ALEXANDRE LANGLADE 1820-1900 Poésies Languedociennes ...

Mais, en cercant gabre, lebraut,
La calla, l'estournel viajaire,
Chaca fes que dor aqui d'aut,
Sus un truc, la partida barra,
En tems fresquet, escardussat,
Dor l'estanc qu'ailaval se carra,
Dins soun liech tout espantoulhat,
Pas un d'eles que noun se vire;
Milhou, i'auriè' na lebre au jas,
Qu'es una coumparança à dire,
Crese que ie farien pas cas.
Es de fet qu'en virant l'espalla
E lou regard d'aquel coustat,
S'es vist sauvà, mai d'una calla,
Mai d'un perdigal envòutat.
De tant que soun rebat lous sona,
Saboun pas, dedins aquel tems,
Se soun sus aiga ou sus terren,
Dins la roucalha ou per la lona.
Soun aqui courna estabourdits;
Pioi, un cop desemrampesits
D'aquela douça estavanida,
Amai countugnoun la partida,
An la pensada en quicom mai;
Ce que i'agrada mai que mai
E i'avena un pauquet la charra,
Es que nosta vota se sarra,
Car es sensat qu'à Sant-Martin,
Se fai la premieira voulada,
En musant, d'aquela journada,
Parloun tout de long dau camin.
Dau tems que d'unes trefoulissoun,
Vesent pas l’oura e lou moument
De metre man e qu'entremens
Per lou terraire s'espandissoun,
A d'autres aco fai pas lum,
Amai de bravament s'en manca.
Dins la cabana, à la calanca.
Sus la guerita, se quauqu'un
Era aqui proche, per entendre
N'ausiriè de man moustrigat,
Mais, en tout, justiça cau rendre,
N'an pas tort de repoutegà.
D'esper el, es cran lou pescaire:
Renega, quand a res à faire;
Quand i'a foga, renega mai;
Milhou, se l'entendiàs, quand prega,
Per ma fe, diriàs que renega.
De que voulès, aco's soun biai!
Dounc se, quand noun i’a sujet, charpa,
De qu'es pas, quand lou terrassenc
Vai, dins soun païs, bougnà l’arpa,
Fa la voulada ou cassà 'u rem?
Ai, se n'en dis, aqui vous laisse!
Amai veni dins soun estanc,
Sa fasenda, soun gagna-pan,