ACEH_03378

JUZ 6 AL-MAIDAH (5)
i
i
36. Teuma si kaphe sangkira di jih
Bandum atra jih lam bumoe Allah
Sidumnan teuma jimita laen
Jiteuboh ngon nyan droejih nyang salah
Bek keunong azeub uroe kiamat
Han cit Hadharat Neutueng keu upah
Bah sidumnan le han Neuteurimong
Azeub jih keunong peudeh sileupah
37. Napsu jiteubiet nibak nuraka
Han ek keulua han soe peuleupah
Azeub keu jih nyan lam keukai sabe
Hana teubiet le lam apui mirah
38. Hukom pancuri beu takoh jaroe
Lakoe got binoe hana meuubah
Agam ngon inong hukoman saban
Nyan keuh balasan jipubuet salah
Meunan keuh balah ateuh buet jih nyan
Nyan keu hukoman Neubri le Allah
Teuma cit Tuhan Maha Perkasa
Lom bijaksana areh that leupah
39. Meunyo jitobat lheuh salah jih nyan
Buet jih 'oh lheuh nyan ka got sileupah
Nyan Neuteurimong tobat le Tuhan
Tuhan Pengampon lom that Pemurah
40. Peue teuma gata hana tateupue
Langet ngon bumoe keurajeun Allah
Soe-soe nyang kheundak Neuh jeut Neuazeub
Soe-soe nyang meuh'eut Neuh ampon salah
Tuhan kuasa ateuh barangpeue
Hana meusapeue pih na meusalah
41. Wahe ya Nabi bek susah ate
Jitamong kaphe dum bagah-bagah
Awak nyan jikheun droe jimeuiman
Tapi meuiman di jih bak babah
Dalam atejih hana meuiman
Nyan jeut keuh meunan jikaphe bagah
161