ACEH_03378

AN-NISA' (4) JUZ 5
98. Meulengkan ureueng nyang keubit leumoh
Seupot got beungoh hana ek hilah
Agam ngon inong got pih aneuk miet
Cit la'eh keubit jalan tan leumah
99. Teuma ureueng nyan pulang bak Tuhan
Mudah-mudahan Tuhan Peumeu'ah
Maha Peumeu'ah cit sidroe Tuhan
Maha pengampon cit sidroe Allah
100. Soe nyang hijeurah bak jalan Tuhan
Cit leumah jalan mita napakah
Luah that jalan teumpat usaha
Han sia-sia soe nyang hijeurah
Taniet hijeurah teubiet di rumoh
Ate beu peunoh karena Allah
Lom pih hijeurah karena rasul
Nyan cit Neukabui niet teuh le Allah
Sangkira mate bak jak usaha
Meuteumeung pahla Neubri le Allah
Keubit cit Tuhan Maha Pengampon
Laen nibak nyan Maha Pemurah
101. Meunyo cit gata ureueng musaphir
Mita raseuki di bumoe Allah
Nyan jeut tapeu'et seumbahyang gata
Takot jiteuka kaphe seurakah
Takot jiteugom u ateuh gata
Musoh that nyata sikaphe jadah
102. Meu gata rame keumeung seumbahyang
Saboh rombongan tayue dong bagah
Pubuet seumbahyang sigo ngon gata
Teuma seunjata bek roh jikeubah
'Oh lheuh jisujud saboh raka'at
U likot ligat keudeh jilangkah
Rombongan laen teuma seumbahyang
Seunjata sajan pih bek jikeubah
Meujaga sabe meugantoe-gantoe
Seumbahyang meunoe cit tapeurintah
132