KölnerLeben Februar/März 2023

26
Vergnügliches
Fastelovend un su wigger
E kölsch Verzällche vom Armin Foxius
Chressdach un Leechmess han mer hinger uns. Jetz
weed op de Trumm jeklopp. Ävver mer hatt sich jo
allt öm der Elfte em Elfte Jedanke jemaat, als wat un
wie mer dis Session jon wollt.
Der Baum es avjeschmück un dat verdrüschte Jestell
zom Müll jebraat, un mer hät allt zwei Setzunge hinger
sich! Et es alles en der Reih un et liet sich jot an. Dat
Corona hät eine doch Levvens- und Laachzick jekoss.
Mer es em Veedel en nem Knubbel orjaniseet, un hät
sich allt de letzte Monde beim Inkaufe, en der Weetschaff,
mem Händy un mem Maile avjesproche, hät hin
un her üvverlaat un sich och allt zom Knuuve, Kläve,
Pappe un Niehe jetroffe. Fastelovend es en änz Saach
un well öntlich bedrivve wäde.
Ming Nohbersch fängk immer beim Simeleere vun hinge
an: Beim Feschesse am Äschermettwoch! Un dann rückwäts:
Nubbelverbrenne, Veedelszoch am Dinsdach, der
Rusemondachszoch, dä Schull- un Veedelszoch et sonndachs:
Un bei allem well mer dobei sin met unse rude
Pappnas. En unsem Schmölzche han mer et Hätz an die
klein Setzunge verlore: em Karree, en der Weetschaff,
Anzeige
em Pfarrsälche, en de Schulle. He kütt der Nohwuchs
her, uns kölsche Jugend, dä mer kölsche Levvensaat,
Kölsch Miljö, de kölsche Fesskalender un vör allem uns
kölsche Sproch beibrenge un vörlevve. Ävver do es
noch vill ze dun, do es en de letzte Johre un Johrzehnte
vill verlore jejange, weil se all eine op Huhdütsch mache
wollte. Mer kann doch en beidse Sproche kalle!
Jo, nä. Dat muss ich doch noch verzälle: Wann mer
uns Kostümcher su zesamme niehe, do sin mer wall su
zwanzich Fraue, un dobei es Singe, Schwaade, Laache.
Die ein udder andere zeich allt ens jet vun der neu
Büttered; jo, dat jitt et bei uns noch! Do jeit de Dür op
un erin kütt et Trüdche als Tannebaum verkleid, mit
Kugele, Batterielämpcher, Luffschlange un Konfettipusterühr.
Der minschjewode Üvverjang vun Chressdach
nohm Fastelovend. Wat han mer jelaach, un dat Wäch
hät jesunge: O Tannebaum, do bes mingen Nubbels
Draum.
Un dat Schöne es: Mer weiß jo immer, wie et wigger
jeit. Ich sage nor: Faastezick un Ostere. – Wie jesaat:
Fastelovend un su wigger.
Illustration: Freepik
KölnerLeben Heft 1 | 23