ACEH_03378

JUZ 27 AL-WAQI'AH (56)
20. Boh kayee geucok ri nyang h'eut gopnyan
21. Sie ticem sinan pih ladat leupah
22. Budiadari meucahya mata
23. Sang-sang meutia gohlom meutatah
Ba ngon meutia mantong lam peutoe
24. Bandum atra nyoe jeut keu beunalah
Sabab dilee buet geuh jroh hanaban
Nyan keuh balasan Neubri le Allah
25. Han tom geudeungo narit nyang kuto
Hana meusigo narit nyang salah
26. Narit di sinan saleum seulamat
Ngon rakan sahbat ureueng meutuah
27. Ureueng rot uneun saboh golongan
Pakri ureueng nyan jeut teuh tapeugah
28. Di yup bak siri han tom luroh on
29. Pisang meususon boh jih le leupah
30. Teumpat nyan reului seuteuntang mata
31. Ngon ie mon mata ile dum joh jah
32. Boh kayee le that han ek takira
33. Hana tom reuda sinan geukeubah
Hana soe larang peue-peue nyang hawa
Teuh tacok sigra hana soe bantah
34. Tilam meususon dum manyang-manyang
35. Meupeujeuet sinan dum dara ceudah
36. Budiadari dara peurawan
37. Umu sipadan hana meuubah
Muda seulayeue bandum awak nyan
38. Keu ureueng uneun nyan Kamoe keubah
39. Jama'ah nyan dum bak ureueng dilee
40. Dudoe pih teuntee saboh jama'ah
41. Ureueng nyang rot wie saboh golongan
Pakri ureueng nyan jeut teuh tapeugah
42. Lam angen tutong ie pih tutong that
43. Awan azeub that pih tutong leupah
44. Hana nyang leupie hana nyang mangat
45. Yoh dilee meuhat di jih that mewah
837