ACEH_03378

AN-NISA' (4) JUZ 4
Wasiet ngon utang bek jeut meularat
Meunan amanat nibak Potallah
Tuhan Neuteupue ngon halim Neuh that
Peumeu'ah ligat meunyoe ka salah
13. Nyan keuh ban hukom bak Tuhan sidroe
Teuma barangsoe ta'at keu Allah
Ta'at keu Rasul 'oh lheuh nibaknyan
Nyan Neupeutamong churuga indah
He deungon krueng di yup churuga
Keukai simasa sinan Neukeubah
Nyan keumenangan nyang leupah raya
That meubahgia Neubri le Allah
14. Teuma barangsoe maksiet keu Tuhan
Ngon Rasul Tuhan teuntee that salah
Lom pih jilingkeu atoran Tuhan
Teumpat di jih nyan nuraka juah
Keukai jih sinan silama-lama
Azeub that hina keu jih Neukeubah
15. Dum inong gata nyang pubuet zina
Peut droe tapeuna saksi bek salah
'Oh lheuh ek saksi inong tahukom
Teuma takurong sideh takeubah
Tinggai di rumoh sampoe 'an mate
Hingga Neuade teuma le Allah
Hingga Tuhan bri jalan nyang laen
Hukom Neupeutron keu jih nyang mudah
16. Bandua droejih nyang pubuet zina
Lam kawan gata tahukom bagah
Hingga jitobat jipubuet buet got
Han peue taseutot jih nyan ka leupah
Cit sipheut Tuhan teurimong tobat
Lom geumaseh that hana ban peugah
17. Teuma di Tuhan tobat Neukira
Nyang kon jisaja jipubuet salah
Hana jiteupue buet jih nyan dacha
Jitobat sigra teuma le bagah
112