ALEXANDRE LANGLADE 1820-1900 Poésies Languedociennes ...

N'an que de cants d'amour, de joia,
Per-de-que ie vos tant demau,
Crestian, que tant lous acousseges?
Sa despolha te fai-ti gaud?
Milhou, sariè-ti que i’enveges
Soun bounur e sa libertat?
A loga de s'escabartà
Amount dins l’espaça serena,
Lous voudriès-ti, per mens de pena,
Encastrats dins lou galiniè,
Couma aqueles qu'as de sa mena
Au mas, à la maimajariè?
Lous voudriès couma aquel esclava
Que ta mouliè de vespre enclava
De crenta saique dau seren;
Toujour sadoul de gran, de bren,
De touta mena de mangilhas,
De vilaniès e d'escoubilhas,
E que, fauta d'un clar surgent,
D'un rajòu, d'un valat courrent,
Vai tout rabalant sa panoulha
Dins lou bachàs salle e pudent,
Ounte se bachucha e gourgoulha.
Lou salle bestiau qu'aco fai;
N'a ges de gaubi, ges de biai;
Milhou, s'un jour ie veniè l’ime
De descampà de soun terren,
Crese ben, lou diable me rime,
Que mouririè de patiment,
Mema dins lous prats de Laprada,
A fauta d’atrouvà becada.
Soun talament abastardits
Que saboun pus basti soun nis!
Anem, aucels, per ie coumplaire,
Per vous aparà das filats,
Dau cop de fusil ou dau las,
Voire, ensajàs de ie retraire;
Bandissès lous lindes rajòus,
Roubinas, fluves, estagnòus,
Ounte passàs tant bela vida,
Au bachàs l’ome vous couvida;
Quitàs-m'aqui lou bel estanc
Ounte en iver vous plasès tant;
Pas pus d'aquelas abrivadas
A travès ciel, mars e countradas;
Quoura, raflant à contra-vent
La nèu grespada de la tepa,
Quoura, sus l’oundada que trepa,
Franquissent remòus e courrents,
Couma de naus que van alerta
Jouta lou pole en descouverta,
Lou pole mut e souloumbrous,
Qu'à vautres n'a res de cachous;
Quoura, voltant per d'aut aurages
Ou das nivasses autouniès,
D'ounte devistàs lous vilages
Couma de pichots fournihiès;
Davalàs de las nautous lindas,
N'aurés qu'à vous espesoulhà,
Manjà, beure e s'estourroulhà