zëmmere fräi ginn, sou dat mir eis konnten eng Stonn
ausrouen. Mir konnten dësen Dag, deen och an Eisterräich e
Feierdag ass, voll ausnotzen. Déi meescht hu vun der
Geleeënheet profitéiert fir d’Schlass Schönbrunn mat senge
wonnerschéinen a gepflegten Parkanlagen ze besichen. Déi
eng goungen an den “Tiergarten” an anerer sinn op d’Gloriette
ropgeklommen, wou se en eemolegen Ausbleck op d’Stad
Wien genoss hunn. Owes nom Iessen huet eise Guide eis
agelueden fir mat him zesummen e Bummel duerch déi
schéinste Stroosse vu Wien ze maachen.
De nächste Mueren ware mir all pünktlech um Dill fir de
Kaffi. Um Programm stoung eng Stadbesichtegung. Do huet
sech erausgestallt, dat eise Guide, de Ludwig, als Ugestallten
vun der Stadverwaltung, Wien bis an déi lescht Wénkele
kennt. Net nëmmen dat kultur-historescht, mee och dat wat
um technesche Plang an deene leschte Joren realiséiert gouf,
wousst hien eis an engem detailléierten Exposé ze
vermëttelen. Op der Donauinsel sinn dunn eng Partie vun eis
op den Tuerm geklomm fir eng wonnerschéin Vue iwwert
Wien a bis an d’Wéngerte vu Grinzing ze genéissen.
No engem schnellen Imbiss hu mer eis Nomëttes prett
gemaach fir d’Prouw am Haff vum Schlass Schönbrunn. Hei
hunn mer d’Leit vun deenen anere Museksgesellschafte
begéint. D’Sonn huet firchterlech gebrannt an den
Thermometer ass bis op 34 Grad geklomm. Mir hunn eis eng
Fläsch Waasser matgeholl an et konnt geprouwt ginn ënnert
der militäresch strammer Direktioun vum Professer Hans
Schadenbauer. Iwwerdeems de Programm vun 12 Stécker
duerchexercéiert ginn ass, erblécke mer ganz onverhofft
sociétés à l’étranger
Revue
Musicale
ënnert dem Publikum eisen Eirepräsident Marcel Thill, dee
Fotoen vun eis gemaach huet. Sou hu mer an der batterer Hëtzt
duerchgehal bis zum Ofmarsch, deen awer zimmlech
chaotesch verlaf ass. Eng éisterräischeg Musek koum richt op
eis duer an hir Leit hu versicht sech duerch eis Reien ze
pressen, an dat iwwert dem Spillen. Et war jo nëmmen eng
Prouw. De nächsten Dag sollt et besser goën. Nom Owesissen
am Fräien ass de Ludwig mat eis op d’Donauinsel gefuer a bei
dësen héich summerlechen Temperaturen hu mer eis esou
richteg a südlännesch Vakanzstëmmung versat gefillt. Et war
en herrlechen a leschtegen Owend, wou mer eis esou richteg
entspane konnten.
De nächste Mueren ware mer all erem pünktleg um Dill, an eis
Equipe sollt sech de ganzen Dag iwwer duerch eng
bemierkenswert Disziplin auszeechnen. Et wor den
entscheedenden Dag. Op enger vun deenen schéinste Plaze
vun Wien, um Michaelerplatz, direkt hannert der Hofburg,
konnte mer ënnert der Direktioun vun eisem Chef, dem Jean-
Marie Thein, e flotte Concert spillen. Ennert den Zuschauer
haten sech esouguer eng Partie Lëtzebuerger agemëscht. Déi
1. Etape war gemeeschtert a mir konnten gelockert an engem
Wienerwald Restaurant iessen.
Wéi mer eis um Heldenplatz zesumme mat deenen aneren
Museken fir de Cortège afonnt hunn, huet d’Sonn erem
fierchterleg gestach. Niewt deenen 27 Bloskapellen aus
Eisterräich wäre mat eis och 5 auslännesch Museken aus
Tchechien, Ungarn, Südtirol an Italien do. Bei der batterer
Hëtzt hunn d’Musikanten sech virum Opstellen nach eng Plaz
am Schied gesicht. Eise Guide, de Ludwig, seng Fra an eis
Vize-Präsidentin hun sech heroesch beméit fir eis mat Waasser
ze versuergen. Vum Heldenplatz si mer am Cortège iwwert de
Ring op de Rathausplatz gaang, wou mer 5 vun eise Märsch
gespillt hunn. Virum Rathaus, wou gottseidank Schied war,
hunn sech déi 1800 Musikanten zesummen opgestallt.
Den Professor Schadenbauer huet säin Taktstaf gehuewen fir
de Concert. Et war eng grandios Prestatioun an e gefällege
Programm deen déi vill Spektateuren ugesprach huet. Als
Erënnerung huet eise Chef vum Buergermeeschter vun der
Stad Wien eng Coupe iwwerreecht kritt. Mir haten eisen Soll
erfëllt a konnten erliichtert zum Ofmarsch, deen des Kéier
reibungslos geklappt huet, untrieden. Souwuel eise Guide wéi
och eise Präsident hunn am Bus d’Musikanten fir déi
exemplaresch Disziplin félicitéiert. D’Satisfactioun an
d’Entspanung stoung eis all an de Gesiichter geschriwwen a
mir haten och d’Gewëssheet eist Ländchen korrekt a würdeg
vertrueden ze hunn. Et goung zréck an den Hotel ënnert
d’Dusch. D’Owesiessen huet besonnesch gudd geschmaacht a
mir hunn decidéiert eise leschten Owend zu Wien richteg ze
genéissen, déi eng bei Musek, déi aner am Prater.
Mueres gouf et fir d’lescht Kaffi. Eise Guide krut e Geschenk
a mir hunn him äddi gesot mat der Iwwerzeegung, e gudde
Frënd gewonnen ze hunn, dee mir mat Sécherheet geschwënn
zu Lëtzebuerg erëmgesinn. Um 9 Auer ass de Bus fir heem
gestart. Déi Musikanten, déi eréischt owes mam Fliger heem
geflu sinn, konnten nach de ganzen Dag d’Stadt besichen. Um
Hallefnuecht hunn mer eis dunn rem all zesummen am
Prouwesall zu Feelen getraff.
Wien war fir d’Feelener Musek en eemolegt an
onvergiesslegt Erliewnes. Musikalesch hu mer eis net
brauchen virun deenen aneren ze verstoppen. Kulturell
si mer méi räich ginn a mir hunn d’Homogenitéit an
d’frëndschaftlech Bezéiungen an eisem Veräin
gestärkt.
Den Organisteuren vun der Rees, besonneg awer och
der Stadt Wien an eiser Union Grand-Duc Adolphe een
häerzlechen an déiwen Merci.
Jean BERNS
Prësident vun der Feelener Musek
39